He-bơ-rơ 6

1Yơu nữn pơnõq drơi iỡuq prah luơi vẽq dơgrữq kaya rơđãp mơgrũ pơnuaĩq pơto mưng Yàc Dõc Pơ-tlah sì nao trôh dơlãp kaya prõc tơgùq. Juơi padỡc wỡq gơnãq ranỡq kaya mơvai tlàq dlàiq mưng dơgrữq vruãq kaya mơtai, voh-tui dơlãp Yàc Pô Lơngĩq, 2pơto mưng adãt ngãq bãp-tem, kaya chẽq tơngãn gãm sì kaya hadiuq wỡq mơnuĩh mơtai hũ, sì kaya chahrơna gãm gãm. 3Pơnõq drơi kung ròq ngãq kaya nữn mơyah làiq Yàc Pô Lơngĩq vrơi gơnuar. 4Kơyua nữn la vruãq ôh tũq halơi — pơweh sì dơgrữq mơnuĩh song gãm hũ pơh kaya sơdah, kung angui mãq kaya anĩt mưng dlòc lơngĩq, tơviãq jỡc mơnuĩh hũ vơnah mưng Yàc Vơngãq Sơđah 5sì angui mãq pơnuaĩq tơpãq siàp Yàc Pô Lơngĩq hũ sigỡuq sì dơgrữq gơnuar chơnuãq rài jẽq trôh hũ 6sì vloh sơnẽq sỗq wỡq — nữn ôh tũq halơi ngãq ga pơnõq nhũ vloh mơvai tlàq dlàiq tơra, kơyua pơnõq nhũ pỡc đĩn Anàq Yàc Pô Lơngĩq ga drơi sa bãc tơra wỡq, sì ràc tơviãq vruãq siẽq siẽl ga Pitrai. 7Kơyua hũ sa pãnh tơnãh, dơlãp tũq song pơsah iũm ia hajàt hõq trỗt pãq dlòc nhũ sì pajỡc tơviãq voh chơtai hũ kuơ ga mơnuĩh halơi lơ-oa dơjũq pơla nhũ, nữn hũ vơnah dơlãp kaya lơngai mưng Yàc Pô Lơngĩq, 8dòq hlùq tơnãh pajỡc tơviãq druơi tơpõc sì rỡq dlài, nữn pãnh tơnãh nữn la kaya tlàq soh sì ròq ngãq yơu sa kaya sơtãp ơluah, nữn kaya luôĩq hadơi nhũ hũ la pioh ga apôi chôh.

9Nữn pơweh sì pơnõq adơi sơai, la dơgrữq mơnuĩh hũ khiãng duman, bôh làiq tũq đơp yơu nữn, pơnõq hlãq song pãc gơnĩt mưng dơgrữq kaya siàp rlao tơviãq mưng dơlãp pơnõq adơi sơai sì dơgrữq kaya va trôh pãq kaya dõc pơ-tlah. 10Kơyua Yàc Pô Lơngĩq ôh iỡuq la ôh tơpãq dãng tồq vloh Pitrai wơr vruãq ngãq adơi sơai hũ, gãm sì kaya khiãng duman nữn pơnõq adơi sơai song akhàt tơviãq kơyua mưng angãn Pitrai, tũq song duh vruãq dơgrữq mơnuĩh gơnuar pơđar sơđah sơchih sì tũq nĩ gãm dòq ngãq yơu nữn mĩn. 11Nữn pơnõq hlãq chơkhãq khiãng dơgrữq tãl aràc dơlãp pơnõq adơi sơai akhàt tơviãq hatai tluỡiq gơhual yơu nữn, pơweh trôh pãq kaya ngãq gơnĩt wil tãl mưng kaya chơkhãq chàc drơi hũ tãl trôh luôĩq hadơi, 12tồq ga pơnõq adơi sơai ôh tơviãq jỡc dơgrữq mơnuĩh ơlah atàq, nữn la dơgrữq mơnuĩh ngãq tui dơgrữq kaya ngãq krơh gơnang di voh tui sì hatai ãt ỡl nữn hũ tồq mãq pơnuaĩq hẽ grưh.

13Kơyua Yàc Pô Lơngĩq, dơlãp tũq hẽ grưh sì A-bra-ham, kơyua yơu Pitrai ôh hũ asơi prõng rlao pioh gơnang nữn sơtãp rùp, nữn song sơtãp rùp gơnang di rùp phuỗt drơi, 14Pitrai đơp làiq: “Kơyua gơnĩt viãq la mơyah vrơi lơngai, Kơu ròq tôh lơngai pãq dlòc anàq, sì mơyah làiq pơtãl rlao, Kơu ròq ngãq pơtãl ga pơjẽh pơtiàt anàq lũ rlao wỡq.” 15Kơyua nữn, hadơi sì tũq ãt ỡn chơkhãq chàc, ung song tồq mãq hũ pơnuaĩq hẽ grưh nữn. 16Kơyua anàq mơnuĩh sơtãp rùp gơnang di sa aràc mơnuĩh halơi nữn prõng rlao drơi, sì pơweh sì pơnõq nhũ, kaya luôĩq hadơi dơgrữq kaya mơvlah kơchah va trôh pãq kaya ngãq gơnĩt nữn la pơnuaĩq sơtãp rùp, 17Tũq Yàc Pô Lơngĩq ngãq gơnĩt akhàt pa-tơviãq savĩq nĩq nũn wỡq ga dơgrữq mơnuĩh patui pơnuaĩq grữh ngãq gơnĩt ôh tũq halơi pa-sơdua pơnuaĩq gơnĩt Pitrai hũ, Pitrai gơjãp kađỡc mưng pơnuaĩq sơtãp rùp 18tồq ga gơnang di dua kaya ôh tũq halơi pa-sơdua nữn, dua kaya nữn ôh hũ pơnẽq halơi pioh Yàc Pô Lơngĩq đơp lor, pơnõq drơi, la dơgrữq mơnuĩh đuaĩq trôh pãq anĩh dòq dơđỡuq, pơlih hũ kaya paluơ padờp prãn khãc pioh apãt mãq gơjãp kaya chàc gơnang tũq nĩ ãn chẽq di anãq drơi; 19nữn la kaya chơkhãq chàc nữn pơnõq drơi mãq angui yơu sa voh gơ-lơnuaĩq ga suàt vơngãq, hũ kaya dadu lơngai gãm sì gơjãp kađữc, sì nao tơma gah dơlãp vlah dơrning, 20anĩh nữn Yàc Je-su song nao tơma yơu sa Pitao nao halơu pioh ala ga pơnõq drơi, hadơi sì tũq tơviãq jỡc pô gơnuar pioh kaya duh talơvãt prõng tãl trôh gãm gãm tui pơjẽh pơtiàt Men-chi-se-đet.