Vruãq 28

1Dơlãp tũq song hũ dadu lơngai vloh, tũq nữn pơnõq hlãq thơu làiq pỗc pơlao nữn angãn la Man-tơ. 2Vual vơla dòq pãq anĩh nữn tồq ròq sì pơyãq pơnõq hlãq savĩq charơmah charơmai krơi tơmo viãq; pơnõq nhũ chôh apôi dòq chàc chơkhãq avih tãl aràc pơnõq hlãq kơyua lơngĩq hajàt miẽt sì lơ-ãt mơrìt viãq. 3Nữn tũq Pol duỡt pơtõm hũ sa pòq iũh prah tơmã apôi, nữn hũ sa drơi anàq ala mơsãc ruơi tơviãq kơyua tluỡiq sì chãq pơdar mãq plàq tơngãn ung. 4Tũq vual vơla dòq pãq đỡn iãq bôh anàq ala kađòc pãq plàq tơngãn ung, nữn pơnõq nhũ đơp sigỡuq: “Mơnuĩh nĩ iỡuq lơĩh la mơnuĩh pa-mơtai mơnuĩh, vơhrơu tơviãq tlah mưng ia tơsìq nữn kaya tơpãq dãng ôh vrơi ga nhũ hadiuq.” 5Nữn vloh ung sơbrãh anàq ala tơmã apôi nữn ôh kađòc kẽq halôh hagĩq. 6Pơnõq nhũ sơnơng ung ròq kađòc vrah mữ tũq nữn hẽla lơvuh trỗt mơtai. Nữn hadơi sì tũq iãq gơnĩt suơi sa asĩt, sì bôh ôh hũ kaya hagĩq krơi tơviãq trôh ga ung, pơnõq nhũ sơnơng krơi wỡq sì đơp làiq ung la yàc.

7Dơlãp phũm vơsai jẽq đỡn la apôh hama kaya mơnã mơnuĩh apãt akõq pỗc pơlao nữn hũ, angãn la Bũp-li-u. Ung tồq ròq sì pơyãq vrơi pơnõq hlãq savĩq chơrmãh viãq dơlãp tlơu harơi. 8Tũq nữn, ama Bũp-li-u kađòc ruãq ajur sì gãm pơđìq kiẽt. Pol nao trôh pãp ung, chẽq tơngãn pãq dlòc ung iơu lakơu, sì pasồq pakhơĩh ga ung. 9Hadơi vruãq nữn, dơgrữq mơnuĩh vual vơla tơmo pãq pỗc pơlao kađòc ruãq kung trôh sì kung hũ pasồq pakhơĩh. 10Vual vơla nữn iãq ki ngãm pơnõq hlãq viãq. Tũq pơnõq hlãq rơchãc pơkhrà jẽq tơviãq nao, pơnõq nhũ va vrơi ga pơnõq hlãq dơgrữq kaya ga pơnõq hlãq ưng angui.

11Yơu nữn, tlơu vlàt hadơi nữn, pơnõq hlãq tơviãq nao đìq sa srôh ahòq ia tơviãq mưng A-lec-san-tri song dòq padưh pãq pỗc pơlao, akõq ahòq hũ tliẽh rùp “yàc đeh yãu.” 12Hadơi sì tũq dơh tơmã palơi Si-ra-ku-sơ, pơnõq hlãq dòq wỡq pãq đỡn tlơu harơi. 13Mưng nữn, pơnõq hlãq patui nao wỡq sì trôh pãq palơi Re-ghi-um. Sa harơi hadơi, hũ angĩn gah prìq vluh tơgùq, sì patui hadơi harơi nữn, pơnõq hlãq nao trôh pãq palơi Bu-sô-lơ. 14Pãq đỡn, pơnõq hlãq pãp sa tơpuôl pơnõq adơi sơai sì hũ jàq dòq wỡq sigỡuq sì pơnõq nhũ dơlãp tơjuh harơi. Miẽt yơu nữn, pơnõq hlãq trôh pãq Rô-ma. 15Mưng anĩh nữn, hadơi sì tũq hmỡq thơu mưng pơnõq hlãq, pơnõq adơi sơai song nao trôh pãq Dràq Ap-bi-u sì pãq anĩh Tlơu Sàc Ơpah Dòq. Tũq iãq bôh pơnõq adơi sơai, Pol ỡn ngai Yàc Pô Lơngĩq sì hũ gơjãp hatai.

16Tũq pơnõq hlãq trôh pãq Rô-ma, Pol hũ gơnuar dòq krơi sa aràc drơi sigỡuq sì mơnuĩh lĩng ãn iãq jàc ung.

