Vruãq 27

1Tũq song ngãq gơnĩt pơnõq hlãq iỡuq nao pãq Y-ta-li, nao mưng jơlàt tơsìq, nữn pơnõq nhũ pơjao Pol sì gãm mơnuĩh kađòc krỡq jam tơmo ga sa mơnuĩh apãt akõq lĩng angãn Ju-lơ, pơweh gah tơpuôl lĩng Au-gut-tơ. 2Mưng A-tra-mit, pơnõq hlãq đìq sa sơrôh ahòq ia jẽq nao gãt dơgrữq anĩh tui gah tơsìq A-si. Yơu nữn la pơnõq hlãq pơdòq nao. A-ri-tac, mơnuĩh palơi Te-sa-lô-ni-ka, lơgar Ma-se-đoan, nao sigỡuq sì pơnõq hlãq. 3Harơi hadơi, pơnõq hlãq wẽh tơmã palơi Si-đôn, pãq đỡn Ju-lơ tồq ròq pơyãq bõc war sì Pol viãq charơmah charơmai sì vrơi gơnuar ga ung nao pãp dơgrữq mơyơu pioh hũ pơnõq nhũ ròq iãq ung. 4Mưng nữn, pơnõq hlãq pơdòq tơviãq nao sì nao gãt tơmã pỗc pơlao Chip-rơ pioh pleh rơvùq kơyua rơvùq ãn vluh jơdar. 5Tũq song nao gãt tơpa phũm tơsìq Si-li-si sì Bam-phi-ly, pơnõq hlãq trôh pãq palơi Mi-ra pơweh gah phũm Li-si. 6Dòq pãq đỡn, pô apãt akõq lĩng duah hũ sa sơrôh ahòq ia mưng A-lec-san-tri nao Y-ta-li, yơu nữn ung va pơnõq hlãq đìq ahòq nữn. 7Hadơi sì lũ harơi nao suơi viãq sì luôĩq hadơi kung kãn dơmãl viãq trôh pãq Kơ-nĩt, rơvùq ôh siàp hơnar ga pơnõq hlãq nao jơlàt nữn tơra, yơu nữn pơnõq hlãq nao tui gah anĩh vơvãc rơvùq pỗc pơlao Kơ-ret hũ, tơpa gãt Sa-môn. 8Pơnõq hlãq miẽt nao gãt jơdar tui gah ia tơsìq sa savĩq kãn dơmãl yơu nữn tãl trôh sa anĩh angãn la Padưh Siàp, jẽq palơi La-se.

9Pơnõq hlãq song lơhiãq lũ tũq jơ, sì dơlãp jơlàt nao kung pãp kaya savữc rỡc kơyua song tơpa gãt tũq lơwah kaya ãt bõc mơnuĩh Ju-đa vloh. Kơyua yơu nữn, Pol akhàt pa-thơu hlơu ga pơnõq nhũ, 10làiq: “Nĩ, adơi sơai, hlãq iãq dơlãp jơlàt nao tơpa tơsìq nĩ ròq ãt savữc tơyah tơyai sì lũ kaya hõq lơhiãq, ôh mĩn du mơnã kaya sì ahòq ia, nữn dòq gãm kaya hadiuq pơnõq drơi hũ wỡq.” 11Nữn pô apãt tơpuôl lĩng hmỡq pơnuaĩq mơnuĩh apãt akõq ahòq ia sì pô ahòq rlao sì pơnuaĩq Pol đơp. 12Kơyua anĩh ahòq ia dơh ôh kuơ siàp pioh dòq padơh dơlãp vlàt mơrìt, yơu nữn lũ mơnuĩh nao ahòq ia kung ngãq gơnĩt la tơviãq nao pioh mơyah làiq ngãq yơu halơi nữn trôh jỡc palơi Phe-nit, nữn ròq nao gãt vlàt mơrìt pãq đỡn. Phe-nit la sa anĩh ahòq ia dơh pãq Kơ-ret iãq pơweh pãq gah ia harơi tơmã gah prìq sì gah ia harơi tơmã gah prang. 