Vruãq 20:35

1Hadơi sì tũq kaya wãc rơsì ngãq sơrôh srãh avih vloh, Pol pơđar iơu dơgrữq mơnuĩh mơgrũ trôh, paluơ padờp pơnõq nhũ vloh, ung đơp pơnuaĩq pa-lơnguãq nữn nao trôh pãq Ma-se-đoan. 2Tũq nao gãt tơpa dơgrữq phũm nữn sì angui lũ pơnuaĩq paluơ padờp pơnõq nhũ, nữn ung trôh pãq Gơ-rec. 3Hadơi sì tũq dòq pãq đỡn tlơu vlàt, tũq ung rơchãc jẽq đìq ahòq nao pãq Si-ri, nữn mơnuĩh Ju-đa duah pơnẽq ngãq iãh ga ung, yơu nữn ung ngãq gơnĩt mai wỡq nao gãt lơgar Ma-se-đoan. 4Nao sigỡuq sì ung hũ Sô-ba-te, anàq Bi-ru, mơnuĩh Be-re, A-ri-tac; Se-kun-đu, mơnuĩh Te-sa-lô-ni-ka; Gai-ut mơnuĩh Đet-bơ; Ti-mô-the; Ty-chi-kơ; sì Trô-phim, mơnuĩh A-si. 5Nữn dơgrữq mơnuĩh nữn song nao halơu pơnõq hlãq sì ãn dòq chàc pơnõq hlãq pãq Trô-ãt. 6Hadơi sì dơgrữq harơi bõc bẽn ôh hũ voh tapơi, pơnõq hlãq tơviãq đìq ahòq ia nao mưng palơi Phi-lip, sì lơmã harơi hadơi, pơnõq hlãq pãp pơnõq nhũ pãq Trô-ãt. Pơnõq hlãq dòq wỡq pãq đỡn tơjuh harơi.

7Vloh dơlãp harơi chơmrờp dơlãp sa tơjuh, tũq pơnõq hlãq pơjũm pơtõm sigỡuq pioh pẽq bẽn, Pol đơp dlài sì dơgrữq mơnuĩh pãc-tui yàc. Ung ngãq gơnĩt tơviãq nao harơi hadơi, yơu nữn ung miẽt đơp sì pơto akhàt tãl trôh khrãh mơlãp. 8Dơlãp adũq gãq gah dlòc anĩh pơnõq hlãq dòq pơjũm pơtõm hũ chôh lũ apôi đeng. 9Dòq guh jẽq gah bãc huơi, la sa aràc mơnuĩh dãm dih angãn Ơ-tich. Nhũ nữn pìq lơngãp uãn. Tũq Pol pơto akhàt suơi sa asĩt tơra wỡq, nữn mơnuĩh dãm nĩ, kơyua pìq lơngãp, song lẽq mưng adũq gah bãc tlơu dlòc trôh pãq hlùq. Tũq wơh tơgùq, nữn nhũ song mơtai vloh. 10Nữn Pol trỗt pãq ala, mãq tơngãn kuar mãq mơnuĩh dãm. Vloh ung đơp: “Juơi ngãq sawĩ sawỡn tơra, kơyua nhũ dòq hadiuq.” 11Vloh ung đìq wỡq pãq adũq dlòc sì pẽq bẽn bõc. Hadơi sì tũq đơp dlài sì pơnõq nhũ trôh sơdah mư-ờp nữn ung nao. 12Pơnõq nhũ va mơnuĩh dãm tơgùq, bôh nhũ dòq hadiuq, nữn hũ paluơ padờp lũ viãq.

13Nữn rùp phuỗt pơnõq hlãq đìq ahòq nao halơu Pol trôh pãq A-sôt, la anĩh pơnõq hlãq ngãq gơnĩt sơga tồq ròq Pol đìq ahòq. Nĩ kaya rơdãp ngãq gơnĩt rùp phuỗt ung hũ, kơyua ung song rơchãc lơĩh vruãq nao duah jơlàt nao tơkai. 14Tũq ung pãp pơnõq hlãq pãq A-sôt, pơnõq hlãq tồq ròq va ung đìq ahòq pioh nao pãq Mi-ti-len. 15Vloh pơdòq nao mưng anĩh nữn, harơi hadơi pơnõq hlãq nao gãt trôh pỗc pơlao Chi-ô. Patui harơi nữn wỡq pơnõq hlãq nao gãt pỗc pơlao Sa-môt, sì harơi hadơi nữn, pơnõq hlãq trôh pãq palơi Mi-le. 16Kơyua Pol song ngãq gơnĩt ôh weh nao pãq E-phe-sô, pioh ôh ngãq lơhiãq tũq jơ dòq wỡq pãq A-si; kơyua ung ãn sơkuãq nao pioh bôh mơta pãq Je-ru-sa-lem dơlãp harơi Adãt Harơi Lơmã Plôh, mơyah làiq pơlih jỡc.

