Vruãq 26

1Yơu nữn, Pitao Ac-rip-ba đơp sì Pol: “Ung pơlih dõc jơga ga rùp drơi.” Pol yơr tơngãn sì duah pơnuaĩq dõc jơga krơi ga drơi, làiq:

2“Ơ Pitao Ac-rip-ba, đơp angãn trôh dơgrữq kaya hlãq kađòc mơnuĩh Ju-đa yãq, hlãq iãq drơi la prõc rùp viãq tũq nĩ hũ đơp dõc jơga drơi di anãq pitao; 3halơu viãq la, kơyua pitao thơu gơnĩt avih adãt adia mơnuĩh Ju-đa kung yơu dơgrữq vruãq gơrlah pơnuaĩq pơnõq hũ. Kơyua yơu nữn, hlãq lakơu pitao ãt ỡl hmỡq hlãq đơp. 4Viãq, dơgrữq mơnuĩh Ju-đa kung thơu vruãq hlãq hadiuq mưng tũq dòq lơđeh tìt, mưng tũq chơmrờp dơlãp vual vơla hlãq kung yơu pãq Je-ru-sa-lem. 5Kơyua thơu hlãq mưng tũq chơmrờp, yơu nữn pơnõq nhũ pơlih ngãq chưng, mơyah làiq pơnõq nhũ ưng, làiq hlãq hadiuq yơu sa aràc mơnuĩh Pha-ri-si, nữn la tui gah tơpuôl ngãq gơmrữq rlao avih dơlãp jơlàt duh talơvãt pơnõq hlãq. 6Tũq nĩ, hlãq iỡuq dòq dữc pãq đì ãt chahrơna la kơyua kaya chơkhãq chàc gơjãp gơnĩt hlãq hũ dơlãp pơnuaĩq hẽ grưh Yàc Pô Lơngĩq song padỡc sì ung kõq pơnõq hlãq, 7kơyua nĩ la pơnuaĩq hẽ grưh nữn sa plôh dua pơjẽh pơtiàt pơnõq hlãq chơkhãq chàc tồq mãq hũ tũq pơnõq nhũ harơi mơlãp tluỡiq gơhuar duh talơvãt Yàc Pô Lơngĩq. Ơ pitao Ac-rip-ba, mĩn kơyua mưng kaya chơkhãq chàc gơjãp gơnĩt nữn, nữn hlãq kađòc mơnuĩh Ju-đa yãq dlàiq. 8Hayơu pơnõq ung vloh mững vruãq Yàc Pô Lơngĩq ngãq ga mơnuĩh mơtai hadiuq wỡq la vruãq kãn sì pãc-tui? 9Viãq, rùp phuỗt hlãq kung hũ kaya sơnơng làiq drơi iỡuq ngãq dơgrữq vruãq pioh jơdrãq wỡq sì angãn Je-su Na-sa-ret. 10Hlãq ngãq dơgrữq vruãq nĩ pãq Je-ru-sa-lem. Hlãq vloh kung mãq krỡq lũ mơnuĩh gơnuar pơđar sơđah tơmã dơlãp sàc jam; hadơi sì tũq hũ dơgrữq mơnuĩh gơnuar pioh kaya duh talơvãt prõng vrơi gơnuar ga hlãq, hlãq kung vuh tơmã kaya suãq katih sa hatai tũq pơnõq nhũ kađòc ngãq dlàiq pa-mơtai. 11Hlãq kung gãm ngãq dlàiq pơnõq nhũ dơlãp dơgrữq sàc pơtõm, rãn ngãq pơgùq pơ-èp pơnõq nhũ iỡuq ngãq sơvĩl. Hlãq lơmùq mơvai pơnõq nhũ brõq trôh kaya song duah mãq pakỡuq pơnõq nhũ trôh dơgrữq palơi dòq pãq lơgar lơniãu. 12Dơlãp tũq ngãq yơu nữn, hlãq tơgùq nao pãq Đa-mach gãm sì gơnuar sì gơnuar pơđar dơgrữq mơnuĩh gơnuar pioh kaya duh talơvãt prõng hũ, 13pãq jơlàt nao nữn, ơ pitao, tũq khrãh pơđiãq, hlãq iãq bôh kaya sơdah mưng dlòc lơngĩq sơdah gơchràq rlao sì ia harơi pơsàc wĩt dar hlãq sì dơgrữq mơnuĩh nao sigỡuq sì hlãq. 14Dơlãp tũq avih dơgrữq tãl aràc pơnõq hlãq lơvuh trỗt pãq hlùq, hlãq hmỡq hũ sãp đơp sì drơi mưng pơnuaĩq đơp He-bơ-rơ, làiq: ‘Sau-lơ, Sau-lơ, hayơu anàq mãq pakỡuq Kơu? Chõh tơmã jơmưng hluỡq kãn dơmãl viãq ga anàq yơh.’ 15Vloh hlãq tơnĩa: ‘Ơ Yàc, Pitrai la asơi?’ Yàc đơp: ‘Kơu la Je-su anàq ãn mãq pakỡuq. 16Tũq nĩ, iỡuq tơgùq dữc vẽq; kơyua sa kanõh gơtha Kơu pabôh tơviãq ga anàq pioh pơđar gơnĩt anàq ngãq mơnuĩh halỗt mơnãq sì mơnuĩh ngãq chưng mưng dơgrữq kaya anàq song bôh mưng Kơu, kung yơu dơgrữq kaya Kơu ròq pabôh tơviãq ga anàq; 17Kơu ròq dõc suãq anàq tlah mưng vual vơla drơi sì tlah mưng dơgrữq vual vơla gah lơniãu nữn Kơu pơđar anàq nao trôh, 18pioh pơh mơta pơnõq nhũ, tồq ga pơnõq nhũ tlàq luơi kaya sồp kơnãm nữn mai wỡq pãq kaya sơđah, tlàq luơi gơnuar chơnuãq kamlai Sa-tan hũ nữn mai wỡq pãq Yàc Pô Lơngĩq, pioh pơnõq nhũ pơlih hũ tồq mãq kaya tơleh dlàiq, sigỡuq sì apôh hamã dơlãp dơgrữq mơnuĩh song hũ tơviãq jỡc sơđah sơchih kơyua mưng voh tui chàc gơnang Kơu.’ 19Kơyua nữn, ơ pitao Ac-rip-ba, hlãq ôh khĩn jơdrãq sì kaya pabôh tơviãq mưng dlòc lơngĩq nữn; 20hlãq song pơto akhàt hlơu avih ga dơgrữq mơnuĩh dòq pãq Đa-mach, vloh pãq Je-ru-sa-lem, sì avih lơgar Ju-đe, kung yơu pơto ga dơgrữq vual vơla gah lơniãu, làiq pơnõq nhũ iỡuq mơvai tlàq dlàiq sì mai wỡq pãq Yàc Pô Lơngĩq, voh chơtai đang mang sì hatai mơvai tlàq dlàiq. 21Kơyua mưng vruãq nữn, mơnuĩh Ju-đa song mãq hlãq dơlãp sàc duh talơvãt sì duah pơnẽq pa-mơtai hlãq. 22Gơnang mưng kaya dõc pơ-tlah Yàc Pô Lơngĩq hũ tãl trôh harơi nĩ, yơu nữn hlãq dòq miẽt gơjãp kađỡc sì ngãq chưng ga mơnuĩh prõng sigỡuq sì mơnuĩh lơđeh tìt, ôh đơp hagĩq krơi rlao sì kaya nữn dơgrữq mơnuĩh gơnuar hwơr sì Môi-se vrơi thơu ròq tơviãq trôh — 23làiq Yàc Dõc Pơ-tlah iỡuq ãt pơđìq pơđua, sì kơyua la mơnuĩh chơmrờp hadiuq wỡq mưng kaya mơtai, yơu nữn Pitrai ròq akhàt vrơi thơu kaya sơdah ga avih vual vơla pơnõq hlãq gãm sì dơgrữq vual vơla lơniãu.”

