Vruãq 19

1Dơlãp Tũq A-bô-lô dòq pãq palơi Kô-rin-tô, nữn Pol song nao vãq dơgrữq phũm dòq gah ngõq, vloh trôh pãq palơi E-phe-sô, sì pãp sa tơpuôl mơnuĩh mơgrũ dòq pãq đỡn. 2Pol tơnĩa pơnõq nhũ: “Tũq pơnõq adơi sơai pãc-tui nữn pơnõq adơi sơai tồq mãq hũ Yàc Vơngãq Sơđah lơĩh?” Nữn pơnõq nhũ drơ: “Ôh, pơnõq hlãq vloh ka-ôh hmỡq đơp mưng Yàc Vơngãq Sơđah.” 3Pol tơnĩa: “Yơu nữn pơnõq adơi sơai ãt ngãq Bãp-tem halơi?” Pơnõq nhũ drơ: “Adãt bãp-tem Jãng hũ.” 4Pol ràc pa-tơviãq: “Jãng ngãq adãt Bãp-tem mưng kaya mơvai tlàq dlàiq. Ung pơto vual vơla iỡuq pãc-tui Pitao ròq trôh hadơi ung, nữn la Yàc Je-su.” 5Tũq hmỡq yơu nữn, pơnõq nhũ suẽt ãt ngãq adãt bãp-tem dơlãp angãn Yàc Je-su. 6Tũq Pol chẽq tơngãn pãq dlòc pơnõq nhũ, nữn Yàc Vơngãq Sơđah trỗt pãq dlòc pơnõq nhũ; pơnõq nhũ đơp gãm dơgrữq sãp tơmo, sì đơp gãm pơnuaĩq gơnuar hwơr. 7Karhia avih hũ pơgãp sa plôh dua aràc.

8Vloh Pol tơmã sàc pơtõm sì chãc khĩn pơto akhàt dơlãp tlơu vlàt, duah pơnuaĩq ràc tơviãq sì pơto padờp pơnõq nhũ mưng palơi lơgar Yàc Pô Lơngĩq hũ. 9Nữn tũq hũ tơkìq mơnuĩh khãc hatai sì ôh ngãq tui, pơdòq đơp iãh pơnuaĩq yàc di anãq tơpuôl lũ, Pol tlàq luơi pơnõq nhũ sì va mơnuĩh mơgrũ nao tui drơi, dơgrữq harơi duah pơnuaĩq vơyai sigỡuq pãq adũq mơgrũ Ti-ra-nu. 10Vruãq nữn miẽt patui dơlãp dua thũt, tơviãq jỡc dơgrữq mơnuĩh dòq pãq A-si, gãm mơnuĩh Ju-đa sigỡuq sì mơnuĩh Gơ-rec, kung hũ hmỡq pơnuaĩq Yàc. 11Yàc Pô Lơngĩq angui mưng tơngãn Pol ngãq dơgrữq vruãq krơi tơmo viãq, 12tơviãq jỡc vloh charơnãq sì pơcha song tèc trôh rùp Pol va trôh ga mơnuĩh ruãq nữn ruãq hũ pakhơĩh, dòq vơngãq tasỡuq nrãc nữn kung tơviãq tlah mưng pơnõq nhũ. 13Nữn kung hũ dơgrữq pôgrũ pơtiãuq kamlai mơnuĩh Ju-đa nao dơgrữq phũm nữn. Pơnõq nhũ iơu lakơu angãn Yàc Je-su pioh pasồq pakhơĩh dơgrữq mơnuĩh kađòc kamlai ãp, làiq: “Kơyua mưng angãn Je-su nữn Pol pơto akhàt, kơu pơđar ga hã iỡuq tơviãq tlah.” 14(Hũ hadùp aràc pơweh mưng sàc anĩh Se-va, sa aràc mơnuĩh gơnuar pioh kaya duh talơvãt prõng mơnuĩh Ju-đa, tơjuh aràc anàq lakơi ung ãn ngãq vruãq nữn.) 15Nữn sa kamlai mơsãc drơ wỡq sì pơnõq nhũ, làiq: “Je-su nữn kơu thơu, Pol kơu kung thơu; nữn pơnõq hã la mơnuĩh halơi?” 16Vloh mơnuĩh kađòc kamlai mơsãc ãp nữn plõc tơgùq vrùq tơmã dơgrữq pôgrũ pơtiãuq kamlai nữn, hũ gơnuar apãt kõq vloh poh atòc pơnõq nhũ. Pơnõq nhũ iỡuq đuaĩq dỡuq tlah mưng sàc nữn, dòq kalôh sì vãq kaya halôh dơgrẽh. 17Avih dơgrữq vual vơla dòq hadiuq pãq E-phe-sô, gãm mơnuĩh Ju-đa sigỡuq sì mơnuĩh Gơ-rec, kung thơu vruãq nĩ. Avih tãl aràc pơnõq nhũ tatơh huaĩq sì angãn Yàc Je-su hũ sơuỗt mơyòp. 18Lơniãu nữn, kung hũ lũ mơnuĩh pãc-tui yàc, trôh akhàt dlàiq dơgrữq vruãq mơsãc nữn pơnõq nhũ song ngãq. 19Lũ mơnuĩh ngãq vruãq grũ pajơu pơtõm avih sơrãq vơ-ar drơi hũ vloh chôh pãq anãq dơgrữq mơnuĩh. Aràc karhia kaya kuơ màc sơrãq vơ-ar nữn la lơmã plôh rơvơu jĩn. 20Yơu nữn, gơnang mưng gơnuar chơnuãq Yàc hũ, nữn pơnuaĩq Yàc akhàt tơviãq savĩq prãn khãc.

