Vruãq 14

1Pãq Y-kô-ni, Pol sì Ba-na-ba tơmã sigỡuq dơlãp sàc pơtõm mơnuĩh Ju-đa hũ, pơto akhàt, savĩq tơviãq jỡc hũ lũ mơnuĩh viãq, mơnuĩh ju-đa gãm sì mơnuĩh Gơ-rec, pãc-tui Yàc. 2Nữn dơgrữq mơnuĩh Ju-đa ôh pãc-tui nữn pachôh pasũl dlò sơnơng mơnuĩh lơniãu sì ngãq ga pơnõq nhũ tơviãq jỡc hatai ngãq iãh sì pơnõq adơi sơai. 3Yơu nữn, pơnõq nhũ dòq pãq đỡn sa tũq lơwah suơi, chãc khĩn dõc jơga pơnuaĩq Yàc, dơlãp tũq Yàc ngãq chưng ga pơnuaĩq pơto akhàt kaya anĩt Pitrai hũ mưng dơgrữq nỡm krơi sì vruãq krơi tơmo hũ ngãq tơviãq kơyua mưng tơngãn Pol sì Ba-na-ba. 4Nữn hũ kaya pa-chơlah tơpuôl di khrãh vual vơla dòq dơlãp palơi; hũ tơkìq mơnuĩh tui gah tơpuôl Ju-đa, hũ tơkìq mơnuĩh tơmo dòq dỡc gah dơgrữq mơnuĩh gơnuar pơđar. 5Tũq gãm avih dơgrữq mơnuĩh lơniãu sì mơnuĩh Ju-đa sigỡuq sì dơgrữq mơnuĩh apãt akõq duah pơnẽq ngãq juãq jơlì sì prah patơu Pol sì Ba-na-ba, 6dua aràc nhũ thơu pơnẽq vơyai nữn, yơu nữn đuaĩq pleh nao trôh dơgrữq palơi Li-kao-ni, Lit-trơ, Đet-bơ, sì phũm tòp dar, 7vloh patui wỡq kaya pơto akhàt Pơnuaĩq Siàp pãq đỡn.

8Pãq Lit-trơ hũ sa aràc sơai dĩh, ãn dòq guh kơyua tơkai kađòc kuẽ kuẽt mưng tũq dòq dlãp tũc ami, nữn nhũ ka-ôh tũq halơi yàp nao jỡc. 9Nhũ dòq guh hmỡq Pol pơto akhàt. Pol iãq gơnĩt pãq nhũ sì bôh nhũ hũ voh tui pioh hũ pasồq pakhơĩh. 10Yơu nữn, ung đơp prõng sãp sì nhũ: “Iỡuq tơgùq dữc mưng dua bẽq tơkai drơi”, nhũ hẽq tơgùq sì yàp nao. 11Tũq vual vơla iãq bôh kaya Pol song ngãq, pơnõq nhũ pơh sãp đơp mưng pơnuaĩq đơp Li-kao-ni, làiq: “Dơgrữq vơngãq yàc song trỗt rơwãc pơnõq drơi dơlãp sẽq rùp anàq mơnuĩh.” 12Pơnõq nhũ iơu angãn Ba-na-ba la yàc “Ju-bi-te,” dòq Pol la yàc “Met-ku-rơ,” kơyua Pol la mơnuĩh va akõq dơlãp pơnuaĩq pơto akhàt. 13Mơnuĩh gơnuar pioh kaya duh talơvãt yàc Ju-bi-te, sì hũ vơ-mũng kakôh talơvãt dòq gah lơniãu palơi, hadơi sì tũq va lơmo sì kơrwàc vơngà trôh pãq sơvòq bãc palơi; ung nữn sì vual vơla ưng padỡc kaya duh talơvãt. 14Nữn tũq dơgrữq mơnuĩh gơnuar pơđar, nữn la Ba-na-ba sì Pol thơu kaya nữn, pơnõq nhũ hẽt ao drơi sì đuaĩq tơmã pãq anĩh tơpuôl lũ, vloh driãu prõng 15làiq: “Nĩ, ơ adơi sơai, hayơu vloh ngãq yơu nữn? Pơnõq hlãq kung la anàq mơnuĩh hũ tũc hatai yơu adơi sơai mĩn. Pơnõq hlãq akhàt vrơi pa-thơu Pơnuaĩq Siàp ga adơi sơai, làiq adơi sơai iỡuq tlàq luơi dơgrữq kaya ôh kuơ nĩ pioh gơlàiq mai wỡq pãq Yàc Pô Lơngĩq gãm hadiuq, la Pitao chrơng pajỡc lơngĩq, tơnãh sì ia tơsìq, sigỡuq sì dơgrữq kaya dơlãp đỡn. 16Dơlãp dơgrữq rài hlơu, Pitrai song pioh ga dơgrữq vual vơla bõc dòq tui yơu hatai krơi drơi hũ. 17Bôh làiq yơu nữn, Pitrai ôh luơi ga mơnuĩh halơi siẽuq kaya ngãq chưng mưng Pitrai, tũq Pitrai miẽt vrơi lơngai, vrơi hajàt mưng lơngĩq sì vlàt yuãq pơtuah pơtoai ga adơi sơai, ngãq ga hatai adơi sơai hũ tarơi sì kaya bõc gãm sì kaya sơh sơr.” 18Vloh đơp yơu nữn, nữn Pol sì Ba-na-ba kung mĩn pakỡuq jỡc vual vơla padỡc kaya duh talơvãt ga drơi.

