Vruãq 15

1Tũq nữn, hũ tơkìq mơnuĩh mưng Ju-đe trỗt An-ti-ôt, pơto adơi sơai làiq: “Mơyah adơi sơai ôh ãt sìq kalìq tui adãt ơdia Môi-se, nữn adơi sơai ôh tũq halơi hũ kaya dõc pơ-tlah.” 2Kaya nĩ ngãq ga Pol sì Ba-na-ba gơrlah pơnuaĩq sì prơjai viãq vơyai sì pơnõq nhũ. Yơu nữn adơi sơai pồq padỡc Pol sì Ba-na-ba sigỡuq sì tơkìq mơnuĩh tơmo dơlãp pơnõq nhũ tơgùq nao pãq Je-ru-sa-lem lakơu tơnĩa sì dơgrữq mơnuĩh gơnuar pơđar sì mơnuĩh pô tơha mưng vruãq nĩ. 3Yơu nữn, dơgrữq mơnuĩh hũ Sàc Pơjũm Sơđah pơđar nao, pơnõq nhũ gãt tơpa Phe-ni-si gãm sì Sa-ma-ri, akhàt pa-thơu vruãq vual vơla lơniãu pãc-tui Yàc. Pơnõq nhũ ngãq ga avih dơgrữq pơnõq adơi sơai uỗt sơh viãq. 4Tũq trôh pãq Je-ru-sa-lem, pơnõq nhũ hũ Sàc Pơjũm Sơđah, hũ dơgrữq mơnuĩh gơnuar pơđar sì mơnuĩh pô tơha tồq ròq, vloh pơnõq nhũ akhàt pa-thơu avih dơgrữq vruãq Yàc Pô Lơngĩq song ngãq sigỡuq sì drơi. 5Nữn hũ hadùp aràc mơnuĩh song pãc-tui pơweh gah Pha-ri-si, tơgùq dỡc, đơp: “Nữn iỡuq ngãq ơdãt sìq kalìq ga pơnõq nhũ sì pơto pơđar pơnõq nhũ iỡuq rơmiãq pioh voh-va Môi-se.” 6Yơu nữn, dơgrữq mơnuĩh gơnuar pơđar sì dơgrữq pô tơha pơtõm wỡq pioh iãq pơwih dơgrữq vruãq nĩ. 7Hadơi sì tũq pơrjai sigỡuq lũ vloh, Pier tơgùq dỡc đơp sì pơnõq nhũ:

“Ơ adơi sơai, adơi sơai kung thơu làiq mưng sa lơwah tũq nữn, Yàc Pô Lơngĩq song duỡt ruãh hlãq dơlãp pơnõq adơi sơai, pioh kơyua mưng mơvah chơbuai hlãq nữn dơgrữq vual vơla lơniãu hũ hmỡq Pơnuaĩq Siàp sì pãc-tui. 8Yàc Pô Lơngĩq, la Pitao thơu dơlãp tũc hatai, ngãq chưng ga pơnõq nhũ, vrơi Yàc Vơngãq Sơđah ga pơnõq nhũ, yơu Pitrai song ngãq ga pơnõq drơi; 9sì Pitrai kung ôh pa-chơlah krơi pơnõq drơi sì pơnõq nhũ, tũq ngãq ga hatai pơnõq nhũ hũ sơđah sơchih kơyua mưng voh tui. 10Yơu nữn kơyua hayơu tũq nĩ adơi sơai vloh lòc Yàc Pô Lơngĩq, ưng pa-tơruãq tơma tơkuai dơgrữq mơnuĩh mơgrũ sa voh yỡu nữn ung kõq pơnõq drơi gãm sì pơnõq drơi kung ôh tũq halơi gơlãp jỡc? 11Pa-vlữq wỡq, pơnõq drơi pãc-tui pioh hũ dõc pơ-tlah kơyua mưng kaya anĩt Yàc Je-su, kung yơu pơnõq nhũ mĩn.”

