Vruãq 18

1Hadơi dơgrữq vruãq nữn, Pol luơi A-then nao trôh pãq palơi Kô-rin-tô. 2Pãq đỡn, ung pãp sa aràc mơnuĩh Ju-đa angãn la A-qui-la, mơnuĩh lơgar Bông, vơhrơu sigỡuq sì sơdiuq la Be-rit-sin mưng Y-ta-li trôh, kơyua Kơ-lôt song vrơi gơnuar ga avih dơgrữq mơnuĩh Ju-đa iỡuq tơviãq nao tlah mưng Rô-ma. Pol trôh rơwãc pơnõq nhũ, 3sì kơyua ung ngãq sa vruãq drưh yơu pơnõq nhũ, nữn la vruãq mơnham tlam, yơu nữn ung dòq wỡq ngãq vruãq sigỡuq. 4Yơu nữn, miẽt dơgrữq harơi Sa-bat, Pol kung pơrjai dơlãp sàc pơtõm. Ung paluơ padờp pơto pơđar iỡuq hatai mơnuĩh Ju-đa gãm sì mơnuĩh Gơ-rec. 5Nữn tũq Si-la sì Ti-mô-the mưng Ma-se-đoan trỗt, Pol pioh avih prãn pơto akhàt pơnuaĩq Yàc, avih hatai lơnang lơnai ngãq chưng ga mơnuĩh Ju-đa làiq Je-su la Yàc Dõc Pơ-tlah. 6Tũq mơnuĩh Ju-đa jơdrãq sì siẽq siẽl tlao vlơi ung, Pol tơtôh ao sì đơp sì pơnõq nhũ: “Lakơu dơrãh pơnõq ung tôh wỡq pãq dlòc akõq pơnõq ung; dòq hlãq ôh hũ dlàiq. Mưng tũq nĩ wỡq sì hadơi, hlãq ròq nao trôh sì dơgrữq vual vơla lơniãu.” 7Vloh ung tơviãq mưng anĩh nữn nao trôh sàc Ti-ti-u Jut-tu, sa aràc mơnuĩh duh talơvãt Yàc Pô Lơngĩq. Sàc mơnuĩh nĩ dòq jẽq phia sàc pơtõm. 8Kơ-rit-bu, pô apãt akõq sàc pơtõm, sigỡuq sì dơgrữq mơnuĩh dơlãp sàc kung song pãc-tui Yàc. Lũ mơnuĩh Kô-rin-tô hmỡq pơnuaĩq pơto akhàt, kung pãc-tui sì ãt adãt bãp-tem. 9Dơlãp mơlãp, Yàc đơp sì Pol dơlãp sa kaya pabôh, làiq: “Juơi huaĩq, nữn iỡuq miẽt đơp sì juơi dòq suà lìt. 10Kơyua kơu dòq sigỡuq sì anàq, sì ròq ôh mơnuĩh halơi mãq tơngãn ngãq iãh anàq kơyua kơu hũ lũ mơnuĩh dơlãp palơi nĩ.” 11Yơu nữn, Pol dòq wỡq pãq đỡn sa thũt nãm vlàt, pơto pơnuaĩq Yàc Pô Lơngĩq dòq pãq khrãh pơnõq nhũ.

12Nữn tũq Ga-li-ôn tơgùq ngãq pô apãt akõq prõng char A-chai, nữn mơnuĩh Ju-đa sa hatai sigỡuq tơgùq dỡc jơdrãq wỡq Pol sì va ung tơviãq pãq anãq anĩh chahrơna. 13Pơnõq nhũ yãq: “Mơnuĩh nĩ pachôh pasũl vual vơla duh talơvãt Yàc Pô Lơngĩq suẽl voh-va.” 14Nữn tũq Pol sơga pơh mơvah, nữn Ga-li-ôn đơp sì mơnuĩh Ju-đa: “Ơ mơnuĩh Ju-đa dih, mơyah làiq nĩ viãq la sa kaya mưng vruãq ngãq sỗq suẽl hẽla dlàiq mơsãc, nữn ãt-ỡl ga pơnõq hã kung iỡuq, 15kơyua mơyah làiq nĩ la dơgrữq kaya dõc jơga mưng pơnuaĩq đơp, pa-angãn sì voh-va krơi pơnõq hã hũ, yơu nữn pơnõq hã rơchãc ngãq krơi drơi. Hlãq ôh ưng chahrơna dơgrữq vruãq yơu nĩ.” 16Yơu nữn, Ga-li-ôn lakơu pơđar pơnõq nhũ tơviãq tlah mưng anĩh chahrơna. 17Yơu nữn avih dơgrữq tơpuôl nhũ mãq Sôt-then, pô apãt sàc pơtõm, vloh poh pờc ung pãq anãq anĩh chahrơna. Nữn Ga-li-ôn ôh iãq trôh vruãq nữn.