24Tũq Pol đơp dơgrữq pơnuaĩq nữn pioh dõc jơga drơi, nữn Phe-tu prõng sãp hũ pah mơvah nữn đơp, làiq: “Pol, ung kruãq vloh; kaya jãc thơu ung lũ uãn ngãq ga ung lơhiãq thĩt dlò.” 25Nữn Pol đơp: “Hlãq ôh hanruơi ôh, pa-thơu pô Phe-tu, nữn hlãq ãn đơp dơgrữq pơnuaĩq tơpãq viãq sì mơdưh siàp. 26Kơyua pô pitao thơu mưng dơgrữq vruãq nữn — yơu nữn hlãq chãc khĩn đơp sì pô pitao — hlãq pãc gơnĩt ôh hũ kaya halơi padỡuq jỡc pô pitao, kơyua vruãq nữn ôh tơviãq trôh dòq sa vơnah tơmo halơi nữn. 27Ơ Pitao Ac-rip-ba, pitao pãc-tui pơnuaĩq dơgrữq mơnuĩh gơnuar hwơr lơĩh? Hlãq thơu la pitao pãc-tui.” 28Ac-rip-ba drơ wỡq sì Pol: “Ung sơga ngãq gơnĩt pơto padờp kơu ngãq mơnuĩh pãc-tui pitao Krist sơmar yơu nữn yơh?” 29Pol drơ: “Hlãq rãn lakơu sì Yàc Pô Lơngĩq mơyah làiq suơi hẽla dơrah, ôh iỡuq mĩn sa aràc pitao, nữn avih dơgrữq mơnuĩh hmỡq hlãq harơi nĩ ròq tơviãq jỡc drưh yơu hlãq nĩ, lơniãu di dơgrữq dãc talơi sơrẽng krỡq nĩ.”

30Vloh Pitao tơgùq dữc, sigỡuq sì pô apãt akõq prõng, mòq Be-re-nit sì dơgrữq mơnuĩh ãn dòq guh sì pơnõq nhũ. 31Tũq nao tơviãq, pơnõq nhũ đơp sì gỡuq: “Mơnuĩh nĩ ôh ngãq hagĩq đang mang mơtai hẽla sì đang mang kađòc krỡq.” 32Pitao Ac-rip-ba đơp sì Phe-tu: “Iỡuq viãq pơlih tơleh dlàiq ga ung nữn jỡc, mơyah làiq ung nữn ka-ôh buah yãq tơgùq pãq Se-sa.”