Rô-ma 1

1Pol, halỗt mơnãq Yàc Dõc Pơ-tlah Je-su, hũ duỡt ruãh ngãq jỡc mơnuĩh gơnuar pơđar prõng, sì chẽq krơi pioh pơto akhàt pơnuaĩq siàp Yàc Pô Lơngĩq hũ, 2nĩ la pơnuaĩq siàp nữn Pitrai song hẽ grưh mưng hlơu pơyua mưng dơgrữq mơnuĩh gơnuar hwơr Pitrai hũ dơlãp Sơrãq Sơđah, 3mưng Anàq Pitrai — Pitao song pajỡc tơviãq mưng pơjẽh pơtiàt Đa-vit hũ pơweh sì gah vơnah rơlo rùp, 4Pitao hũ angãn la Anàq Yàc Pô Lơngĩq kơyua mưng gơnuar chơnuãq sì kaya hadiuq wỡq mưng kaya mơtai tui yơu Vơngãq Sơđah Sơchih — nữn la Yàc Dõc Pơ-tlah Je-su, Yàc pơnõq drơi, 5nữn gơnang mưng Pitrai, pơnõq hlãq song tồq mãq kaya anĩt sì gơnuar pơto prõng pioh pơto akhàt kaya pãc sãp mưng voh tui tơviãq di khrãh dơgrữq vual vơla lơniãu kơyua mưng angãn Pitrai, 6dơlãp vual vơla nĩ, pơnõq adơi sơai kung song hũ duỡt ruãh pioh pơweh pa Yàc Dõc Pơ-tlah Je-su. 7Srãq wãq nĩ pơyua trôh avih dơgrữq pơnõq adơi sơai dòq pãq palơi Rô-ma, dơgrữq mơnuĩh khiãng duman Yàc Pô Lơngĩq hũ, hũ duỡt ruãh ngãq jỡc vual vơla sơđah. Lakơu pơnõq adơi sơai hũ kaya anĩt sì kaya dadu lơngai mưng Yàc Pô Lơngĩq, Ama pơnõq drơi, sì mưng Yàc Dõc Pơ-tlah Je-su.

8Hlơu avih, kơyua mưng Yàc Dõc Pơ-tlah Je-su, hlãq ỡn ngai Yàc Pô Lơngĩq hlãq mưng avih dơgrữq pơnõq adơi sơai, kơyua voh tui pơnõq adơi sơai song tiẽng dơnai vãq avih dun kơyua. 9Kơyua Yàc Pô Lơngĩq la mơnuĩh ngãq chưng hlãq hũ, Pitao nữn hlãq duh vruãq mưng vơngãq hatai drơi dơlãp Pơnuaĩq Siàp Anàq Pitrai hũ, nữn la hlãq ôh padưh kaya pơto pa-sơdor mưng pơnõq adơi sơai yơu hayơu, 10dơlãp pơnuaĩq iơu lakơu hlãq gãm gãm aneh athar làiq mơyah làiq pơlih jỡc, tồq vloh dơlãp tũq nĩ hẽla tũq tơmo, hlãq ròq hũ nao wỡq kơyua mưng hatai ưng Yàc Pô Lơngĩq hũ pioh trôh rơwãc pơnõq adơi sơai. 11Kơyua hlãq chơkhãq khiãng ưng pãp pơnõq adơi sơai, pioh ga hlãq pơlih pa-mơpha ga pơnõq adơi sơai kaya lơngai gah suàt vơngãq, tồq ga adơi sơai hũ gơjãp kađữc, 12nữn mưng vruãq nữn tồq ga hlãq hũ paluơ padờp sigỡuq sì pơnõq adơi sơai, gơnang di kaya dòq dơlãp dơgrữq tãl aràc, nữn la voh tui pơnõq adơi sơai hũ gãm sì voh tui hlãq. 13Ơ pơnõq adơi sơai, hlãq ôh ưng pơnõq adơi sơai vloh ôh thơu hagĩq làiq lũ bãc hlãq song hũ hatai ngãq gơnĩt pioh nao trôh rơwãc pơnõq adơi sơai, (nữn hlãq song kađòc mãq pakỡuq tãl trôh tũq nĩ), tồq ga hlãq kung pơlih yuãq mãq kaya hajũc hlàq dơlãp pơnõq adơi sơai, kung yơu hlãq song ngãq di khrãh dơgrữq vual vơla lơniãu tơmo. 14Hlãq la mơnuĩh dòq tơwãq srẽ sì dơgrữq mơnuĩh Gơ-rec gãm sì dơgrữq vual vơla ôh iỡuq la mơnuĩh Gơ-rec, sì mơnuĩh jãc rgơi gãm sì dơgrữq mơnuĩh gơla pơtòq. 15Kơyua yơu nữn, pơweh sì hlãq, hlãq hũ hatai rơchãc lơĩh pioh kung akhàt vrơi pa-thơu Pơnuaĩq Siàp ga pơnõq adơi sơai, la dơgrữq mơnuĩh pãq plơi Rô-ma.