18Hadơi sì tũq dòq pãq đỡn pơtãl lũ harơi tơra, Pol pa-lơnguãq pơnõq adơi sơai, vloh đìq ahòq nao trôh Si-ri sigỡuq sì Be-rit-sin sì A-qui-la. Kơyua song hẽ pa-guỡt, yơu nữn Pol kuah akõq pãq Sen-kơ-re. 19Tũq pơnõq nhũ trôh E-phe-sô, Pol luơi Be-rit-sin sì A-qui-la dòq pãq đỡn, dòq rùp phuỗt ung nữn tơmã dơlãp sàc pơtõm pơrjai sì mơnuĩh Ju-đa. 20Tũq pơnõq nhũ lakơu Pol dòq wỡq, nữn ung kơmlah. 21Nữn tũq pa-lơnguãq pơnõq nhũ, ung đơp: “Hlãq ròq gơlàiq mai wỡq sì pơnõq adơi sơai mơyah làiq Yàc Pô Lơngĩq ưng.” Vloh ung đìq ahòq ia tơviãq tlah mưng E-phe-sô.

22Tũq song tơgùq pãq gah Se-sa-re, ung nao tơgùq chuãq rơwãc Sàc Pơjũm Sơđah Je-ru-sa-lem, vloh trỗt nao pãq An-ti-ôt. 23Hadơi sì tũq dòq pãq anĩh nữn tơkìq harơi, Pol pơdòq nao gãt dơgrữq phũm Ga-la-ti sì Phi-ri-gi, paluơ padờp avih dơgrữq mơnuĩh mơgrũ.

24Tũq nữn, hũ sa aràc mơnuĩh Ju-đa angãn la A-bô-lô, đeh pãq palơi A-lec-san-đơ-ri-a, trôh E-phe-sô. Ung đơp dlài dơrlàc sì pãc-thơu Sơrãq Sơđah. 25A-bô-lô song hũ mơgrũ đõm dơlãp pơnuaĩq Yàc hũ. Mưng tũc hatai tluỡiq gơhuar, ung đơp sì pơto akhàt iỡuq yơu dơgrữq kaya đơp tãl trôh Yàc Je-su nữn ung mĩn thơu adãt Bãp-tem Jãng soh. 26A-bô-lô pơdòq kaya pơto akhàt savĩq chãc khĩn dơlãp sàc pơtõm. Bôh làiq yơu nữn, tũq Be-rit-sin sì A-qui-la hmỡq ung pơto, pơnõq nhũ va ung wỡq ràc pa-tơviãq voh gơtha ga ung pãc iỡuq mưng pơnuaĩq Yàc Pô Lơngĩq hũ. 27Tũq ung ưng nao gãt A-chai, nữn pơnõq adơi sơai paluơ padờp ung sì wãq sơrãq pơyua hakơi ga dơgrữq mơnuĩh mơgrũ pãq A-chai. Tũq ung trôh, ung song gơnang mưng kaya anĩt Yàc dõc iãq lũ viãq ga pơnõq adơi sơai pãc-tui yàc. 28A-bô-lô prãn khãc duah pơnuaĩq đơp jơdrãq sì mơnuĩh Ju-đa mưng kaya prơjai di khrãh palơi lơgar, angui Sơrãq Sơđah ràc pa-tơviãq làiq Je-su la Yàc Dõc Pơ-tlah.