12Vloh avih sa tơpuôl jơnũm kung dòq suà lìt hmỡq Ba-na-ba gãm sì Pol akhàt wỡq dơgrữq vruãq krơi tơmo nữn Yàc Pô Lơngĩq song ngãq tơviãq pãq khrãh dơgrữq vual vơla lơniãu angui mưng pơnõq nhũ. 13Tũq pơnõq nhũ đơp vloh, Ja-kơ song drơ, làiq:

“Ơ adơi sơai, lakơu hmỡq hlãq nĩ. 14Si-môn song akhàt wỡq yơu halơi Yàc Pô Lơngĩq hlơu avih song anĩt duman dõc suãq dơgrữq vual vơla lơniãu, pioh mưng nữn duỡt ruãh tơviãq sa vual vơla pioh ga angãn Pitrai. 15Pơnuaĩq dơgrữq mơnuĩh gơnuar hwơr kung drưh iỡuq yơu kaya nĩ, yơu hũ wãq:

16‘Hadơi dơgrữq vruãq nữn, Kơu ròq mai wỡq,

vloh Kơu ròq padỡc wỡq sàc tlam Đa-vit hũ, la tlam song ãt jơlưh trỗt;

Kơu ròq padỡc wỡq kaya tơyah lơhiãq nhũ hũ sì padỡc pơsiàp nhũ,

17pioh dơgrữq mơnuĩh dòq wỡq vloh duah iãq Yàc,

gãm sì avih dơgrữq mơnuĩh vual vơla lơniãu hũ iơu lakơu angãn mưng angãn Kơu,

nữn la pơnuaĩq đơp Yàc hũ, Pitao song ngãq dơgrữq vruãq nĩ, 18gãm song hũ thơu trôh mưng rài sơđãq.’

19Kơyua yơu nữn, tui hatai hlãq, pơnõq drơi ôh iỡuq ngãq pa-sơwanh ga dơgrữq mơnuĩh lơniãu gơlàiq mai wỡq pãq Yàc Pô Lơngĩq. 20Nữn pơnõq hlãq ròq wãq sơrãq pơyua hakơi pơnõq nhũ iỡuq pleh kaya tasỡuq nrãc rùp rãp hũ, kaya arĩh athãm, rơlo anàq asỡq mơtai sangỡq yuà sì dơrãh. 21Kơyua voh-va Môi-se hũ dơlãp dơgrữq palơi mưng dơgrữq rài hlơu, aràc pơto akhàt sì pơpoh voh-va nữn dơlãp sàc pơtõm dơgrữq harơi Sa-bat.”

22Vloh dơgrữq mơnuĩh gơnuar pơđar sì mơnuĩh pô tơha, sigỡuq sì gãm avih sàc Pơjũm Sơđah, iỡuq pơđar dơgrữq mơnuĩh hũ duỡt ruãh dơlãp pơnõq nhũ pioh nao trôh An-ti-ôt sigỡuq sì Por gãm sì Ba-na-ba — Yơu nữn, pơnõq nhũ pơđar Ju-đa iơu angãn la Ba-sa-ba sì Si-la, pơweh sì gah mơnuĩh apãt akõq dơlãp adơi sơai — 23Pơnõq nhũ wãq sơrãq nĩ gơnang mưng tơngãn pơnõq nhũ pơyua pơjao: “Dơgrữq mơnuĩh gơnuar pơđar, mơnuĩh pô tơha sì dơgrữq adơi sơai, pơyua ga dơgrữq mơnuĩh vual vơla lơniãu pãc-tui yàc, nữn la dơgrữq adơi sơai dòq pãq palơi An-ti-ôt, Si-ri gãm sì Si-li-si. Lakơu vrơi ga pơnõq adơi sơai dơgrữq kaya dadu lơngai! 24Pơnõq hlãq hmỡq đơp hũ dơgrữq mơnuĩh ôh mưng pơnõq hlãq pơđar nao song ngãq ga pơnõq adơi sơai dòq ôh sũp mưng dơgrữq pơnuaĩq pơto pơđar ngãq hatai adơi sơai sawĩ sơwãn. 25Hlơu sì vruãq nữn, pơnõq hlãq iãq iỡuq pơtõm gỡuq wỡq pioh duỡt ruãh tơviãq dơgrữq mơnuĩh tồq pơđar nao trôh anĩh pơnõq adơi sơai sigỡuq sì sơai Ba-na-ba sì Pol la mơnuĩh anĩt duman pơnõq drơi hũ, 26dơgrữq mơnuĩh song tlàq kaya hadiuq drơi kơyua mưng angãn Yàc pơnõq drơi la Yàc Dõc Pơ-tlah Je-su. 27Yơu nữn, pơnõq hlãq pơđar Ju-đa sì Si-la, pioh pơnõq nhũ kung ròq đơp ga pơnõq adơi sơai gơnĩt dơgrữq vruãq nĩ mưng pơnuaĩq pơnõq nhũ hũ. 28Kơyua Yàc Vơngãq Sơđah sì pơnõq hlãq song bôh ôh pơtãl kaya hagĩq pioh chẽq pãq dlòc pơnõq adơi sơai kaya anòng tơrãq halơi tơmo lơniãu dơgrữq kaya iỡuq ngãq hadơi nĩ; 29nữn la pơnõq adơi sơai iỡuq pleh dơgrữq kaya padỡc kakôh rùp rãp, dơrãh, anàq sỡq mơtai sangỡq, sì kaya arĩh athãm. Pơnõq adơi sơai rơmiãq jàc siàp rùp drơi tlah mưng dơgrữq kaya nữn. Hlãq lakơu chuãq, iỡuq dòq lơnguãq yơh, lakơu ga pơnõq adơi sơai hũ prãn khãc.”

