Vruãq 22

1“Ơ adơi sơai sì dơgrữq mơnuĩh ngãq wà miẽq, lakơu hmỡq pơnuaĩq hlãq pioh dõc jơga sì adơi sơai nĩ.”

2Tũq tơpuôl lũ hmỡq Pol đơp sì drơi mưng sãp He-bơ-rơ, nữn pơnõq nhũ vloh brõq dòq suà lìt. Vloh ung đơp wỡq:

3“Hlãq la mơnuĩh Ju-đa, đeh pãq palơi Tat-sơ, lơgar Si-li-si, nữn hũ nao mơgrũ dơlãp palơi nĩ tui tơkai pôgrũ Ga-ma-li-en. Hlãq hũ mơgrũ pơ-srãm tui jơlàt athua voh-va gơjãp kađỡc ung kõq pơnõq drơi hũ. Hlãq tluỡiq gơhuar mưng Yàc Pô Lơngĩq, kung drưh yơu avih dơgrữq adơi sơai harơi nĩ. 4Hlãq song mãq pakỡuq Jơlàt Duh Talơvãt nĩ tãl trôh mơtai, mãq chãq sì va pơnõq nhũ tơmã sàc jam, gãm mơnuĩh lakơi sigỡuq sì mơnuĩh kamơi, 5yơu mơnuĩh gơnuar pioh kaya duh talơvãt prõng sì avih dơgrữq pô tơha pơlih ngãq chưng ga hlãq. Hlãq kung tồq mãq sơrãq pơyua pơnõq nhũ wãq ga pơnõq adơi sơai pãq Đa-mach, sì viãq, hlãq kung nao trôh palơi nữn pioh mãq chãq dơgrữq mơnuĩh dòq pãq đỡn sì va pơnõq nhũ wỡq pãq Je-ru-sa-lem ãt ngãq dlàiq. 6Vruãq tơviãq trôh tũq hlãq ãn nao sì jẽq trôh pãq Đa-mach, pơgãp di khrãh harơi, dơvruh dơvrah, hũ kaya sơđah prõng mưng dlòc lơngĩq pơdòq pơsàc tòp dar hlãq. 7Yơu nữn, hlãq lơvuh trỗt pãq hlùq sì hmỡq sa sãp đơp sì drơi, làiq: ‘Ơ Sau-lơ, Sau-lơ, hayơu anàq mãq pakỡuq kơu?’ 8Hlãq drơ làiq: ‘Pitrai la asơi, ơ Yàc?’ Yàc hẽ wỡq sì hlãq: ‘Kơu la Je-su Na-sa-ret nữn anàq ãn mãq pakỡuq.’ 9Dơgrữq mơnuĩh nao sigỡuq sì hlãq bôh viãq kaya sơđah nữn, nữn pơnõq nhũ ôh thơu pãc sãp Pitao đơp sì hlãq. 10Vloh hlãq tơnĩa: ‘Anàq iỡuq ngãq hagĩq, talơvãt Yàc?’ Yàc hẽ: ‘Iỡuq tơgùq dỡc nao tơmã palơi Đa-mach; pãq đỡn anàq ròq hũ vrơi thơu dơgrữq vruãq song ngãq gơnĩt vrơi ga anàq ngãq.’ 11Kơyua mưng kaya sơđah gơchràq nữn, ngãq ga hlãq ôh hũ bôh jơlàt, yơu nữn dơgrữq mơnuĩh nao sigỡuq apãt tơngãn dui va hlãq tơmã palơi Đa-mach. 12Pãq đỡn, hlãq pãp sơai A-na-nia dih, sa aràc mơnuĩh tluỡiq gơhuar ngãq tui yơu voh-va sì hũ dơgrữq mơnuĩh Ju-đa hadiuq pãq đỡn sơ-uỗt mơyòp, 13nhũ mai pãp hlãq sì dòq dỡc gah hlãq, đơp: ‘Ơ Sau-lơ, iỡuq sơđah mơta vẽq.’ Mư tũq jơ nữn, hlãq iãq bôh nhũ nữn. 14Vloh nhũ đơp wỡq: ‘Yàc Pô Lơngĩq ung kõq pơnõq drơi hũ song duỡt ruãh sơai pioh thơu yơu hatai ưng Pitrai, sì pioh iãq bôh Pitao Tơpãq Rĩng, kung yơu hmỡq sãp đơp mưng mơvah Pitrai. 15Kơyua sơai ròq la sa aràc mơnuĩh ngãq chưng ga Pitrai di anãq dơgrữq mơnuĩh mưng dơgrữq vruãq hagĩq sơai song bôh sì hmỡq. 16Yơu nữn, sơai dòq chơkhãq chàc hagĩq wỡq? Iỡuq tơgùq dỡc vẽq, iơu lakơu angãn Yàc, ãt adãt bãp-tem sì ngãq sơchih dlàiq dơnũh drơi.’ 17Hadơi sì tũq mai wỡq pãq Je-ru-sa-lem, tũq ãn iơu lakơu dơlãp sàc duh talơvãt, nữn hlãq dòq dơlãp kaya wãc lơhiãq kaya kaya sơnơng. 18Hlãq bôh Yàc đơp sì hlãq: ‘Iỡuq sơmar sơmar tơviãq tlah mưng Je-ru-sa-lem pioh pa-sơmũ, kơyua pơnõq nhũ ròq ôh tồq pơnuaĩq ngãq chưng anàq hũ mưng kơu.’ 19Hlãq drơ pơnuaĩq: ‘Ơ Yàc, rùp phuỗt pơnõq nhũ thơu làiq anàq song mãq jam sì poh atòc dơgrữq mơnuĩh pãc-tui Pitrai dơlãp dơgrữq sàc pơtõm wỡq. 20Tũq dơrãh E-tien, la mơnuĩh ngãq chưng ga Pitrai hũ, ãt tôh tơviãq, rùp phuỗt anàq kung dòq dỡc pãq đỡn, sa hatai sì pơnõq nhũ, sì anàq dòq apãt ao ga dơgrữq mơnuĩh song pa-mơtai ung nữn.’ 21Nữn Pitrai đơp sì hlãq: ‘Iỡuq nao vẽq, kơyua kơu ròq pơđar anàq nao trôh sì dơgrữq vual vơla lơniãu dòq pãq anĩh atah.’”