16Kơyua hlãq ôh mơlơu ơlah mưng Pơnuaĩq Siàp, kơyua nữn la kaya gơnuar chơnuãq Yàc Pô Lơngĩq hũ pioh dõc pơ-tlah dơgrữq mơnuĩh pãc-tui, hlơu avih la ga mơnuĩh Ju-đa, hadơi nữn la ga mơnuĩh Gơ-rec. 17Kơyua dơlãp Pơnuaĩq Siàp nữn hũ akhàt pa-tơviãq kaya tơpãq dãng Yàc Pô Lơngĩq hũ, mưng voh tui trôh voh tui, yơu hũ wãq làiq: “Mơnuĩh tơpãq dãng ròq hadiuq mưng voh tui.”

18Kơyua kaya ơnõc mơvai prõng Yàc Pô Lơngĩq hũ mưng dlòc lơngĩq hũ akhàt pa-tơviãq jơdrãq sì dơgrữq kaya ôh duh huaĩq sì dơgrữq kaya ôh tơpãq dãng anàq mơnuĩh hũ, la dơgrữq mơnuĩh mãq pakỡuq pơnuaĩq tơpãq mưng kaya ôh tơpãq dãng, 19nữn la kơyua kaya rgơi thơu mưng Yàc Pô Lơngĩq nữn song akhàt tơviãq nĩq nũn di anãq pơnõq nhũ, kơyua Yàc Pô Lơngĩq song ràc tơviãq kaya nữn ga pơnõq nhũ. 20Kơyua mưng tũq chrơng pajỡc dun kơyua, dơgrữq kaya wil tãl Pitrai hũ mơta ôh iãq bôh jỡc, nữn la gãm gơnuar chơnuãq gãm sì sẽq lơnãq gãm gãm rùp phuỗt Pitrai hũ, kung hũ thơu kơnãl nĩq nũn, dơlãp tũq thơu rgơi mưng dơgrữq kaya chrơng pajỡc Pitrai hũ, tồq ga pơnõq nhũ ôh tũq halơi kơmlah jỡc. 21Nữn la kơyua bôh làiq pơnõq nhũ kơnãl thơu Yàc Pô Lơngĩq, nữn pơnõq nhũ ôh ưng sơ-uỗt mơyòp Pitrai la Yàc Pô Lơngĩq, kung ôh ỡn ngai Pitrai. Pa-vlữq wỡq, pơnõq nhũ song tơviãq jỡc gơla pơtòq dơlãp kaya sơnơng drơi, sì hatai ôh thơu iãq kơnãl pơnõq nhũ hũ song vãq lũ kaya sồp kơnãm. 22Pơnõq nhũ angãn krơi ga drơi la jãc rgơi, nữn vloh tơviãq jỡc gơla pơtòq, 23sì pơnõq nhũ pa-sơdua kaya gơhluh Yàc Pô Lơngĩq hũ ôh tũq halơi vrũq lơmuĩq pioh duh talơvãt rùp rãp pơjẽh anàq mơnuĩh hũ gãm vrũq lơmuĩq, kung yơu dơgrữq anàq chĩp, anàq sỡq, sì pơjẽh anàq sỡq ruơi.