13Tũq angĩn gah prìq pơdòq vluh ơthar, dơgrữq mơnuĩh nao ahòq ia đơp làiq nữn iỡuq la kaya pơnõq nhũ iỡuq chàc. Kơyua yơu nữn, pơnõq nhũ katũc gơ-lơnuaĩq sì vrơi ahòq đuaĩq jẽq gah tơsìq nao tui gah pỗc pơlao Kơ-ret. 14Nữn ôh suơi hadơi nữn, hũ sa yuà angĩn rơvùq prõng iơu la angĩn rơvùq gah prang, mưng pỗc pơlao vluh trỗt. 15Tũq ahòq kađòc rơvùq gơdua sì ôh tũq halơi đuaĩq jơdar tui angĩn jỡc tơra, nữn pơnõq hlãq luơi ga nhũ sỡq tui gah angĩn vluh. 16Pơnõq hlãq nao pleh tui gah kawỡq angĩn sa pỗc pơlao hũ angãn Kơ-lô-đa; kãn dơmãl viãq nữn pơnõq hlãq apãt mãq jỡc srôh ahòq dõc hadiuq. 17Tũq katũc nhũ tơgùq vloh, aràc mãq talơi akãq ahòq gơjãp tòp dar ahòq. Huaĩq làiq pơnõq hlãq pơlih kađòc pãq dlòc dơgrữq blàc choah mưng ala tơsìq tòp dar pỗc pơlao Si-rơ-tơ, pơnõq nhũ pa-trỗt gơ-lơnuaĩq vơdũc sì pioh ahòq sỡq suà nao. 18Nữn pơnõq hlãq kađòc angĩn rơvùq vluh poh mơsãc mơja tơviãq jỡc harơi hadơi, aràc pơdòq mãq mơnã kaya prah trỗt pãq tơsìq. 19Tơpa harơi bãc tlơu, dơgrữq mơnuĩh nao ahòq mãq tơngãn drơi prah trỗt pãq tơsìq dơgrữq kaya pơkhrà angui dơlãp ahòq. 20Nao gãt lũ harơi ôh iãq bôh ia harơi, hẽla ia vlàt ia pitỗq hagĩq, dơlãp tũq rơvùq gơdua prõng miẽt ngãq pahanh pơnõq hlãq, pơnõq hlãq lơhiãq avih kaya chơkhãq chàc hũ dõc tlah. 21Dơlãp sa tũq lơwah suơi rơwìq pơnõq ôh bõc mơnhũm, Pol tơgùq dỡc di khrãh dơgrữq mơnuĩh nao ahòq, đơp:

“Ơ pơnõq adơi sơai, iỡuq viãq adơi sơai hmỡq hlãq vẽq sì juơi tơviãq nao mưng Kơ-ret, tồq vloh iỡuq ãt kaya tơyah sì lơhiãq savữc yơu nĩ. 22Nữn tũq nĩ, hlãq pơto pasũl adơi sơai iỡuq gơjãp hatai vẽq, kơyua ròq ôh hũ kaya lơhiãq halơi mưng kaya hadiuq dơlãp pơnõq adơi sơai, nữn mĩn lơhiãq ahòq ia nĩ soh. 23Kơyua mơlãp ka-vruơi, sa aràc mơnuĩh gơnrơh Yàc Pô Lơngĩq hũ, la Pitao hlãq duh vruãq sì kung la Pitao hlãq duh talơvãt, dòq dỡc jẽq gah hlãq, 24đơp: ‘Ơ Pol, juơi huaĩq. Sơai iỡuq dòq dữc pãq anãq Se-sa. Nĩ, Yàc Pô Lơngĩq, kơyua hatai lơmuỡn siàp Pitrai, song vrơi ga sơai dơgrữq mơnuĩh nao sigỡuq sì sơai.’ 25Kơyua nữn, ơ adơi sơai, iỡuq sơh sơr vẽq! Kơyua hlãq chàc gơnang Yàc Pô Lơngĩq, làiq vruãq ròq tơviãq trôh drưh yơu song akhàt pa-thơu ga hlãq. 26Nữn pơnõq drơi iỡuq kađòc wỡq pãq sa pỗc pơlao halơi nữn.”

