He-bơ-rơ 11

1Voh tui la kaya thơu gơnĩt gơjãp kađữc mưng dơgrữq kaya drơi ãn chơkhãq chàc, la chưng tang mưng dơgrữq kaya drơi ka-ôh bôh. 2Kơyua mưng voh tui, nữn dơgrữq ung kõq mưng rài sơđãq song hũ ngãq chưng siàp. 3Kơyua mưng voh tui pơnõq drơi kơnãl thơu làiq vãq avih lơngĩq tơnãh lơgar dun kơyua nĩ song hũ chrơng pajỡc mưng pơnuaĩq đơp Yàc Pô Lơngĩq hũ — tồq ga kaya bôh jỡc song ôh chrơng pajỡc mưng kaya pơlih iãq bôh. 4Kơyua voh tui A-bel song padỡc tơgùq ga Yàc Pô Lơngĩq kaya padỡc pioh duh talơvãt siàp rlao kaya Ka-in, nữn gơnang di kaya nữn ung hũ ngãq chưng la mơnuĩh tơpãq dãng, dơlãp tũq Yàc Pô Lơngĩq song tồq mãq dơgrữq kaya pioh padỡc ung hũ, sì gơnang mưng voh tui, bôh làiq song mơtai, A-bel miẽt dòq đơp trôh. 5Kơyua voh tui He-noc hũ va tơgùq, ôh tơpa gãt kaya mơtai, sì “Aràc ôh duah bôh ung, kơyua Yàc Pô Lơngĩq song va ung nao.” Kơyua hlơu sì tũq ung hũ va tơgùq pãq dlòc, ung song hũ ngãq chưng làiq la ngãq siàp hatai Yàc Pô Lơngĩq. 6Yơu nữn, ôh hũ voh tui nữn ôh tũq halơi ngãq siàp hatai Yàc Pô Lơngĩq, kơyua kaya iỡuq ngãq pơweh sì mơnuĩh trôh sì Yàc Pô Lơngĩq la iỡuq pãc-tui gơnĩt làiq Pitrai ròq bôh sì Pitrai la Pitao alĩn vrơi kaya ban ga dơgrữq mơnuĩh halơi duah tui Pitrai. 7Kơyua mưng voh tui, hadơi sì tũq vrơi pa-thơu halơu mưng dơgrữq kaya ka-ôh bôh, nữn kơyua mưng kaya duh huaĩq, Nô-e song ngãq sa voh ahòq ia pioh ga kaya dõc suãq sàc anĩh drơi hũ, nữn kơyua mưng nữn, ung song ngãq dlàiq dun kơyua sì tơviãq jỡc mơnuĩh hũ vơnah tồq mãq kaya tơpãq dãng gơnang di voh tui. 8Kơyua mưng voh tui, kơyua hũ iơu duỡt, A-bra-ham song pãc sãp pioh tơviãq nao trôh anĩh nữn drơi ròq tồq mãq ngãq apôh hamã, sì ung tơviãq nao nữn ôh thơu drơi ãn nao pãq hlơi. 9Kơyua mưng voh tui, ung hadiuq padưh dòq dơlãp lơgar grưh hẽ vrơi ga drơi yơu mơnuĩh thuãi gah lơniãu, tũq song hadiuq dơlãp tlam padưh sì Y-sac gãm sì Ja-kôp, dơgrữq mơnuĩh hũ vơnah tồq mãq sa pơnuaĩq hẽ grưh sigỡuq, 10kơyua ung kung chơkhãq chàc sa palơi hũ rơnỡq gơjãp kađữc, nữn Mơnuĩh Pơcheh Wãq sì Mơnuĩh Rgơi Vỡq Padỡc palơi nữn hũ la Yàc Pô Lơngĩq. 11Kơyua mưng voh tui, vloh rùp phuỗt Sa-ra song tồq mãq hũ tãl kaya prãn khãc pioh mơtiàt bôh làiq song tơhã sì dloòng thũt, kơyua mòq tồq iãq Pitao song grưh la tui tơpãq. 