He-bơ-rơ 10:23

1Kơyua voh-va — mĩn la vơngãq mưng dơgrữq kaya siàp mơkrờ trôh hadơi nĩ, ôh iỡuq rùp viãq mưng dơgrữq kaya nữn hũ — ôh tũq halơi pơlih ngãq wil tãl dơgrữq mơnuĩh halơi trôh jẽq Yàc Pô Lơngĩq gãm sì dơgrữq kaya pioh padỡc nữn pơnõq nhũ miẽt ngãq va pioh padỡc thũt nĩ tơpa thũt dih. 2Kơyua mơyah làiq jỡc, nữn ôh iỡuq dơgrữq kaya pioh padỡc viãq la song padưh ôh padỡc tơgùq, kơyua dơgrữq mơnuĩh duh talơvãt ôh dòq thơu dlàiq dơnũh tơra, dơlãp tũq song hũ rao sơchih sa bãc la tãl vloh hẽla hayơu? 3Pa-vlữq wỡq, pơweh sì dơgrữq kaya padỡc nữn, hũ sa kaya pơto pa-sơdor mưng dlàiq dơnũh thũt nĩ tơpa thũt dih. 4Kơyua dơrãh lơmo tơno sì vơve tơno ôh tũq halơi suãq tlàq dlàiq dơnũh jỡc. 5Kơyua yơu nữn, dơlãp tũq Yàc tơmã dơlãp dun kơyua, Pitrai đơp:

“Yàc ôh ưng kaya pioh padỡc sì kaya padỡc, nữn Pitrai song rơchãc lơĩh ga Anàq sa rùp phàp;

6Pitrai kung ôh sơh mưng kaya pioh ngãq adãt chôh pơhual sì adãt pioh dơvuh sơdua dlàiq.

7Vloh hadơi nữn, hlãq đơp làiq: ‘Ơ Yàc Pô Lơngĩq, nĩ, Anàq trôh —

tui yơu pơnuaĩq dơlãp vlah pỗc sơrãq song wãq mưng nàq —

pioh ngãq tơviãq tui hatai ưng Pitrai hũ.’”

8Tũq Pitrai đơp yơu nữn làiq: “Yàc ôh ưng kaya pioh padỡc sì kaya padỡc, sigỡuq sì dơgrữq kaya ngãq adãt chôh pơhual sì dơvuh sơdua dlàiq. Pitrai kung ôh sơh dơgrữq kaya nữn” (nữn nhũ hũ padỡc tơgùq tui voh-va), 9hadơi nữn, Pitrai đơp: “Nĩ, Anàq trôh pioh ngãq tui hatai ưng Pitrai hũ.” Pitrai suãq luơi kaya bãc sa pioh padỡc tơviãq kaya bãc dua. 10Kơyua mưng hatai ưng nữn, pơnõq drơi nĩ song hũ tơviãq jỡc sơđah sơchih gơnang di kaya pioh rùp phuỗt Yàc Dõc Pơ-tlah Je-su hũ ngãq kaya pioh padỡc sa bãc la tãl vloh. 11Viãq, dơgrữq tãl aràc pô gơnuar pioh kaya duh talơvãt dơgrữq harơi dòq dỡc duh vruãq sì gãm padỡc sigỡuq sì kaya pioh padỡc, nữn nhũ ôh tũq halơi pơlih suãq tlàq dlàiq dơnũh jỡc. 12Nữn Pitrai, hadơi sì tũq kơyua mưng dlàiq dơnũh padỡc tơgùq mĩn sa kaya pioh padỡc tãl trôh gãm gãm, nữn song dòq guh gah hơnuãq Yàc Pô Lơngĩq, 13dòq chàc mưng tũq nữn tãl trôh tũq dơgrữq mơnuĩh jơdrãq sì Pitrai kađòc ãt pa-trỗt ngãq kaya kơđuãl ga tơkai Pitrai. 14Kơyua gơnang mĩn sa kaya pioh padỡc, Pitrai song ngãq ga dơgrữq mơnuĩh ãn hũ sơđah sơchih tơviãq jỡc wil tãl trôh gãm gãm. 15Dòq Yàc Vơngãq Sơđah kung ngãq chưng ga pơnõq drơi, kơyua hadơi nữn Pitrai song đơp:

16“Nĩ la pơnuaĩq hẽ grưh nữn Kơu ròq padỡc sì pơnõq nhũ

hadơi sì dơgrữq harơi nữn, Yàc đơp,

dơlãp tũq Kơu padỡc voh-va Kơu dơlãp hatai pơnõq nhũ,

Kơu kung ròq wãq dơgrữq voh-va nữn tơmã dlò sơnơng pơnõq nhũ.”

17Vloh Pitrai đơp:

“Kơu viãq ròq ôh sơdor trôh dlàiq dơnũh pơnõq nhũ

sì dơgrữq vruãq iãh mơsãc pơnõq nhũ tơra.”

18Nữn anĩh halơi hũ kaya tơleh dlàiq dơgrữq kaya ngãq sỗq nữn, anĩh nữn ôh dòq kaya pioh padỡc dơvuh sơdua dlàiq.