21Hadơi sì tũq wil tãl dơgrữq vruãq nĩ, Pol ngãq gơnĩt dơlãp Vơngãq Sơđah, nao gãt tơpa phũm Ma-se-đoan sì A-chai dơlãp jơlàt nao trôh pãq Je-ru-sa-lem; ung đơp: “Trôh pãq đỡn vloh, drơi kung iỡuq nao rơwãc Rô-ma wỡq.” 22Vloh Pol pơđar dua aràc dơlãp dơgrữq mơnuĩh dõc drơi la Ti-mô-the sì E-rat nao pãq Ma-se-đoan. Nữn rùp phuỗt ung nữn dòq wỡq A-si pơgãp hadùp harơi wỡq.

23Pơgãp dơlãp sa tũq lơwah, pãq E-phe-sô hũ sa kaya ngãq sơrôh sơrãh prõng đơp trôh pơnuaĩq Yàc. 24Kơyua hũ mơnuĩh khưh rgơi ngãq priãq dih angãn la Đe-me-triu, vruãq lơđãp ngãq rùp rãp kamơi At-te-mit mưng priãq, va lũ vruãq ngãq ga dơgrữq mơnuĩh rgơi ngãq hũ ngãq. 25Yơu nữn, ung nữn iơu pơtõm dơgrữq mơnuĩh rgơi ngãq vruãq nĩ sì đơp: “Pa-thơu adơi sơai, adơi sơai thơu làiq pơnõq drơi duah hũ lũ jĩn la gơnang mưng vruãq kãq pa-vlơi nĩ. 26Adơi sơai kung bôh sì hmỡq làiq, ôh iỡuq mĩn pãq E-phe-sô, nữn kung yơu vãq avih dơgrữq anĩh A-si, angãn Pol nĩ song pơto padờp song ngãq lũ mơnuĩh dơvlữq hatai. Nhũ đơp làiq dơgrữq kaya mưng tơngãn anàq mơnuĩh ngãq tơviãq ôh iỡuq la yàc vơngãq halơi ôh. 27Yơu nữn ôh iỡuq du vruãq ngãq pơnõq drơi ròq kađòc tiẽng dơnai iãh, nữn anĩh vơ-mũng kakôh talơvãt rùp rãp kamơi At-te-mit mơ-àc mơyàc pơnõq drơi hũ kung pơlih kađòc iãq ôh ôh srãp. Yơu nữn la pitao nữn vãq avih A-si sì dun kơyua kakôh talơvãt jẽq ngãq lơhiãq kaya mơ-àc mơyàc drơi hũ.” 28Tũq hmỡq yơu nữn, pơnõq nhũ tơgùq ơnõc sì driãu prõng: “Mơ-àc mơyàc viãq rùp rãp kamơi At-te-mit mơnuĩh E-phe-sô hũ!” 29Vloh avih palơi ngãq sơrôh srãh sì vual vơla mơrũp gỡuq va gỡuq nao trôh sàc tãm-ya. Pơnõq nhũ mãq dơgrữq mơnuĩh ngãq vruãq sigỡuq sì Pol hũ la Gai-ut sì A-ri-tac, mơnuĩh Ma-se-đoan. 30Pol ưng pa-tơviãq mơta pãq anãq vual vơla, nữn dơgrữq mơnuĩh mơgrũ chơkhãq ung wỡq. 31Lơniãu nữn, hũ tơkìq pô apãt akõq char A-si la ban mơyơu Pol hũ kung hakơi pơnuaĩq pơyua ga ung, chãc khĩn lakơu ung juơi nao tơmã dơlãp anĩh sàc tãm-ya. 32Mơnuĩh nữn driãu yơu nĩ, mơnuĩh vloh driãu yơu dih kơyua dơlãp tơpuôl lũ dòq ngãq salũng sơlãng. Vơnah hũ lũ pơnõq nhũ vloh kung ôh thơu pơjũm pơtõm gỡuq kơyua mưng kanõh gơtha hagĩq. 