27Trôh mơlãp bãc sa plôh pàq, tũq pơnõq hlãq miẽt dòq sỡq nao pãq tơsìq A-đơ-ria-tit, nữn pơgãp di khrãh mơlãp, dơgrữq mơnuĩh nao ahòq đơp làiq pơnõq nhũ ãn nao jẽq trôh sa phũm anĩh halơi nữn. 28Yơu nữn la pơnõq nhũ pơlao talơi voh dũq sì iãq dòq dơlãp pơgãp dua plôh tơpa; hadơi sì tũq nao wỡq sa asĩt tơra, pơnõq nhũ vloh dũq wỡq nữn iãq dòq sa plôh lơmã tơpa. 29Kơyua huaĩq pơlih agòq iỡuq patơu halơi nữn, yơu nữn pơnõq nhũ pơlao pàq akõq gơ-lơnuaĩq vơdũc trỗt dòq gah hadơi ahòq sì lakơu chàc ga lơngĩq sơdah. 30Dơgrữq mơnuĩh nao ahòq duah pơnẽq tlàq nao luơi ahòq sì pơđar pơlẽq trỗt plũc ia dõc mơnuĩh trỗt pãq tơsìq, ngãq pa-gơla yơu nao pơlao gơ-lơnuaĩq vơdũc dòq pãq akõq ahòq. 31Nữn Pol đơp sì pô apãt tơpuôl lĩng sì dơgrữq tơpuôl lĩng: “Mơyah làiq dơgrữq mơnuĩh nĩ ôh dòq wỡq dơlãp ahòq, pơnõq ung pơlih ôh tũq halơi hũ dõc tlah.” 32Yơu nữn la tơpuôl lĩng koh tloh talơi akãq plũc dõc mơnuĩh sì luơi ga nhũ sỡq nao. 33Jẽq trôh sơđah, Pol pơđar lakơu dơgrữq mơnuĩh iỡuq bõc sa asĩt kaya hagĩq nữn. Ung đơp làiq: “Harơi nĩ song la harơi bãc sa plôh pàq adơi sơai miẽt ãt lơ-pa nữn dòq tơlàq iãq chơkhãq chàc, ôh ưng bõc hagĩq. 34Yơu nữn, hlãq lakơu adơi sơai iỡuq bõc kaya hagĩq vẽq, kơyua nhũ ròq dõc adơi sơai dòq hadiuq. Kơyua sa dãc bồq pãq dlòc akõq adơi sơai kung ròq ôh lơhiãq ôh.” 35Hadơi sì tũq đơp yơu nữn, ung mãq bẽn sì ỡn ngai Yàc Pô Lơngĩq pãq anãq dơgrữq mơnuĩh. Vloh ung pẽq bẽn tơviãq sì pơdòq bõc. 36Yơu nữn la dơgrữq mơnuĩh hũ paluơ padờp sì pơnõq nhũ kung bõc. 37Pơnõq hlãq hũ avih tãl aràc la dua rơtôh tơjuh plôh nãm aràc pãq dlòc ahòq. 38Tũq song bõc tarơi vloh, pơnõq nhũ prah vơdai mi trỗt pãq tơsìq pioh luơi ga sa-iỡl ahòq. 39Trôh mư-ờp, pơnõq nhũ kơnãl tơviãq phũm anĩh nữn, nữn pơnõq bôh sa anĩh tơsìq hũ blàc choah, yơu nữn pơnõq vơyai gỡuq iãq pơlih weh va ahòq tơmã đỡn jỡc lơĩh. 40Yơu nữn, pơnõq nhũ kõh tlàq gơ-lơnuaĩq vơdũc pioh ga talơi hõq avih tơmã tơsìq. Vloh kung yơu nữn, pơnõq nhũ kung tơleh talơi voh kõng payuỡq sì, hadơi sì tũq katũc pơcha prõng tơgùq pioh tui yuà angĩn vluh, pơnõq nhũ apãt va ahòq đuaĩq nao tơmã pãq gah. 41Nữn pơnõq nhũ pãp anĩh dua chơnãh ia pãp sigỡuq, sì ahòq ãt kađòc anĩh nữn. Akõq ahòq kađòc khãc dòq pãq đỡn, ôh mơgơi hagĩq jỡc, dòq kadùq ahòq pơdòq tơyah tơviãq kơyua rơyàq ia sỡm nãi mơsãc. 42Pơnẽq vơyai ngãq gơnĩt tơpuôl lĩng hũ la pa-mơtai avih mơnuĩh kađòc krỡq jam tồq ôh sa aràc mơnuĩh halơi pơlih luãi đuaĩq tlah jỡc. 43Nữn kơyua ưng dõc Pol, yơu nữn mơnuĩh apãt akõq lĩng pakỡuq chơkhãq kaya pơnẽq vơyai ngãq gơnĩt nữn; vloh ung vrơi gơnuar ga asơi thơu luãi nữn plõc tơviãq mưng ahòq hlơu sì luãi nao tơmã pãq gah tơsìq. 44Vloh dơgrữq mơnuĩh dòq wỡq luơi tui hadơi, tơkìq mơnuĩh nữn apãt mãq dơgrữq pãng pơpàt, tơkìq mơnuĩh nữn angui dơgrữq kaya tơmo dơlãp ahòq. Tui pơnẽq nữn, dơgrữq tãl aràc pơnõq hlãq hũ tơmã trôh pãq gah dadu lơngai.