19Yơu nữn, ơ pơnõq adơi sơai, kơyua drơi hũ hatai chãc khĩn ga vruãq yàp tơmã dơlãp anĩh sơđah sơchih gơnang di dơrãh Yàc Je-su, 20la Pitao song pơdòq ngãq ga pơnõq drơi sa jơlàt vơhrơu sì hadiuq gãt tơpa vlah dơrning, nữn la nao gãt di rùp phàp Pitrai, 21sì sa aràc pô gơnuar pioh kaya duh talơvãt mơ-àc mơyàc apãt akõq sàc anĩh Yàc Pô Lơngĩq, 22yơu nữn pơnõq drơi iỡuq trôh jẽq di Yàc Pô Lơngĩq mưng hatai tơpãq viãq dơlãp kaya ngãq gơnĩt voh tui hũ, hatai hũ sơrãh dơrãh rao sơchih tlah mưng tũc hatai iãh mơsãc sì rùp phàp hũ rao mưng ia sơchih. 23Pơnõq drơi iỡuq rơmiãq pioh gơjãp pơnuaĩq pa-thơu mưng kaya chàc gơnang drơi hũ ôh sơđô mơgơi, kơyua Pitao song grưh la tui tơpãq. 24Sì pơnõq drơi iỡuq iãq ngãq sigỡuq hayơu pioh pơto pa-sơdor pachôh pasũl mưng hatai khiãng duman sì dơgrữq vruãq ngãq siàp, 25Pơnõq drơi juơi prah tlàq kaya pơjũm pơtõm sigỡuq rùp phuỗt pơnõq drơi hũ yơu hũ tơkìq mơnuĩh rơđãp ngãq, pa-vlữq wỡq la pơto pa-sơdor gỡuq, sì mơyah làiq pơnõq adơi sơai bôh harơi nữn jẽq trôh yơu halơi nữn brõq ngãq lũ yơu nữn rlao wỡq.

26Kơyua mơyah làiq pơnõq drơi miẽt ngãq gơnĩt sỗq dlàiq hadơi sì tũq song tồq mãq kaya pãc thơu vãq sơrè mưng pơnuaĩq tơpãq, nữn ôh dòq hũ kaya pioh padỡc dơvuh dlàiq tơra, 27nữn la kaya chơkhãq chàc tơtơh huaĩq viãq mưng kaya charơna sì mưng apôi khũ hũl rơchãc pioh chôh dơgrữq mơnuĩh jơdrãq nữn mĩn. 28Avih dơgrữq mơnuĩh halơi, mơyah làiq song sỗq voh-va Môi-se gơnang di dua aràc hẽla tlơu aràc ngãq chưng, nữn mơtai vẽq ôh anĩt duman sa asĩt halơi. 29Pơnõq adơi sơai sơnơng mơnuĩh juãq jơlì Anàq Yàc Pô Lơngĩq, sì iãq dơrãh hẽ grưh la ôh srãp sì tasỡuq nrãc — nữn kơyua mưng dơrãh nữn, drơi hũ sơđah sơchih — sì siẽq siẽl Vơngãq Sơđah kaya anĩt hũ, nhũ ròq đang mang kađòc ngãq dlàiq tơrãq rlao ôh thơu hadùp? 30Kơyua pơnõq drơi thơu Pitao song đơp làiq: “Kaya yor đồq tơngãn la pơweh pa Kơu; Kơu ròq ngãq dlàiq wỡq.” Vloh làiq: “Yàc ròq charơna vual vơla Pitrai.” 31Kađòc tơmã dơlãp tơngãn Yàc Pô Lơngĩq gãm hadiuq la sa kaya tơtơh huaĩq viãq!

32Nữn iỡuq sơdor wỡq dơgrữq harơi hlơu thrơi, nữn song hũ tuỗiq pơsàc sơdah dơlãp dơgrữq harơi nữn, làiq pơnõq adơi sơai song ãt sa kaya mơsôh mơvlah prõng sì lũ kaya dleh dlàr pơđìq pơđua, 33tũq nĩ nữn ãt gãm kaya đơp siẽq sì kaya mãq pakỡuq di anãq vual vơla, dòq tũq dih nữn hũ tơviãq jỡc mơnuĩh pa-mơpha sì dơgrữq mơnuĩh halơi kađòc ngãq pơyãq tui pơnẽq nữn. 34Kơyua pơnõq adơi sơai kung song hũ hatai anĩt anar dơgrữq mơnuĩh kađòc krỡq jam, sì song ãt kaya mơnã drơi kađòc mơvlah tlẽq mưng kaya uỗt sơh, kơyua thơu rùp phuỗt drơi hũ kaya mơnã siàp tơpa rlao sì dòq gãm. 35Kơyua yơu nữn, lakơu pơnõq adơi sơai juơi prah tlàq hatai ngãq gơnĩt drơi hũ, nữn la kaya pioh angui sa kaya ban prõng viãq. 36Kơyua adơi sơai hũ kaya iỡuq chàc mưng kaya ãt-ỡl, pioh tồq hadơi nĩ ngãq tui hatai ưng Yàc Pô Lơngĩq hũ, pơnõq adơi sơai pơlih tồq mãq pơnuaĩq hẽ grưh.

37“Kơyua ôh dòq suơi tơra,

Pitao ãn trôh ròq trôh, sì ròq ôh ngãq pa-rơwai tơra.

38Nữn mơnuĩh tơpãq dãng Kơu hũ ròq hadiuq kơyua voh tui;

dòq mơyah làiq mơnuĩh kadũn wỡq, nữn suàt vơngãq Kơu ròq ôh siàp hatai pơweh sì pơnõq nhũ.”

39Nữn rùp phuỗt pơnõq drơi ôh dòq pơweh pa dơgrữq mơnuĩh hũ kaya kadũn wỡq va trôh anĩh ãt lơhiãq thĩt, pa-vlữq wỡq la dơlãp voh tui pơweh trôh pãq anĩh iãq jàc suàt vơngãq hũ.