He-bơ-rơ 4

1Kơyua yơu nữn, pơnõq drơi iỡuq thơu huaĩq dơlãp tũq hũ pơnuaĩq grữh va tơma dơlãp kaya padơi Pitrai hũ, nữn gãm dòq hũ mơnuĩh dơlãp adơi sơai ôh tũq halơi tơma jỡc. 2Kơyua Pơnuaĩq Siàp nĩ hũ akhàt tơviãq ga pơnõq drơi kung yơu akhàt ga pơnõq nhũ. Nữn Pơnuaĩq siàp pơnõq nhũ hmỡq vloh ôh hũ kuơ hagĩq, kơyua pơnõq nhũ ôh sa lơnuãq sì dơgrữq mơnuĩh hmỡq pơnuaĩq nữn mưng voh-tui. 3Kơyua pơnõq drơi gơnang voh-tui sì hũ tơma dơlãp kaya padơi nữn, drưh yơu pơnuaĩq Pitrai đơp:

“Yơu Kơu song sơtãp rùp dơlãp kaya anõc mơvai prõc,

‘… pơnõq nhũ ròq ôh tũq halơi hũ tơma dơlãp kaya padơi Kơu hũ!’”

Bôh làiq yơu nữn, vruãq ngãq Pitrai hũ song wil tãl mững tũq chrơng pajỡc lơngĩq tơnãh. 4Kơyua hũ anĩh Pitrai đơp mững harơi tơjuh, làiq:

“Dơlãp harơi tơjuh, Yàc Pô Lơngĩq padơi avih dơgrữq vruãq Pitrai.”

5Vloh Pitrai đơp wỡq dơlãp sa pơnuaĩq pơto:

“… Pơnõq nhũ ròq ôh tũq halơi tơma dơlãp kaya padơi Kơu hũ.”

6Kơyua yơu nữn, kung gãm dòq sa tơkìq mơnuĩh ròq hũ tơma pãq đỡn, dơlãp tũq dơgrữq mơnuĩh hlơu ròq hmỡq pơnuaĩq sơh sơr vrơi pa-thơu ga drơi vloh ôh hũ tơma kơyua ôh pãc sãp, 7nữn jỡc Yàc Pô lơngĩq vloh ngãq gơnĩt sa harơi, angãn la “Harơi nĩ.” Lũ thũt vlàt wỡq hadơi, Pitrai đơp mưng Da-vĩt, yơu song đơp hlơu dih:

“Harơi nĩ mơyah làiq pơnõq hã hmỡq pơnuaĩq Pitrai,

nữn juơi khãc hatai.”

8Kơyua mơyah làiq Jô-sue song vrơi pơnõq nhũ hũ padơi dleh, nữn Yàc Pô Lơngĩq ròq ôh đơp mưng sa harơi tơmo wỡq sa hadơi. 9Yơu nữn gãm dòq sa kaya padơi Sa-bat pioh ga vual vơla Yàc Pô Lơngĩq hũ. 10Kơyua mơnuĩh halơi yàp tơma dơlãp kaya padơi Yàc Pô Lơngĩq hũ nữn kung padơi dơgrữq vruãq drơi, yơu Yàc Pô Lơngĩq padơi dơgrữq vruãq Pitrai. 11Kơyua yơu nữn, pơnõq drơi iỡuq kher vơđer tơma dơlãp kaya padơi dleh nữn, pioh ôh hũ mơnuĩh halơi tơma dơlãp kaya ôh pãc tui yơu nữn. 12Kơyua pơnuaĩq Yàc Pô Lơngĩq la pơnuaĩq hadiuq, bãq đãm sì hluỡq rlao dơgrữq đao dua gah mơta. Nhũ tlãuq tơma dơlãp tơviãq jỡc pa-chơlah vơngãq yua sì vơngãq hatai, tơlàc, dlò, sì pơlih hũ iãq gơnĩt dơgrữq kaya sơnơng sigỡuq sì kaya ngãq gơnĩt dơlãp hatai. 13Ôh hũ kaya chrơng pajỡc halơi la padỡuq dơđỡuq di anãq Yàc Pô Lơngĩq. Pa-vlữq wỡq, avih dơgrữq kaya song pabôh sì ràc pa-tơviãq di anãq Pitao nữn pơnõq drơi iỡuq akhàt vrơi thơu.

14Yơu nữn, kơyua pơnõq drơi hũ sa aràc mơnuĩh gơnuar pioh kaya talơvãt prõc rlao avih song tơpa avih dơgrữq tãl lơngĩq, nữn la Yàc Je-su Anàq Yàc Pô Lơngĩq, nữn pơnõq drơi iỡuq rơmiãq gơjãp voh-tui pơnõq drơi. 15Kơyua pơnõq drơi ôh hũ sa aràc mơnuĩh gơnuar pioh kaya duh talơvãt prõc ôh pơlih hũ anĩt anar dơgrữq kaya lơmuỡn lơduh drơi hũ, nữn la sa Pôgrũ song ãt kaya ơniãi dơlãp avih dơgrữq kaya yơu pơnõq drơi, nữn ôh sỗq dlàiq. 16Kơyua yơu nữn pơnõq drơi iỡuq prãn khãc nao trôh pãq sơvan kaya anĩt, pioh tồq mãq kaya khiãng anĩt sì duah hũ kaya anĩt dõc đơ pơnõq drơi dơlãp tũq iỡuq chàc angui.