30Yơu nữn, hadơi sì tũq hũ va nao pa-lơnguãq, pơnõq nhũ trỗt nao An-ti-ôt; sì vloh pơnõq nhũ pơjũm pơtõm gỡuq wỡq sì pơjao vrơi sơrãq pơyua. 31Tũq song pơpoh sơrãq pơyua vloh, avih tãl aràc pơnõq nhũ uỗt sơh kơyua hũ paluơ padờp. 32Gãm Ju-đa sì Si-la, nữn kung la dơgrữq mơnuĩh gơnuar hwơr, angui lũ pơnuaĩq paluơ padờp pơnõq adơi sơai sì ngãq ga pơnõq nhũ prãn khãc. 33Hadơi sì tũq song dòq pãq đỡn sa lơwah harơi, pơnõq nhũ hũ pơnõq adơi sơai va pa-lơnguãq mai wỡq sì dơgrữq mơnuĩh pơđar drơi nao savĩq dadu lơngai. 34(Nữn Si-la iãq, iỡuq ngãq gơnĩt dòq wỡq pãq đỡn.) 35Dòq Pol sì Ba-na-ba dòq wỡq pãq An-ti-ôt, pơto pơđar sì akhàt vrơi pa-thơu pơnuaĩq Yàc (sigỡuq sì lũ mơnuĩh tơmo).

36Sa lơwah tũq hadơi, Pol đơp sì Ba-na-ba: “Tũq nĩ pơnõq drơi iỡuq gơlàiq nao wỡq chuãq rơwãc hũ tơkìq pơnõq adơi sơai pãq dơgrữq palơi nữn pơnõq drơi song akhàt payơr pơnuaĩq Yàc, pioh thơu dơgrữq vruãq pơnõq nhũ hũ la yơu halơi.” 37Ba-na-ba kung ưng va tui Jãng, hũ iơu angãn la Mak. 38Nữn Pol iãq va tui Mak ôh jỡc ôh, kơyua nhũ song tlàq luơi pơnõq nhũ dòq pãq Bam-phi-ly, ôh nao wỡq sigỡuq sì pơnõq nhũ pioh duh vruãq sigỡuq. 39Vloh hũ kaya prơjai gỡuq lũ viãq, tơviãq jỡc pơnõq nhũ pa-chơlah gỡuq. Ba-na-ba va Mak nao tui drơi sì đìq ahòq nao trôh Chip-rơ. 40Dòq Pol nữn duỡt ruãh Si-la sì vloh tơgùq nao, hadơi sì tũq hũ pơnõq adơi sơai pồq pơjao ga kaya anĩt Yàc. 41Ung nao dơgrữq char Si-ri sì Si-li-si, padỡc pơsiàp sì ngãq prãn khãc dơgrữq Sàc Pơjũm Sơđah.