12Kơyua yơu nữn, kung mĩn sa aràc mơnuĩh — sì bôh làiq kađòc iãq yơu mơtai vloh — dơgrữq rài anàq tơcho song hũ pajỡc tơviãq, lũ lã yơu dơgrữq pitỗq pãq dlòc lơngĩq, sì yơu choah pãq gah tơsìq ôh tũq halơi karhia jỡc. 13Dơlãp voh tui, avih dơgrữq mơnuĩh nĩ song mơtai dơlãp tũq ôh-ka tồq mãq dơgrữq pơnuaĩq hẽ grưh, nữn iãq bôh sì tồq ròq pơnõq nhũ mưng atah, hũ angãn sigỡuq làiq drơi la mơnuĩh vual vơla dòq padưh sì mơnuĩh thuãi dơlãp dun kơyua. 14Kơyua dơgrữq mơnuĩh đơp dơgrữq pơnuaĩq yơu nữn vrơi bôh nĩq nũn làiq pơnõq nhũ ãn duah iãq sa palơi phuỗt. 15Mơyah làiq pơnõq nhũ sơdor mưng palơi phuỗt nữn pơnõq nhũ song mưng đỡn tơviãq nao, nữn viãq la pơnõq nhũ song hũ tũq lơwah pioh mai wỡq. 16Nữn tũq nĩ pơnõq nhũ chơkhãq khiãng hũ sa anĩh siàp mơkrờ rlao, nữn la palơi phuỗt pãq dlòc lơngĩq. Kơyua nữn Yàc Pô Lơngĩq ôh mơlơu ơlah mưng pơnõq nhũ, pioh hũ angãn la Yàc Pô Lơngĩq pơnõq nhũ hũ, kơyua Pitrai song rơchãc lơĩh sa palơi ga pơnõq nhũ. 17Kơyua mưng voh tui, A-bra-ham pioh padỡc Y-sac tũq ãt kaya lòc, vloh hadơi sì tũq tồq mãq hũ dơgrữq pơnuaĩq hẽ grưh, ung song padỡc anàq lakơi sa drơi hũ, 18nữn mưng anàq nữn, hũ pơnuaĩq đơp làiq: “Mưng Y-sac, pơjẽh pơtiàt anàq ròq hũ pa-angãn,” 19kơyua nhũ song sơnơng làiq Yàc Pô Lơngĩq hũ gơnuar ngãq ga hadiuq wỡq mưng kaya mơtai, sì pa-tơviãq gơtha tui gah vơngãq, ung song tồq wỡq anàq drơi mưng anĩh nữn. 20Kung kơyua mưng voh tui, Y-sac vrơi lơngai ga Ja-kôp sì E-sau mưng dơgrữq vruãq ròq tơviãq trôh. 21Kơyua mưng voh tui, tũq jẽq tlàq rài, Ja-kôp vrơi lơngai ga dơgrữq tãl aràc anàq lakơi Jô-sep hũ, vloh ung gơnơng di gai mơjrà drơi sì aguãl ta-ồq duh talơvãt. 22Kơyua mưng voh tui, dơlãp tũq jẽq luôĩq rài, Jô-sep pa-sơdor mưng vruãq anàq tơcho Is-ra-el tơviãq mưng E-jip-tơ sì hakơi pơđar pơnõq nhũ mưng tơlàc drơi. 23Kơyua mưng voh tui, hadơi sì tũq đeh tơviãq, Môi-se song hũ ami ama drơi va padỡuq dơlãp tlơu vlàt kơyua pơnõq nhũ iãq anàq tìt nĩ mơkrờ siàp, sì pơnõq nhũ ôh huaĩq di gơnuar pitao. 24Kơyua mưng voh tui, tũq song prõc dãm, Môi-se kơmlah luơi angãn nhũ la anàq lakơi nữn anàq kamơi Pha-ra-ôn hũ. 25Pa-vlữq wỡq, ung ruãh kaya ãt dleh dlàr sigỡuq sì vual vơla Yàc rlao sì kaya hũ tồq mãq kaya sơh sơr padưh dlàiq dơnũh hũ. 26Ung iãq pơwih bôh kaya siẽq siẽl mơnuĩh hũ pa-vuh mơnhàq la kaya mơda gơnãp mơ-àc mơyàc rlao sì kaya màc E-jip-tơ hũ, kơyua ung iãq savĩq gơnĩt pơweh trôh pãq kaya ban drơi hũ. 27Kơyua mưng