He-bơ-rơ 9

1Yơu nữn tũq nĩ, kaya hẽ grưh bãc sa nữn gãm hũ dơgrữq kaya ngãq gơnĩt mưng kaya duh talơvãt, patui gãm sa anĩh sơđah pãq ala hlùq, 2kơyua sa voh tlam padơh song hũ padỡc tơgùq, gah vơnah bãc sa, dơlãp nữn hũ anĩh chẽq tơkai apôi đeng gãm sì ban, sì bẽn pioh padỡc, la anĩh hũ angãn la “Anĩh Sơchih”, 3dòq pãq gah hadơi vlah dơrning bãc dua la sa voh tlam padưh, anĩh hũ angãn la “Anĩh Sơđah Sơchih”, 4dơlãp anĩh nữn hũ sa voh ban chôh pơhual mưng mữh, sì Thồp Kaya Hẽ Grưh hũ vah pơpòq mưng mữh, gah dơlãp nữn la sa voh kadoh ngãq mưng mữh vuh mơnã, gai mơjrà wãq vơngà A-rôn hũ, sì dơgrữq tleh pãng kaya hẽ grưh, 5dòq gah dlòc thồp nữn, hũ dơgrữq che-ru-bim sơđah gơhluh tlỗp vơvãc ta-rơnuãq thồp sơvan, vloh mưng dơgrữq kaya nữn tũq nĩ ôh iỡuq la tũq pioh akhàt tơviãq gơnĩt avih dơgrữq kaya nữn. 6Vloh dơlãp tũq dơgrữq kaya nữn song hũ pơkhrà lơĩh yơu nữn, dơgrữq pô gơnuar pioh kaya duh talơvãt nao tơma gãm dơgrữq harơi dơlãp tlam padưh bãc sa, pioh ngãq dơgrữq gơnuar vruãq drơi hũ; 7nữn mĩn pô gơnuar pioh kaya duh talơvãt prõng hũ tơmã dơlãp anĩh bãc dua sa thũt sa bãc, sì ôh tũq halơi vloh ôh hũ dơrãh la kaya pioh padỡc nữn ung padỡc tơgùq ala ga rùp phuỗt drơi kung yơu dơgrữq kaya ngãq sỗq suẽl tơmo vual vơla hũ. 8Yàc Vơngãq Sơđah angui mưng vruãq nữn pơto pa-thơu nĩq làiq jơlàt tơmã dơlãp Anĩh Sơđah Sơchih ôh-ka pabôh tơviãq, dơlãp tũq tlam padưh bãc sa ãn dòq, 9sì nữn la sa kaya sẽq pa-mơyơu pioh ga rài tũq nĩ, nữn tui pơnẽq nữn, gãm kaya padỡc sì kaya pioh padỡc hũ padỡc tơgùq ôh tũq halơi rgơi ngãq ga mơnuĩh duh talơvãt jỡc wil tãl mưng tũc hatai, 10mĩn pơweh trôh pa kaya bõc sì kaya mơnhũm, sigỡuq sì dơgrữq kaya adãt rao sơchih krơi di gỡuq, nữn la dơgrữq kaya ngãq gơnĩt mưng rơlo rùp, hũ pagùq ngãq tãl trôh harơi padỡc vơhrơu.