33Vloh mưng dơlãp tơpuôl lũ pa-tơviãq mơta A-lec-san-đơ, kađòc mơnuĩh Ju-đa katũc tơviãq. A-lec-san-đơ angui tơngãn ngãq krung, ưng duah pơnuaĩq đơp nĩq nũn sì vual vơla. 34Nữn tũq thơu nhũ nữn la mơnuĩh Ju-đa, nữn avih dơgrữq tãl aràc pơnõq nhũ sa hatai priãu tơgùq. Dơlãp dua tũq jơ, pơnõq nhũ driãu prõng: “Mơ-àc mơyàc la rùp rãp kamơi At-te-mit mơnuĩh E-phe-sô hũ.” 35Tũq mơnuĩh gơnuar wãq palơi prõng song ngãq ga tơpuôl lũ dòq kađỡc vloh, ung nữn đơp:

“Ơ vual vơla palơi E-phe-sô, mơnuĩh halơi nữn ôh thơu palơi E-phe-sô la mơnuĩh iãq khiãq vơ-mũng At-te-mit prõng màc sì rùp rãp mưng dlòc lơngĩq lẽq trỗt nhũ hũ? 36Yơu nữn, kơyua nĩ la dơgrữq kaya ôh tũq halơi kơmlah tlàq jỡc, yơu nữn dơgrữq tãl aràc iỡuq dòq kađỡc sì juơi ngãq sơkuãq kaya hagĩq. 37Kơyua adơi sơai song katũc va dơgrữq mơnuĩh nĩ trôh pãq anĩh chahrơna dơlãp tũq pơnõq nhũ ôh iỡuq la mơnuĩh tlẽq sơwah sàc duh talơvãt, kung ôh iỡuq la mơnuĩh đơp sơvĩl rùp rãp kamơi pơnõq drơi ôh. 38Yơu nữn, mơyah làiq viãq Đe-me-triu sì dơgrữq mơnuĩh rgơi ngãq nao sigỡuq sì ung ưng yãq vãq asơi, nữn jơnũm chahrơna miẽt pơh luơi sì song hũ dơgrữq pô apãt akõq char. Miẽt luơi ga pơnõq nhũ yãq vãq gỡuq. 39Dòq mơyah làiq adơi sơai ưng ngãq gơnĩt dơgrữq vruãq tơmo, nữn iỡuq luơi ga tơpuôl jơnũm ngãq gơnĩt yơu dơgrữq harơi. 40Kơyua viãq, pơnõq drơi pơlih kađòc ngãq dlàiq ngãq sơrôh srãh kơyua vruãq tơviãq trôh harơi nĩ. Pơnõq drơi kung ôh tũq halơi pơlih duah kaya kanõh gơtha halơi pioh ràc pa-tơviãq voh gơtha ga wãc rơsì kaya ngãq salũng sơlãng nĩ.” 41Hadơi sì tũq đơp yơu nữn vloh, ung vrơi ga tơpuôl dòq pơtõm gỡuq tơviãq nao wỡq.