22Pơnõq nhũ ưng hmỡq ung đơp trôh pãq đỡn. Vloh pơnõq nhũ driãu papơ prõng sãp: “Iỡuq pa lơhiãq vẽq mơnuĩh yơu nĩ tlah mưng voh hlùq, ôh iỡuq luơi ga nhũ dòq hadiuq.” 23Tũq Pơnõq nhũ ãn driãu priãu, wàq ao tơviãq sì kuaĩq havơu thũl prah sa-prãi tơgùq pãq dlòc lơngĩq, 24nữn mơnuĩh apãt akõq mơnuĩh lĩng pơđar-va Pol tơmã tơbòc anĩh tơpuôl lĩng dòq. Ung vrơi gơnuar angui gai hơwai poh tơnĩa khao Pol pioh thơu kơyua hayơu vual vơla vloh driãu papơ jơdrãq sì ung yơu nữn. 25Nữn tũq pơnõq nhũ song akãq katũc chơtãng ung tơviãq jẽq poh, nữn Pol tơnĩa mơnuĩh apãt akõq lĩng ãn dòq dỡc pãq đỡn: “Voh-va vrơi gơnuar lơĩh ga pơnõq ung angui gai hơwai poh sa aràc vual vơla mơnuĩh Rô-ma ka-ôh kađòc ngãq dlàiq?” 26Tũq mơnuĩh apãt akõq tơpuôl lĩng hmỡq yơu nữn, ung nữn nao trôh pãp mơnuĩh apãt akõq lĩng pa-thơu làiq: “Pô sơga ngãq hagĩq nữn? Kơyua mơnuĩh nĩ la vual vơla Rô-ma.” 27Yơu nữn, mơnuĩh apãt lĩng, tơnĩa ung: “Iỡuq vrơi hlãq thơu, sơai iỡuq lơĩh la vual vơla Rô-ma?” Pol drơ làiq: “Iỡuq.” 28Mơnuĩh apãt akõq lĩng đơp: “Hlãq iỡuq angui karhia sa katih jĩn prõng nữn vlơi hũ gơnuar vual vơla nữn,” Pol drơ làiq: “Dòq hlãq đeh tơviãq song la vual vơla Rô-ma vloh.” 29Vloh dơgrữq mơnuĩh sơga tơnĩa khao ung tũq nữn mư tlàq luơi nao. Mơnuĩh apãt lĩng kung tatơh huaĩq dơlãp tũq thơu làiq Pol la vual vơla Rô-ma, nữn drơi vloh mãq akãq.

30Harơi hadơi, ung ưng thơu pơnuaĩq ngãq gơnĩt viãq mưng dơgrữq kaya kanõh gơtha viãq nữn mơnuĩh Ju-đa yãq jơdrãq wỡq sì Pol, yơu nữn ung wàq tơleh talơi srẽng ga ung sì vrơi gơnuar ga dơgrữq mơnuĩh pioh kaya duh talơvãt prõng sigỡuq sì avih dơgrữq tơpuôl jơnũm pơtõm wỡq. Vloh ung va Pol trỗt dòq dỡc di khrãh pơnõq nhũ.