11Nữn dơlãp tũq Yàc Dõc Pơ-tlah trôh ngãq mơnuĩh pô gơnuar pioh kaya duh talơvãt prõng mưng dơgrữq kaya tơpãq siàp gãm dòq hadơi nĩ, mưng sàc tlam duh talơvãt dlòc dloòng sì wil tãl rlao wỡq nữn ôh mưng tơngãn anàq mơnuĩh padỡc tơgùq, nữn la ôh pơweh pa dun kơyua kaya chrơng pajỡc nĩ, 12kung ôh iỡuq kơyua mưng dơrãh vơve tơno sì lơmo tơno, nữn kơyua mưng dơrãh rùp phuỗt drơi, Pitrai song tơmã dơlãp dơgrữq anĩh sơđah sơchih sa bãc la tãl vloh, duah krơi ga drơi kaya dơvuh sơlih gãm gãm. 13Kơyua mơyah làiq dơrãh vơve tơno sì lơmo tơno gãm sì vruãq rãh havơu lơmo dơra pãq dlòc dơgrữq mơnuĩh song ãt tasỡuq nrãc dòq va trôh kaya sơchih, pioh angui dơlãp vruãq rao sơđah rơlo rùp pơnõq nhũ, 14nữn dơrãh Yàc Dõc Pơ-tlah, la Pitao kơyua mưng Vơngãq Sơđah gãm gãm song padỡc rùp phuỗt drơi ngãq kaya pioh padỡc ôh halôh lơka ga Yàc Pô Lơngĩq, ròq brõq rao sơchih tũc hatai pơnõq adơi sơai hũ ôh thơu hadùp tlah mưng dơgrữq vruãq mơtai pioh duh vruãq Yàc Pô Lơngĩq gãm hadiuq! 15Kơyua kanõh nữn, Pitrai la Pitao Khrãh Lơwah kaya hẽ grưh vơhrơu hũ, tồq ga hadơi sì tũq kaya mơtai pioh ga vruãq dõc sơdua tlah dơgrữq kaya sơnẽq sỗq gơnang di kaya hẽ grưh bãc sa, dơgrữq mơnuĩh song hũ duỡt ruãh pơlih hũ tồq mãq pơnuaĩq hẽ grưh mưng apôh hamã gãm gãm. 16Kơyua pãq halơi hũ vlah sơrãq wãq hakơi luơi, mơnuĩh wãq vlah sơrãq hakơi luơi nữn iỡuq ngãq chưng tang la mơtai vloh. 17Kơyua sơrãq wãq hakơi luơi hũ gơnuar hadơi sì tũq mơtai, yơu nữn nhũ ôh tũq halơi hũ gơnuar dơlãp tũq mơnuĩh wãq sơrãq hakơi luơi ãn dòq hadiuq. 18Kơyua nữn, vloh kaya hẽ grưh chơmrờp kung song ôh hũ gơnuar mơyah làiq ôh hũ dơrãh. 19Kơyua tũq kaya pơđar-va tui voh-va song hũ Môi-se gãm akhàt vrơi pa-thơu ga avih vual vơla, hadơi sì tũq mãq dơrãh lơmo anàq sì vơve tơno, gãm sì ia, talơi nhõm mơriãh, sì thàt kayơu rỡq grẽh, ung song rãh pãq dlòc gãm pỗc sơrãq sì avih vual vơla, 20vloh ung đơp làiq: “Nĩ la dơrãh kaya hẽ grưh nữn Yàc Pô Lơngĩq song pơto pơđar ga pơnõq adơi sơai.” 21Kung tui yơu pơnẽq nữn, ung song sơrãh dơrãh pãq dlòc gơjàc tlam padưh sì dơgrữq kaya angui dơlãp vruãq adãt pioh padỡc. 22Tui yơu voh-va, avih dơgrữq kaya hũ rao sơchih mưng dơrãh, sì ôh hũ kaya tôh dơrãh nữn ôh hũ kaya tơleh dlàiq.

23Yơu nữn, sa vơnah, kaya iỡuq chàc nữn la dơgrữq kaya ngãq khrung sơnua ga dơgrữq kaya pãq dlòc lơngĩq hũ rao sơchih kơyua mưng dơgrữq kaya pioh padỡc nĩ, nữn vơnah tơmo, nữn mĩn dơgrữq kaya pãq dlòc lơngĩq iỡuq hũ rao sơchih mưng kaya pioh padỡc siàp tơpa rlao dơgrữq kaya pioh padỡc nữn, 24kơyua viãq, Yàc Dõc Pơ-tlah song ôh tơmã dơlãp dơgrữq anĩh sơđah mưng tơngãn anàq mơnuĩh ngãq tơviãq — la dơgrữq kaya ngãq khrung sơnua ga dơgrữq kaya tơpãq viãq hũ — pa-vlữq wỡq la tơmã dơlãp palơi dlòc lơngĩq, pioh tũq nĩ pa-tơviãq rùp di anãq Yàc Pô Lơngĩq ala ga pơnõq drơi, 25kung ôh iỡuq pioh padỡc rùp phuỗt Pitrai lũ bãc, drưh yơu pô gơnuar pioh kaya duh talơvãt prõng sa thũt sa bãc nao tơmã dơlãp anĩh sơđah sơchih gãm sì dơrãh pơweh pa mơnuĩh tơmo; 26Mơyah làiq ôh iỡuq yơu nữn, nữn kaya iỡuq chàc avih ga Pitrai la ãt dleh dlàr lũ bãc mưng tũq chrơng pajỡc dun kơyua. Nữn tũq nĩ, mĩn sa bãc dơlãp rài luôĩq hadơi, kơyua mưng vruãq pa-lơhiãq dlàiq dơnũh, Pitrai song hũ ràc tơviãq mưng kaya mơtai Pitrai hũ. 27Sì patui yơu kaya hũ ngãq gơnĩt lơĩh ga anàq mơnuĩh iỡuq mơtai sa bãc, vloh hadơi nữn la kaya charơna, 28kung yơu nữn, hadơi sì tũq hũ padỡc tơgùq mĩn sa bãc pioh gui-va dlàiq dơnũh lũ mơnuĩh, Yàc Dõc Pơ-tlah ròq hũ iãq bôh bãc dua, ôh pioh gui-va dlàiq, nữn pioh kaya dõc pơ-tlah trôh sì dơgrữq mơnuĩh halơi chơkhãq chàc Pitrai.