Vruãq 24

1Lơmã harơi hadơi, hũ pô gơnuar pioh kaya duh talơvãt prõng la A-na-nia, sì gãm hadùp aràc mơnuĩh pô tơha, sì mơnuĩh rgơi duah pơnuaĩq dõc jơga dih angãn la Tet-tu-lu trôh đỡn. Dơgrữq mơnuĩh nĩ yãq Pol pãq anãq pô apãt akõq prõng. 2Tũq Pol dòq dữc pãq anãq pô apãt akõq prõng, Tet-tu-lu pơh sãp yãq ung sì pô apãt akõq, yơu nĩ: “Kơyua mưng kaya anĩt pô nữn pơnõq hlãq hũ tồq kaya dadu lơngai, sì gơnang mưng pô thơu iãq atah lơnang lơnai nữn palơi lơgar pơnõq hlãq hũ pa-sơdua siàp mơkrờ, 3ơ pô Phe-lit mơ-àc mơyàc, avih tũc hatai ỡn ngai, pơnõq hlãq lakơu wãq thơu vruãq ngãq nữn pô hũ, mưng dơgrữq kaya sì vãq dơgrữq anĩh. 4Bôh làiq yơu nữn, pioh ôh luơi Pô dòq chàc suơi wỡq, hlãq lakơu pô siàp hatai hmỡq hlãq akhàt tơviãq hadùp pơnuaĩq. 5Kơyua, pơnõq hlãq bôh mơnuĩh nĩ iỡuq viãq la mơnuĩh ngãq ngãq salũng sơlãng, pa-đuaĩq va dơgrữq mơnuĩh Ju-đa dòq vãq avih dun kơyua sơrôh srãh. Lơniãu nữn, nhũ dòq la mơnuĩh apãt akõq pơweh sì gah tơpuôl Na-sa-ret. 6Vloh nhũ dòq duah pơnẽq đơp sàq ga sàc duh talơvãt, yơu nữn pơnõq hlãq mãq nhũ. 7(Nữn Li-sia, mơnuĩh apãt akõq lĩng, trôh, angui kaya prãn sơwah mãq nhũ mưng tơngãn pơnõq hlãq) 8Mĩn rùp phuỗt pô ròq pơlih nao tơnĩa khao nhũ mưng dơgrữq vruãq nĩ pioh thơu mưng dơgrữq dlàiq nữn pơnõq hlãq yãq nhũ.” 9Vloh mơnuĩh Ju-đa kung sa hatai tui, ngãq gơnĩt dơgrữq kaya nữn la iỡuq.

