Vruãq 23

1Pol iãq tơpãq pãq dlòc dơgrữq tơpuôl jơnũm sì đơp: “Ơ adơi sơai, hlãq song hadiuq yơu sa aràc vual vơla hũ tũc hatai sơđah sơchih di anãq Yàc Pô Lơngĩq tãl trôh harơi nĩ.” 2Tũq nữn, pô gơnuar pioh duh kaya talơvãt prõng la A-na-nia vrơi gơnuar pơđar dơgrữq mơnuĩh dòq dỡc jẽq ung pah di mơvah ung. 3Pol đơp sì ung nữn: “Jơnãng sàc uãq chôr kòq dih, Yàc Pô Lơngĩq ròq poh ung. Ung dòq guh pioh chahrơna hlãq tui voh-va, nữn vloh pơđar mơnuĩh poh hlãq suẽl voh-va, yơu nữn yơh?” 4Nữn dơgrữq mơnuĩh dòq dữc pãq đỡn đơp gơrloh Pol, làiq: “Ung khĩn siẽq siẽl pô gơnuar pioh kaya duh talơvãt prõng Yàc Pô Lơngĩq hũ yơh?” 5Pol drơ làiq: “Ơ adơi sơai, hlãq ôh thơu ung nữn la pô gơnuar pioh kaya duh talơvãt prõng. Kơyua hũ pơnuaĩq wãq: ‘Hã juơi đơp siẽq siẽl mơnuĩh apãt akõq vual vơla drơi.’”

6Tũq Pol bôh tơpuôl dơlãp tơpuôl jơnũm la mơnuĩh Sa-đu-se, dòq tơpuôl dih la mơnuĩh Pha-ri-si, nữn ung đơp prõng sãp pãq anãq tơpuôl jơnũm, làiq: “Ơ adơi sơai, hlãq la sa aràc mơnuĩh Pha-ri-si, la anàq mơnuĩh Pha-ri-si hũ. Hlãq kađòc chahrơna harơi nĩ la kơyua mưng kaya chàc gơnang viãq sì kaya hadiuq wỡq mơnuĩh mơtai hũ.” 7Tũq ung đơp yơu nữn, nữn hũ kaya gơrlah pơnuaĩq di khrãh mơnuĩh Pha-ri-si sì mơnuĩh Sa-đu-se, sì tơpuôl jơnũm pa-chơlah gỡuq tơviãq. 8Kơyua mơnuĩh Sa-đu-se đơp làiq ôh hũ kaya hadiuq wỡq, ôh hũ mơnuĩh gơnrơh, kung ôh hũ dơgrữq vơngãq, nữn mơnuĩh Pha-ri-si nữn tồq iãq hũ dơgrữq kaya nữn. 9Kaya wãc rơsì prõng sãp tơviãq trôh sì hũ tơkìq mơnuĩh gơnuar pơto voh-va dòq gah tơpuôl Pha-ri-si song tơgùq dỡc pơrjai, làiq: “Pơnõq hlãq ôh bôh mơnuĩh nĩ hũ kaya hagĩq suẽl ôh. Thơu yơh hũ sa vơngãq hẽla sa aràc mơnuĩh gơnrơh song đơp sì ung nữn hayơu?” 10Tũq kaya gơrlah pơnuaĩq pơtãl tơgùq rlao, mơnuĩh apãt akõq lĩng huaĩq Pol ròq kađòc pơnõq nhũ pa-mơtai, yơu nữn ung vrơi gơnuar ga mơnuĩh lĩng trỗt angui kaya prãn pioh mơvlah mãq ung mưng dơgrữq tơpuôl mơnuĩh jơnũm, sì va ung nao wỡq pãq anĩh bòc iãq tơpuôl lĩng dòq.

11Mơlãp hadơi, Yàc dòq dữc gah ung sì đơp làiq: “Iỡuq gơjãp hatai vẽq. Anàq song ngãq chưng mưng Kơu pãq Je-ru-sa-lem yơu halơi, nữn anàq kung iỡuq ngãq chưng yơu nữn pãq Rô-ma.”