17Hadơi nữn tlơu harơi, Pol iơu jàq dơgrữq mơnuĩh apãt akõq dơlãp vual vơla Ju-đa trôh. Tũq pơnõq nhũ song pơjũm pơtõm wỡq, ung đơp sì pơnõq nhũ: “Ơ adơi sơai, bôh làiq hlãq ôh ngãq hagĩq jơdrãq wỡq sì vual vơla hẽla adãt adia ung kõq pơnõq drơi hũ, nữn mưng Je-ru-sa-lem hlãq kađòc va nao yơu mơnuĩh dlàiq dơlãp tơngãn mơnuĩh Rô-ma. 18Hadơi sì tũq pơnõq nhũ tơnĩa khao hlãq, pơnõq nhũ ưng pơlao ga hlãq kaya lơnang lơnai kơyua ôh duah bôh dơlãp hlãq dlàiq halơi đang mang ãt ngãq dlàiq mơtai. 19Nữn tũq mơnuĩh Ju-đa jơdrãq pơjoh, hlãq pơgùq sãp iỡuq buah trôh pãq Se-sa, bôh làiq hlãq ôh hũ gơtha hagĩq pioh yãq vual vơla drơi. 20Yơu nữn, kơyua kanõh gơtha nữn, hlãq song lakơu ưng pãp sì pa-thơu vruãq sigỡuq sì adơi sơai. Kơyua hlãq ãt akãq mưng talơi sơrẽng yơu nĩ la kơyua mưng kaya chơkhãq chàc gơjãp gơnĩt Is-ra-el hũ.” 21Pơnõq nhũ đơp sì ung: “Pơnõq hlãq ka-ôh tồq mãq hũ sơrãq pơyua hagĩq mưng Ju-đe đơp mưng sơai, kung ka-ôh hũ sa aràc adơi sơai halơi trôh pioh akhàt vrơi thơu hẽla đơp dơgrữq kaya hagĩq ôh siàp mưng sơai ôh. 22Nữn pơnõq hlãq ưng thơu sơai sanơng hagĩq mưng jơlàt duh talơvãt nĩ, kơyua viãq pơnõq hlãq thơu làiq nhũ kađòc đơp jơdrãq pơjoh vãq dơgrữq anĩh.”

23Yơu nữn, dơlãp tũq pơnõq nhũ ngãq gơnĩt harơi ga ung, hũ pơtãl lũ mơnuĩh wỡq trôh pãq anĩh ung dòq. Ung akhàt tơviãq dơgrữq vruãq sì pơnõq nhũ sì ngãq chưng mưng palơi lơgar Yàc Pô Lơngĩq. Mưng sơdah mư-ờp tãl trôh tũq tlãp sồp, ung rãn đơp angui gãm voh-va Môi-se gãm sì dơgrữq sơrãq mơnuĩh gơnuar hwơr pioh pơto pa-sơdor pơnõq nhũ mưng Yàc Je-su. 24Hũ tơkìq mơnuĩh ưng pãc-tui dơgrữq kaya Pol đơp, nữn hũ tơkìq mơnuĩh tơmo nữn ôh pãc-tui. 25Tũq ôh sa hatai sì gỡuq, pơnõq nhũ tlàq nao wỡq hadơi sì tũq Pol đơp wỡq pơnuaĩq nĩ: “Mưng mơnuĩh gơnuar hwơr E-sai, Yàc Vơngãq Sơđah song đơp iỡuq viãq sì ung kõq pơnõq ung. 26Pitrai đơp: ‘Iỡuq nao trôh pãq vual vơla nĩ sì đơp:

“Dơgrữq mơnuĩh hmỡq nữn hmỡq, nữn ôh thơu pãc;

pơnõq hã bôh nữn bôh, nữn ôh mơgrũ jỡc kaya hagĩq.”

27Kơyua vual vơla nĩ song tơviãq jỡc dĩq dĩl,

tanĩa pơnõq kãn sì hmỡq,

sì mơta pơnõq nhũ ôh kađip.

Huaĩq mơta pơnõq nhũ bôh jỡc,

tanĩa pơnõq nhũ hmỡq jỡc, hatai pơnõq nhũ pãc jỡc,

vloh pơnõq nhũ ròq gơlàiq mai wỡq,

sì kơu ròq pasồq pakhơĩh ga pơnõq nhũ.’

28Yơu nữn, pơnõq adơi sơai thơu làiq kaya dõc pơ-tlah nĩ Yàc Pô Lơngĩq hũ song hũ pơto akhàt ga dơgrữq vual vơla lơniãu, sì pơnõq nhũ ròq pa-hmỡq.” 29(Tũq Pol đơp vloh dơgrữq pơnuaĩq nữn, nữn mơnuĩh Ju-đa tlàq nao wỡq. Hũ kaya gơrlah pơnuaĩq gơmrữq viãq dơlãp tơpuôl nhũ.)

30Pol hadiuq dua thũt dơlãp sàc ung ơpah dòq sì tồq ròq avih dơgrữq aràc asơi mai trôh pãp ung, 31ung pơto akhàt mưng palơi lơgar Yàc Pô Lơngĩq sì pơto dơgrữq kaya mưng Yàc Dõc Pơ-tlah Je-su sì avih hatai chãc khĩn. Ôh aràc asơi pakỡuq ung.