10Tũq pô prõc lơgar ngãq iơu pơđar ga Pol đơp, Pol drơ: “Hlãq thơu pô song ngãq pô chahrơna vual vơla nĩ lũ thũt, kơyua yơu nữn hlãq lakơu duah pơnuaĩq dõc jơga ga drơi mưng dơgrữq vruãq trôh tãl drơi. 11Pitrai pơlih ngãq gơnĩt làiq mưng tũq hlãq tơgùq mai duh talơvãt pãq Je-ru-sa-lem trôh nĩ ôh rlao sa plôh dua harơi. 12Pơnõq nhũ ôh pãp bôh hlãq gơrlah pơnuaĩq sì mơnuĩh halơi dơlãp sàc duh talơvãt, nữn hlãq kung ôh pachôh tơpuôl vual vơla hẽla dòq pãq sàc pơtõm, hẽla dơlãp palơi prõng. 13Pơnõq nhũ ôh tũq halơi ngãq chưng ga pô mưng dơgrữq vruãq pơnõq nhũ yãq vãq hlãq. 14Nữn hlãq grưh viãq sì Pitrai làiq hlãq duh vruãq Yàc Pô Lơngĩq ung kõq pơnõq hlãq hũ, tui yơu jơlàt duh talơvãt nữn pơnõq nhũ angãn la jơlàt duh talơvãt krơi. Hlãq tui tơpãq sì avih dơgrữq kaya hagĩq tui iỡuq voh-va sì hũ wãq dơlãp dơgrữq sơrãq gơnuar hwơr. 15Hlãq hũ sigỡuq sì kaya chơkhãq chàc gơjãp kađữc dơlãp Yàc Pô Lơngĩq yơu mĩn dơgrữq rùp phuỗt mơnuĩh nĩ ãn dòq chơkhãq chàc, nữn la ròq hũ kaya hadiuq wỡq gãm mơnuĩh tơpãq dãng sì gãm mơnuĩh mơsãc hũ. 16Yơu nữn, mưng kaya chơkhãq chàc nữn, hlãq gãm rãn prãn pioh hũ tũc hatai sơđah sơchih di anãq Yàc Pô Lơngĩq sì anàq mơnuĩh. 17Lũ thũt hadơi nữn, hlãq mai wỡq, va tui jĩn dõc vrơi ga mơnuĩh rơbah lơgar hlãq hũ, sì padỡc kaya duh talơvãt. 18Pơnõq nhũ pãp bôh hlãq ãn ngãq vruãq nĩ, ãt ngãq sơđah sơchih dơlãp sàc duh talơvãt, mĩn ôh hũ tơpuôl lũ hẽla kaya pơjũm pơtõm ngãq sơrôh srãh halơi. 19Nữn hũ hadùp aràc mơnuĩh Ju-đa mưng A-si wỡq, iỡuq viãq la nhũ mai trôh pãq anãq pô pãq đĩ pioh yãq, mơyah làiq hũ vruãq hagĩq yãq hlãq. 20Dòq ôh iỡuq nữn rùp phuỗt dơgrữq mơnuĩh nĩ iỡuq đơp tơviãq kaya sỗq suẽl pơnõq nhũ bôh dơlãp hlãq tũq hlãq dòq dỡc pãq anãq tơpuôl jơnũm mơnuĩh Ju-đa nĩ, 21hẽla, mơyah làiq hũ, nữn mĩn pơnuaĩq hlãq song driãu prõng tũq dòq pãq khrãh pơnõq nhũ, làiq: ‘Hlãq kađòc chahrơna pãq anãq dơgrữq mơnuĩh harơi nĩ la vruãq đơp trôh kaya hadiuq wỡq mơnuĩh mơtai hũ.’”

22Vloh Phe-lit kung thơu nĩq nũn rlao mưng dơgrữq kaya đơp trôh pơnuaĩq Yàc, nữn padưh luơi wỡq kaya chahrơna. Ung nữn đơp: “Tũq halơi pô apãt lĩng Li-sia mưng Je-ru-sa-lem trôh pãq đì, nữn hlãq ròq ngãq gơnĩt mưng vruãq pơnõq ung hũ.” 23Vloh ung nữn pơđar mơnuĩh apãt akõq tơpuôl lĩng krỡq Pol wỡq, nữn iỡuq luơi ga Pol hũ lanơng lơnai, sì juơi mãq pakỡuq ban mơyơu ung trôh dõc iãq ung.

24Hadùp harơi hadơi nữn, Phe-lit gơlàiq wỡq sigỡuq sì sơdiuq la Đơ-ru-si, sa aràc mơnuĩh kamơi Ju-đa, ung nữn pơđar iơu Pol sì hmỡq Pol đơp mưng voh tui dơlãp Yàc Dõc Pơ-tlah Je-su. 25Nữn tũq Pol akhàt tơviãq sì ung nữn mưng kaya tơpãq rĩng, kaya iẽt miẽt sì kaya chahrơna dơlãp harơi hadơi, nữn Phe-lit tơtơh huaĩq, đơp: “Tũq nĩ ung padưh luơi pãq đỡn. Tũq duah hũ tũq lơwah halơi, hlãq ròq pơđar iơu ung mai.” 26Vloh kung yơu nữn, ung nữn chơkhãq chàc pioh Pol ròq vuh luãq jĩn priãq ga drơi, yơu nữn ung nữn pơđar iơu Pol trôh pioh đơp dlài miẽt. 27Tũq avih dua thũt, Bôt-tiu Phe-tu tơgùq ngãq pô apãt akõq prõng ala ga Phe-lit, nữn Phe-lit ưng mãq hatai vual vơla Ju-đa yơu nữn ung miẽt krỡq jam Pol.