Vruãq 25

1Trôh tồq mãq gơnuar vruãq dơlãp char hũ tlơu harơi nữn Phe-tu mưng Se-sa-re tơgùq nao pãq Je-ru-sa-lem. 2Dơgrữq mơnuĩh gơnuar pioh kaya duh talơvãt prõng sì dơgrữq mơnuĩh pô hũ gơnuar dơlãp vual vơla Ju-đa nữn yãq dlàiq Pol sigỡuq sì Phe-tu miẽt lakơu ung nữn, 3vrơi ga pơnõq nhũ sa kaya anĩt — nữn la pơđar-va Pol mai wỡq pãq Je-ru-sa-lem — kơyua pơnõq nhũ song rơdãp sa kaya krãq iãq pioh pa-mơtai ung rãh jơlàt. 4Nữn Phe-tu drơ làiq Pol ãn kađòc krỡq pãq Se-sa-re, sì ôh suơi tơra, nữn rùp phuỗt ung ròq trỗt nao pãq đỡn. 5Ung đơp: “Kơyua yơu nữn, dơgrữq mơnuĩh pơweh sì dơlãp tơpuôl gơnuar apãt akõq pơnõq ung iỡuq trỗt nao pãq đỡn pãp pơnõq hlãq. Mơyah làiq ung nữn hũ kaya hagĩq sỗq suẽl, nữn pơnõq nhũ mĩn yãq vẽq nhũ.”

6Phe-tu dòq wỡq sì pơnõq nhũ dòq wỡq talơpãn hẽla sa plôh harơi tơra nữn, vloh ung nữn trỗt nao pãq Se-sa-re. Harơi hadơi, ung nữn dòq guh dơlãp gìq chahrơna sì vrơi gơnuar pơđar-va Pol tơviãq pãp drơi. 7Tũq Pol trôh, dơgrữq mơnuĩh Ju-đa song mưng Je-ru-sa-lem trỗt wàc kơ-rơwàc tòp dar ung, đơp tơviãq lũ pơnuaĩq yãq vãq tơrãq viãq nữn pơnõq nhũ ôh tũq halơi duah hũ kaya krung pahanh. 8Pol pơh sãp đơp dõc ga drơi, làiq: “Hlãq ôh-ka ngãq kaya hagĩq sỗq suẽl jơdrãq sì voh-va mơnuĩh Ju-đa hũ, hẽla sàc duh talơvãt, hẽla Se-sa.” 9Nữn kơyua ưng ngãq siàp hatai tui mơnuĩh Ju-đa, yơu nữn Phe-tu tơnĩa Pol: “Ung ưng tơgùq nao pãq Je-ru-sa-lem pioh ãt hlãq chahrơna mưng dơgrữq vruãq nĩ lơĩh?” 10Pol drơ: “Hlãq ròq tơviãq mơta pãq anĩh chahrơna pãq anãq Se-sa, la anĩh hlãq iỡuq ãt chahrơna. Hlãq ôh ngãq kaya hagĩq sỗq suẽl sì mơnuĩh Ju-đa, yơu pô kung thơu nĩq nũn vloh. 11Vloh mơyah làiq hlãq ngãq kaya hagĩq sỗq sì ngãq kaya hagĩq đang mang mơtai, nữn hlãq ôh kơmlah kaya ãt mơtai ôh. Nữn mơyah làiq pơnuaĩq pơnõq nhũ yãq hlãq ôh iỡuq, nữn ôh hũ mơnuĩh pơjao hlãq ga pơnõq nhũ. Hlãq buah kar lakơu trôh Se-sa.” 12Yơu nữn, hadơi sì tũq Phe-tu đơp dlài sì tơpuôl jơnũm ung nữn drơ làiq: “Ung song buah kar lakơu trôh Se-sa. Ung ròq trôh di anãq Se-sa!”

