He-bơ-rơ 8

1Yơu nữn, pơnuaĩq prõc màc viãq mưng kaya pơnõq drơi ãn đơp la yơu nĩ: Pơnõq drơi hũ sa aràc pô gơnuar pioh kaya duh talơvãt prõng, la Pitao song dòq guh gah hơnuãq sơvan Pitao Mơ-àc Mơyàc pãq dlòc dơgrữq tãl lơngĩq, 2sa aràc mơnuĩh halỗt mơnãq dơlãp anĩh sơđah sì sàc duh talơvãt viãq nữn rùp phuỗt Yàc song padỡc tơgùq, ôh iỡuq anàq mơnuĩh. 3Kơyua dơgrữq mơnuĩh gơnuar pioh kaya duh talơvãt hũ ngãq gơnĩt pioh pồq padỡc gãm kaya padỡc sì kaya pioh padỡc, vloh kơyua nữn, Pitao nữn kung chàc hũ kaya hagĩq nữn nữn Pitrai pơlih padỡc tơgùq. 4Yơu nữn, mơyah làiq Pitrai dòq pãq ala hlùq, nữn viãq Pitrai ròq ngãq pô gơnuar pioh kaya duh talơvãt, kơyua song hũ dơgrữq mơnuĩh padỡc kaya padỡc tui voh-va; 5la dơgrữq mơnuĩh duh talơvãt yơu rùp sì vơngãq mưng dơgrữq kaya pãq dlòc lơngĩq, yơu Môi-se song gãm pơto hakơi dơlãp tũq ngãq jẽq wil tãl sàc duh talơvãt, kơyua Yàc Pô Lơngĩq đơp: “Iỡuq gơrhia iãq, anàq ròq ngãq dơgrữq kaya tui khrung sơnua song hũ ràc tơviãq ga anàq pãq dlòc chỡq.” 6Nữn tũq nĩ, Pitrai song tồq mãq sa gơnuar vruãq mơ-àc mơyàc rlao hadùp, Pitrai kung la Pitao Khrãh Lơwah mưng sa kaya hẽ grưh siàp rlao wỡq, la kaya hẽ grưh song pồq padỡc mưng dơgrữq pơnuaĩq hẽ grưh siàp rlao nữn wỡq. 7Kơyua mơyah làiq pơnuaĩq hẽ grưh bãc sa nữn song wil tãl, nữn viãq dơlãp kaya hẽ grưh bãc dua song ôh duah bôh. 8Kơyua dơlãp tũq gơrloh pơkhè vual vơla, Yàc Pô Lơngĩq đơp:

“Nĩ, dơgrữq harơi nữn ãn trôh, Yàc đơp,

la tũq kơu ròq ngãq wil tãl sa pơnuaĩq hẽ grưh vơhrơu

sì mơnuĩh Is-ra-el gãm sì mơnuĩh Ju-đa;

9nhũ ôh iỡuq yơu pơnuaĩq hẽ grưh yơu

Kơu song padỡc sì ung kõq pơnõq nhũ

dơlãp harơi Kơu apãt tơngãn pơnõq nhũ pioh

dui-va pơnõq nhũ tơviãq tlah mưng lơgar E-jip-tơ,

kơyua pơnõq nhũ ôh patui rơmiãq pioh kaya hẽ grưh Kơu hũ,

nữn Kơu ôh tơlàq iãq pơnõq nhũ,

Yàc đơp yơu nữn.

10Kơyua nĩ la kaya hẽ grưh nữn

Kơu ròq padỡc sì mơnuĩh Is-ra-el;

hadơi dơgrữq harơi nữn,

Yàc đơp,

dơlãp tũq chẽq dơgrữq voh-va Kơu dơlãp dlò sơnơng pơnõq nhũ,

Kơu kung ròq wãq dơgrữq voh-va nữn dơlãp hatai pơnõq nhũ,

sì Kơu ròq la Yàc Pô Lơngĩq pơnõq nhũ,

sì pơnõq nhũ ròq la vual vơla Kơu.

11Gơnĩt viãq dơlãp pơnõq nhũ ròq ôh hũ asơi pơto mơnuĩh gỡuq palơi drơi gãm

sì mơnuĩh adơi sơai drơi, làiq: ‘Iỡuq kơnãl thơu Yàc,’

kơyua avih tãl aràc pơnõq nhũ ròq thơu Kơu,

mưng mơnuĩh tìt tãl trôh mơnuĩh prõc rơlao di khrãh pơnõq nhũ, ròq thơu Kơu.

12Kơyua Kơu ròq mãq hatai anĩt anar pơweh sì dơgrữq vruãq iãh mơsãc pơnõq nhũ,

sì Kơu ròq ôh sơdor trôh dlàiq dơnũh pơnõq nhũ tơra.”

13Kơyua mưng vruãq song angãn kaya hẽ grưh nĩ la “vơhrơu”, nữn Pitrai song ngãq ga kaya hẽ grưh bãc chơmrờp nữn tơviãq jỡc kaya ôh hagĩq tlãq yao, sì kaya halơi song tlãq yao nữn kaya ròq lơhiãq sơmar.