voh tui, ung tlàq luơi lơgar E-jip-tơ, ung ôh huaĩq kaya nõng mơvai Pitao hũ, kơyua ung gơjãp kađữc ãt ỡl ngãq yơu ãn iãq bôh Pitao ôh tũq halơi bôh jỡc. 28Kơyua mưng voh tui, ung padỡc ngãq kaya Adãt Pơjũm Bõc Nao Gãt sì kaya srãh dơrãh, pioh Pitao pa-lơhiãq dơgrữq anàq kơchoa ôh tèc trôh vual vơla Is-ra-el. 29Kơyua mưng voh tui, vual vơla nao tơpa gãt ia Tơsìq Mơriãh ngãq yơu nao tơpa gãt tơnãh hlùq, la anĩh nữn mơnuĩh E-jip-tơ song kađòc krãp dơlãp nữn hadơi sì tũq rãn avih prãn pơgùq ngãq yơu nữn. 30Kơyua mưng voh tui, dơgrữq jơnãng palơi Je-ri-kô jơlưh tơyah, hadơi sì tũq pơnõq nhũ ròq nao tòp dar dơlãp tơjuh harơi. 31Kơyua mưng voh tui, mơnuĩh kamơi drĩ Ra-hap ôh mơtai sigỡuq sì dơgrữq mơnuĩh ôh pãc-tui, kơyua nhũ song tồq ròq savĩq charơmah charơmai dơgrữq mơnuĩh nao duah iãq pơwih mưng hatai siàp salơnuãq. 32Sì hlãq pơlih đơp pơtãl wỡq kaya hagĩq nĩ? Kơyua ròq ôh tãl tũq jơ ga hlãq pioh akhàt mưng Gi-de-ôn, Ba-rac, Sam-sôn, Jep-the, Đa-vit, sì gãm Sa-mu-en gãm sì dơgrữq mơnuĩh gơnuar hwơr, 33Gơnang voh-tui, Pơnõq nhũ ngãq tui dơgrữq lơgar, nữn ngãq kaya tơpãq dãng tồq hũ pơnuaĩq grữh, pơnõq nhũ kapỡq mơvah rơmoòng phũm. 34Pơdãp apôi khũ, tlah di mơta đao, hũ pha rlao di kaya ruãq sakìq, jỡc prãn khãc dơlãp mơsôh mơtãq, ngãq ga dơgrữq tơpuôl lĩng gah lơniãu iỡuq duh huaĩq. 35Hũ lũ mơnuĩh kamơi tồq mãq mơnuĩh sàc drơi mơtai song hadiuq wỡq, nữn dơgrữq mơnuĩh tơmo kađòc tơnĩa khao, ôh chơkhãq chàc kaya pơrlao, tồq pơnõq nhũ pơlih tồq mãq hũ kaya hadiuq wỡq siàp mơkrờ rlao nữn; 36dòq dơgrữq mơnuĩh tơmo nữn ãt lòc mưng dơgrữq pơnuaĩq siẽq siẽl tlao vlơi sì ãt poh atòc, rlao nữn wỡq la kađòc akãq mưng talơi sơrẽng sì krỡq jam. 37Pơnõq nhũ kađòc prah patơu, kađòc gơgẽq koh jỡc dua khũc, pơnõq nhũ ãt kaya lòc, ãt pa-mơtai mưng đao, pơnõq nhũ nao pãq đĩ pãq đỡn rùp chồq mưng kalìq avo, kalìq vơve, kađòc siẽuq sier, ãt juãq jơlì, ãt mãq pakỡuq; 38(vloh dun kơyua nữn ôh đang mang sì pơnõq nhũ), pơnõq nhũ kađòc va nao dòq gơprah gơprĩc pãq đĩ pãq đỡn dơlãp blàc choah, pãq chỡq pãq dlài, dơlãp gùq patơu sì lơvàc gah ala hlùq. 39Sì hadơi sì tũq hũ ngãq chưng siàp kơyua mưng voh tui, avih dơgrữq mơnuĩh nĩ ôh-ka tồq mãq ga drơi pơnuaĩq hẽ grưh, 40kơyua Yàc Pô Lơngĩq song ngãq gơnĩt rơchãc kaya siàp rlao trôh ga pơnõq drơi, pioh ôh hũ pơnõq drơi, pơnõq nhũ ôh ngãq ga jỡc wil tãl.