13Hadơi hadùp harơi nữn, pitao Ac-rip-ba sì Be-re-nit trôh pãq Se-sa-re pioh uỗt sơh chuãq rơwãc Phe-tu. 14Hadơi sì tũq pơnõq nhũ dòq pãq đỡn lũ harơi, Phe-tu akhàt tơviãq mưng vruãq Pol ga Pitao, làiq: “Hũ sa aràc mơnuĩh kađòc jam mưng Phe-lit luơi wỡq. 15Tũq hlãq dòq pãq Je-ru-sa-lem, dơgrữq mơnuĩh gơnuar pioh kaya duh talơvãt prõng sì dơgrữq pô tơha mơnuĩh Ju-đa yãq dlàiq mơnuĩh nĩ, lakơu iỡuq ngãq dlàiq ung nữn. 16Hlãq drơ sì pơnõq nhũ làiq mơnuĩh Rô-ma ôh hũ adãt va pơjao sa aràc asơi hlơu sì tũq mơnuĩh kađòc yãq hũ tũq lơwah halơi đơp mơta sơmu mơta sì mơnuĩh yãq, pioh duah pơnuaĩq dõc jơga krơi drơi hlơu sì dơgrữq pơnuaĩq yãq dlàiq. 17Kơyua yơu nữn, tũq pơnõq nhũ katũc va gỡuq mai trôh pãq đì, hlãq ôh dòq chàc suơi tơra, sì mư harơi hadơi nữn, hlãq dòq guh tơmã gìq chahrơna vloh pơđar-va mơnuĩh nữn tơmã. 18Tũq gah mơnuĩh yãq pơh sãp, pơnõq nhũ ôh yãq ung nữn dlàiq halơi nữn hlãq chơkhãq chàc ôh. 19Pa-vlữq wỡq, pơnõq nhũ mĩn gơrlah pơnuaĩq sì ung nữn mưng jơlàt duh talơvãt drơi hũ sì mưng sa aràc mơnuĩh angãn Je-su song mơtai dih nữn Pol akhàt tơviãq la gãm dòq hadiuq. 20Yơu nữn hlãq dỡq dỡng, ôh thơu iỡuq tơnĩa khao mưng vruãq nĩ yơu halơi. Hlãq tơnĩa ung nữn, ung ưng tơgùq nao pãq Je-ru-sa-lem pioh hũ chahrơna mưng dơgrữq kaya yãq vãq dih lơĩh hẽla ôh. 21Nữn kơyua Pol lakơu pơđar krỡq dơlãp sàc jam ãn sì tũq dòq chàc Se-sa ngãq gơnĩt, yơu nữn hlãq song vrơi gơnuar krỡq jam ung nữn tãl trôh tũq pơlih va ung nữn nao trôh pãq Se-sa.” 22Ac-rip-ba đơp sì Phe-tu: “Rùp phuỗt hlãq, kung ưng hmỡq mơnuĩh nĩ.” Phe-tu drơ: “Harơi pơgi pitao ròq hũ hmỡq.”

23Yơu nữn, dơlãp harơi hadơi, Ac-rip-ba sigỡuq sì Be-re-nit trôh tồq ròq savĩq mơ-àc mơyàc sì nao tơmã dơlãp adũq chahrơna sigỡuq sì pô apãt tơpuôl lĩng sì dơgrữq mơnuĩh hũ gơnuar dơlãp palơi prõng. Phe-tu vrơi gơnuar, nữn pơnõq nhũ va Pol tơmã. 24Vloh Phe-tu đơp, làiq: “Ơ pitao Ac-rip-ba sì avih dơgrữq pơnõq ung hũ mơta dòq pãq đì sì pơnõq hlãq, pơnõq ung kung bôh mơnuĩh nĩ, avih vual vơla Ju-đa song rãn lakơu hlãq pãq Je-ru-sa-lem kung yơu pãq đì, prõng sãp yòc lakơu ôh luơi ga ung nữn hadiuq. 25Nữn hlãq iãq thơu ung nữn ôh ngãq hagĩq đang mang mơtai; rlao tơra, kơyua rùp phuỗt ung nữn lakơu yãq tơgùq sì pitao, yơu nữn hlãq ngãq gơnĩt va ung nữn tồq mai pãq pô. 26Bôh làiq yơu nữn, hlãq ôh hũ kaya hagĩq ngãq nĩq nũn pioh akhàt ga pitao đơp trôh mưng vruãq ung nữn, yơu nữn hlãq va ung nữn tơviãq pãq đì trôh pãq anãq pơnõq ung, hlơu viãq la pãq anãq pitao, ơ pitao Ac-rip-ba, tồq vloh hadơi tũq tơnĩa khao nĩ, hlãq ròq hũ pơnuaĩq pioh akhàt pa-tơviãq sì pitao. 27Kơyua hlãq bôh va sa aràc mơnuĩh dlàiq nao nữn ôh đơp gơnĩt mưng nhũ kađòc yãq mưng dlàiq hagĩq nữn viãq suẽl adãt.”