12Trôh mư-ờp, hũ tơkìq mơnuĩh Ju-đa vơyai pơnẽq sigỡuq. Pơnõq nhũ padỡc pơnuaĩq hẽ grưh sì grưh ròq ôh bõc ôh mơnhũm tãl trôh tũq pa-mơtai jỡc Pol. 13Hũ pơgãp pàq plôh aràc padỡc vơyai pơnẽq nĩ. 14Pơnõq nhũ trôh pãp dơgrữq pô gơnuar pioh kaya duh talơvãt prõng sì dơgrữq pô tơha, đơp làiq: “Pơnõq hlãq song hẽ grưh làiq ròq ôh bõc hagĩq tãl trôh tũq pơnõq hlãq pa-mơtai angãn Pol. 15Kơyua nữn, lakơu pơnõq ung sigỡuq sì avih tơpuôl jơnũm akhàt wỡq sì mơnuĩh apãt akõq lĩng, ngãq yơu pơnõq ung ưng thơu nĩq nũn rlao sì dơgrữq vruãq đơp trôh angãn Pol, pioh ung nữn ròq va nhũ nao pãp pơnõq ung. Dòq mưng vơnah pơnõq hlãq, pơnõq hlãq ròq pơkhrà lơĩh pioh pa-mơtai nhũ hlơu sì tũq nhũ trôh đì.” 16Nữn anàq lakơi sơai kamơi Pol hmỡq thơu mưng kaya krãq iãq, yơu nữn nhũ trôh pãq anĩh bòc iãq tơpuôl lĩng dòq akhàt ga Pol thơu. 17Yơu nữn, Pol iơu sa aràc dơlãp dơgrữq mơnuĩh apãt tơpuôl lĩng vloh, đơp làiq: “Iỡuq va mơnuĩh dãm nĩ trôh pãq anĩh mơnuĩh apãt tơpuôl lĩng, kơyua nhũ nữn hũ vruãq ưng akhàt tơviãq.” 18Yơu nữn, mơnuĩh apãt tơpuôl lĩng va mơnuĩh dãm nao trôh pãp mơnuĩh apãt tơpuôl lĩng, drơ: “Mơnuĩh kađòc jam la Pol gơnang hlãq va mơnuĩh dãm nĩ trôh pãp pô. Nhũ nữn hũ vruãq ưng akhàt vrơi thơu sì pô.” 19Mơnuĩh apãt tơpuôl lĩng apãt tơngãn nhũ va tơviãq krơi, vloh tơnĩa: “Hã ưng akhàt vrơi thơu ga kơu vruãq hagĩq?” 20Mơnuĩh dãm nữn drơ: “Mơnuĩh Ju-đa song sa hatai apãt tơngãn sigỡuq ròq lakơu pô harơi pơgi va Pol trỗt pãq tơpuôl jơnũm, ngãq yơu pơnõq nhũ ưng tơnĩa khao nĩq nũn mưng vruãq tơbàq trôh ung nữn. 21Nữn lakơu pô juơi hmỡq pơnõq nhũ, kơyua hũ rlao pàq plôh aràc ãn krãq chơkhãq chàc ung nữn. Pơnõq nhũ song hẽ grưh làiq ròq ôh bõc ôh mơnhũm tãl trôh tũq pa-mơtai ung. Vloh tũq nĩ pơnõq nhũ song pơkhrà lơĩh, mĩn dòq chàc pô sa hatai hẽ pơnuaĩq.” 22Mơnuĩh apãt tơpuôl lĩng vrơi mơnuĩh dãm nao wỡq hadơi sì tũq hakơi pakỡuq nhũ: “Juơi vrơi ga mơnuĩh halơi thơu hã song akhàt ga kơu vruãq nĩ.” 23Vloh, ung pơđar iơu dua aràc pô apãt akõq lĩng trôh, hakơi: “Iỡuq pơkhrà rơchãc dua rơtôh lĩng sigỡuq sì tơjuh plôh rơdeh ơseh tơpuôl lĩng sì dua rơtôh lĩng apãt tơrĩng, dơlãp tũq jơ bãc tlơu mơlãp nĩ nao trôh pãq Se-sa-re, 24va tui ơseh pioh Pol đìq sì va ung dadu lơngai nao trôh pãq anĩh pô apãt akõq prõng Phe-lit.” 25Vloh, ung wãq sơrãq pơyua yơu nĩ:

26“Kơ-lôt Li-sia lakơu pơyua ga pô apãt akõq prõng Phe-lit! Lakơu dơgrữq kaya hũ dadu lơngai. 27Mơnuĩh nĩ kađòc mơnuĩh Ju-đa mãq sì jẽq pa-mơtai nữn hlãq sigỡuq sì tơpuôl lĩng nao trôh ung dõc suãq ung nữn kơyua hlãq thơu làiq ung la vual vơla mơnuĩh Rô-ma. 28Hlãq ưng thơu pơnõq nhũ yãq ung nữn dlàiq hagĩq, yơu nữn hlãq va ung nữn trỗt pãq tơpuôl jơnũm pơnõq nhũ hũ. 29Hlãq thơu làiq ung nữn kađòc yãq vãq mưng dơgrữq vruãq angãn trôh voh-va krơi pơnõq nhũ hũ, nữn ôh hũ kaya yãq vãq halơi pioh chahrơna ung nữn dlàiq đang mang mơtai hẽla krỡq tơmã sàc jam. 30Hadơi nữn, hlãq hmỡq đơp ròq hũ pơnẽq vơyai ngãq iãh mơnuĩh nĩ, kơyua yơu nữn hlãq ngãq mư va ung nữn nao trôh pãq anĩh pô, sì kung pơđar gah dơgrữq mơnuĩh yãq va vruãq yãq vãq nao akhàt tơviãq pãq anãq pô.”

31Yơu nữn, tơpuôl lĩng tui gơnuar vrơi ga pơnõq nhũ, ãn dlài mơlãp va Pol nao trôh pãq An-ti-ba-tri. 32Harơi hadơi, pơnõq nhũ luơi ga rơdeh ơseh tơpuôl lĩng nao wỡq sì Pol, dòq pơnõq nhũ mai wỡq pãq anĩh bòc tơpuôl lĩng dòq. 33Tũq dơgrữq rơdeh ơseh tơpuôl lĩng trôh pãq Se-sa-re, sì pơjao sơrãq pơyua ga pô apãt akõq prõng, pơnõq nhũ kung va Pol pabôh mơta ga ung nữn. 34Pô apãt akõq prõng pơpoh sơrãq pơyua sì tơnĩa Pol la mơnuĩh dòq pãq char halơi. Tũq thơu làiq la mơnuĩh Si-li-si, 35ung nữn đơp: “Kơu ròq hmỡq hã akhàt tơviãq dơgrữq vruãq dơlãp tũq gah tơpuôl yãq trôh pãq đì,” Vloh, ung pơđar krỡq iãq Pol dơlãp gơlãng He-rôt hũ.