19Bôh làiq yơu nữn, hũ tơkìq mơnuĩh Ju-đa mưng An-ti-ôt sì palơi Y-kô-ni trôh pachôh vual vơla. Yơu nữn, pơnõq nhũ prah patơu Pol vloh katũc ung tơviãq lơniãu palơi kơyua sơnơng ung song mơtai. 20Nữn dơlãp tũq dơgrữq mơnuĩh mơgrũ ãn pơtõm tòp dar ung, nữn ung phuah tơgùq dỡc sì nao tơmã dơlãp palơi. Harơi hadơi, ung sì Ba-na-ba nao pãq Đet-bơ. 21Hadơi sì tũq song akhàt vrơi pa-thơu Pơnuaĩq Siàp pãq palơi nữn sì hũ lũ mơnuĩh ngãq jỡc mơnuĩh mơgrũ, pơnõq nhũ gơlàiq mai wỡq Lit-trơ, vloh nao pãq Y-kô-ni, sì An-ti-ôt. 22Pơnõq nhũ patui ngãq gơjãp hatai dơgrữq mơnuĩh mơgrũ sì paluơ padờq pơnõq nhũ gơjãp gơnĩt dơlãp voh tui, làiq: “Pơnõq drơi iỡuq tơpa gãt lũ kaya dleh dlàr hlơu sì tũq tơmã dơlãp palơi lơgar Yàc Pô Lơngĩq hũ.” 23Hadơi sì tũq pồq padỡc wỡq dơgrữq pô tơha pioh chuãq rơwãc mơnuĩh pãc-tui pãq dơgrữq sàc Pơjũm Sơđah sì ãt bõc iơu lakơu, pơnõq nhũ pơjao dơgrữq mơnuĩh nĩ ga Yàc, la Pitao drơi song pãc-tui. 24Hadơi sì tũq pơnõq nhũ nao gãt Bi-si-đi trôh Bam-phi-ly. 25Hadơi sì tũq song pơto akhàt pơnuaĩq Yàc pãq Bet-je, pơnõq nhũ trỗt nao pãq At-ta-li. 26Mưng nữn, pơnõq nhũ đìq ahòq ia trôh pãq palơi An-ti-ôt, anĩh pơnõq nhũ song hũ pơjao ga kaya anĩt Yàc Pô Lơngĩq hũ pioh ngãq vruãq nữn tũq nĩ pơnõq nhũ ngãq wil tãl. 27Dơlãp tũq trôh An-ti-ôt sì pơjũm pơtõm sàc Pơjũm Sơđah wỡq, pơnõq nhũ pa-thơu dơgrữq vruãq Yàc Pô Lơngĩq song ngãq sigỡuq sì pơnõq nhũ, sì yơu halơi Pitrai song pơh bãc voh-tui ga dơgrữq vual vơla lơniãu. 28Pơnõq nhũ dòq wỡq sì dơgrữq mơnuĩh mơgrũ sa tũq lơwah ôh suơi.