24Kơyua yơu nữn, Yàc Pô Lơngĩq pơjao pơnõq nhũ ga dơgrữq kaya ham khiãng tui hatai pơnõq nhũ hũ pơweh pa kaya ôh sơđah sơchih, pioh rùp phàp pơnõq nhũ kađòc ngãq tasỡuq nrãc dơlãp rùp phuỗt pơnõq nhũ, 25nữn la dơgrữq mơnuĩh song pa-sơdua pơnuaĩq tơpãq Yàc Pô Lơngĩq hũ mưng kaya vlữq lor, sì song sơ-uỗt mơyòp gãm sì duh vruãq kaya chrơng pajỡc Yàc hũ ala di Pitao Chrơng Pajỡc, la Pitao đang mang sơ-uỗt mơyòp tãl trôh gãm gãm. A-men.

26Kơyua yơu nữn, Yàc Pô Lơngĩq song tlàq luơi pơnõq nhũ ga dơgrữq kaya ham khiãng iãh tasỡuq, sì avih dơgrữq mơnuĩh kamơi pơnõq nhũ hũ song pa-sơdua kaya rơđãp đĩh dòq tơpãq tơviãq jỡc jơdrãq wỡq sì kaya rơđãp đĩh dòq ôh tơpãq, 27kung yơu nữn, mơnuĩh lakơi kung tlàq luơi kaya rơđãp đĩh dòq tơpãq sì mơnuĩh kamơi, nữn đĩh dòq sigỡuq tui hatai ham khiãng krơi, pơnõq nhũ la dơgrữq mơnuĩh lakơi ngãq kaya tasỡuq vrỡuq sigỡuq sì mơnuĩh lakơi, vloh dơvuh mãq kaya ngãq dlàiq, la kaya đang mang sì vruãq ngãq sỗq suãl pơnõq nhũ hũ.

28Kơyua mưng pơnõq nhũ ôh ưng kơnãl thơu Yàc Pô Lơngĩq, yơu nữn Yàc Pô Lơngĩq song tlàq luơi pơnõq nhũ ga kaya sơnơng sỗq suãl, pioh pơnõq nhũ ngãq dơgrữq kaya ôh kuơ hagĩq, 29kơyua pơnõq nhũ pioh rơmiãq dơgrữq kaya ôh tơpãq dãng, mơsãc mơjia, ham guãm, mỡq mãl, pơnõq nhũ vãq dơgrữq kaya kaya buah mơvai, mơnuĩh pa-mơtai mơnuĩh, mơvlah kơchah, vlữq lor, sì hatai iãh; dơgrữq pơnuaĩq đơp puaĩq vlơi, 30rơđãp đơp pơdah soh, lơmùq mơvai Yàc Pô Lơngĩq, pơ-chrìq, pơchrìq rùp, yeh drơi, jãc ngãq pơnuaĩq mơsãc; sì ôh pãc sãp ami ama, 31pơnõq nhũ gơla pơtòq, ôh ngãq tui pơnuaĩq hẽ sigỡuq, ôh hũ hatai khiãng anĩt, sì ôh hũ hatai anĩt anar. 32Nữn la dơgrữq mơnuĩh bôh làiq pơnõq nhũ song thơu pãc voh-va tơpãq dãng Yàc Pô Lơngĩq hũ, asơi ngãq sỗq dơgrữq vruãq yơu nữn la iỡuq mơtai, nữn pơnõq nhũ ôh mĩn ngãq sỗq dơgrữq kaya nữn, nữn kung ngãq ga mơnuĩh tơmo sỗq sigỡuq sì drơi.