17Yơu nữn, mưng Mi-le, ung pơđar mơnuĩh trôh pãq E-phe-sô, iơu jàq dơgrữq mơnuĩh pô tơha dơlãp sàc Pơjũm Sơđah trôh. 18Tũq pơnõq nhũ song trôh, ung đơp sì pơnõq nhũ: “Rùp phuỗt pơnõq adơi sơai thơu gơnĩt mưng harơi chơmrờp trôh A-si, hlãq song dòq sigỡuq sì pơnõq adơi sơai yơu halơi dơlãp dơgrữq tũq lơwah nữn. 19Hlãq miẽt duh vruãq Yàc mưng tũc hatai pơtìt rùp sì ia mơta, pãq khrãh dơgrữq kaya lòc dleh dlàr tơviãq trôh ga hlãq kơyua duah pơnẽq vơnrẽq mơnuĩh Ju-đa hũ. 20Pơnõq adơi sơai kung thơu hlãq ôh rơmiãq pioh kaya hagĩq hũ kuơ nữn ôh ràc akhàt ga pơnõq adơi sơai, sì yơu halơi hlãq song pơto pơđar pơnõq adơi sơai dòq pãq anĩh lũ mơnuĩh, kung yơu mưng sàc nĩ tơpa sàc tơmo, 21ngãq chưng ga pơnõq adơi sơai Ju-đa sigỡuq sì mơnuĩh Gơ-rec mưng kaya mơvai tlàq dlàiq pơweh sì Yàc Pô Lơngĩq sì mưng voh tui dơlãp Yàc Je-su pơnõq drơi. 22Tũq nĩ, kơyua mưng Yàc Vơngãq pachôh pasũl, hlãq jẽq nao pãq Je-ru-sa-lem nữn ôh thơu vruãq hagĩq ròq tơviãq trôh ga drơi pãq đỡn, 23lơniãu vruãq Yàc Vơngãq Sơđah ngãq chưng sì hlãq dơlãp dơgrữq palơi, làiq talơi sơrẽng sì kaya pađìq pơđua ãn dòq chàc hlãq. 24Nữn hlãq ôh iãq kaya hadiuq la kuơ màc pơweh sì drơi, pioh ngãq wil tãl kaya đuaĩq kơchah sì gơnuar vruãq nữn hlãq song tồq mãq mưng Yàc Je-su, mơ-àc mơyàc ngãq chưng ga Pơnuaĩq Siàp kaya anĩt Yàc Pô Lơngĩq hũ. 25Dih, hlãq thơu làiq avih dơgrữq tãl aràc pơnõq adơi sơai dơlãp mơnuĩh hlãq nao vloh akhàt vrơi pa-thơu Lơgar Yàc ròq ôh dòq mơnuĩh halơi bôh bòq mơta hlãq tơra. 26Kơyua yơu nữn, harơi nĩ hlãq ngãq chưng hlơu pơnõq adơi sơai làiq hlãq ôh hũ dlàiq mưng dơrãh avih dơgrữq tãl aràc adơi sơai hũ. 27Kơyua hlãq ôh rơmiãq pioh, nữn pơto akhàt avih ga pơnõq adơi sơai avih dơgrữq hatai ưng Yàc Pô Lơngĩq hũ. 28Pơnõq adơi sơai iỡuq rơmiãq jàc rùp drơi, sì avih gãm tơpuôl nữn Yàc Vơngãq Sơđah song pioh luơi ga pơnõq adơi sơai iãq jàc. Iỡuq gơrhia dlãc va Sàc Pơjũm Sơđah Yàc Pô Lơngĩq hũ nữn Pitrai song vlơi mưng dơrãh màc Pitrai hũ. 29Hlãq thơu làiq hadơi sì tũq hlãq nao, tơpuôl asơu sĩc mơsãc ròq rơlôh tơmã pãq khrãh pơnõq adơi sơai sì ôh iãq anĩt tơpuôl avo. 30Hlãq thơu làiq mưng pãq khrãh dơlãp pơnõq adơi sơai ròq hũ tơkìq mơnuĩh đơp dơgrữq pơnuaĩq sỗq suẽl pioh dui-va mơnuĩh mơgrũ nao tui pơnõq nhũ. 31Yơu nữn iỡuq gơrhia iãq. Iỡuq sơdor làiq dơlãp tlơu thũt, harơi mơlãp hlãq ôh padưh kaya pơto pơđar dơgrữq tãl aràc dơlãp pơnõq adơi sơai sigỡuq sì ia mơta. 32Tũq nĩ, hlãq pơjao pơnõq adơi sơai ga Yàc Pô Lơngĩq sì ga pơnuaĩq kaya anĩt Pitrai hũ, la pơnuaĩq hũ gơnuar chơnuãq pioh ngãq padỡc pơnõq adơi sơai sì vrơi ga pơnõq adơi sơai apôh hamã dơlãp dơgrữq mơnuĩh hũ sơđah sơchih. 33Hlãq ôh ham priãq, mữh hẽla ao charơpha mơnuĩh halơi. 34Rùp phuỗt pơnõq adơi sơai thơu làiq dua plàq tơngãn nĩ song duh vruãq ga kaya pioh angui hlãq hũ sì kaya pioh angui dơgrữq mơnuĩh nao sigỡuq sì hlãq hũ. 35Dơlãp avih dơgrữq vruãq, hlãq kung ngãq ga pơnõq adơi sơai bôh pơnõq drơi iỡuq ngãq ãt dleh dlàr ngãq vruãq pioh dõc iãq mơnuĩh lơduh lơmuỡn, sì kung sơdor trôh pơnuaĩq Yàc Je-su hũ, tũq rùp phuỗt Pitrai pơto làiq: ‘Vrơi hũ lơngai rlao sì tồq mãq.’”

36Hadơi sì tũq song đơp yơu nữn, ung aguãl tơ-ồq trỗt iơu lakơu sigỡuq sì avih dơgrữq pơnõq nhũ. 37Pơnõq nhũ kung sia lũ viãq, sì kuar chũm Pol. 38Kaya ngãq ga pơnõq nhũ ka-ồq ka-ãn viãq la pơnuaĩq ung đơp, làiq pơnõq nhũ ròq ôh tũq halơi pãp mơta ung tơra. Vloh pơnõq nhũ va ung nao đìq ahòq ia.