Skip to content
BibleKenya

Roglai Bible Literal Text

Vruãq 13

Dơlãp tũq nữn, dơlãp Sàc Pơjũm Sơđah pãq An-ti-ôt hũ dơgrữq mơnuĩh gơnuar hwơr sì mơnuĩh pơto. Nữn la Ba-na-ba, Si-me-ôn (hũ angãn la Ni-je), Lu-si-ut mơnuĩh Si-ren, Ma-na-hem (adơi ròc pitao adơi He-rôt hũ), sì Sau-lơ. Dơlãp tũq pơnõq nhũ ãn duh talơvãt Yàc sì ãt bõc, nữn Yàc Vơngãq Sơđah đơp: “Iỡuq chẽq tơviãq krơi Ba-na-ba sì Sau-lơ, pioh ngãq vruãq nữn kơu song duỡt ruãh pơnõq nhũ ngãq.” Hadơi sì tũq song ãt bõc, iơu lakơu, sì chẽq tơngãn pãq dlòc dua aràc mơnuĩh nữn, pơnõq nhũ pơđar dua aràc nhũ tơviãq nao.

Yơu nữn, Ba-na-ba sì Sau-lơ hũ Yàc Vơngãq Sơđah pơđar nao, sì pơnõq nhũ trỗt pãq Se-lơ-si; mưng đỡn, pơnõq nhũ đìq ahòq ia trôh pỗc pơlao Chip-rơ. Tũq trôh palơi Sa-la-min, pơnõq nhũ hũ pơto akhàt pơnuaĩq Yàc Pô Lơngĩq dơlãp dơgrữq sàc pơtõm mơnuĩh Ju-đa hũ. Pơnõq nhũ kung hũ Jãng, Mak ngãq mơnuĩh dõc vruãq ga drơi. Tũq song nao tơpa gãt avih pỗc pơlao trôh Ba-phô, pơnõq nhũ pãp sa aràc mơnuĩh grũ pajơu dih, sa aràc mơnuĩh gơnuar hwơr lor mơnuĩh Ju-đa, angãn la Ba-je-su. Mơnuĩh grũ pajơu nĩ ngãq ban mơyơu sigỡuq sì pô apãt akõq prõng Se-jut Phau-lut, la mơnuĩh jãc rgơi. Ung nĩ pơđar jàq Ba-na-ba sì Sau-lơ trôh, kơyua ung ưng hmỡq pơnuaĩq Yàc Pô Lơngĩq hũ. Nữn “mơnuĩh grũ pajơu” E-ly-ma (nữn la angãn hũ wãq pa-tơviãq ung nữn hũ) jơdrãq sì pơnõq nhũ; ung nữn rãn duah pơnẽq mãq pakỡuq ngãq ga pô apãt akõq prõng juơi pãc-tui Yàc. Nữn Sau-lơ, dòq angãn la Pol, hũ vãq sơrè Yàc Vơngãq Sơđah, nĩq nũn iãq gơnĩt pãq ung nữn sì đơp: “Nĩ ung, sa aràc anàq kamlai satan hũ, ung vãq sơrè dơgrữq kaya vlữq lor sì tãl dơgrữq kaya iãh mơsãc. Ung la mơnuĩh jơdrãq sì dơgrữq kaya tơpãq dãng, ung ròq ôh tũq halơi padưh luơi kaya ngãq we jơlàt athua tơpãq dãng Yàc hũ yơh? Tũq nĩ, iỡuq iãq vẽq, tơngãn Yàc hũ ngãq dlàiq pãq dlòc ung sì ung ròq kađòc vùp, ung ròq ôh iãq bôh ia harơi dơlãp sa lơwah tũq.” Tũq nữn mư, hũ kaya sồp kơnãm pa-trỗt pãq dlòc E-ly-ma, nữn nhũ pơdòq nao yõng tòp dar duah gơnang di mơnuĩh apãt tơngãn dui-va drơi. Hadơi sì tũq pô apãt akõq prõng bôh vruãq song tơviãq trôh, ung pãc-tui, kơyua ung mãq ngãq krơi mưng kaya pơto pơđar mưng Yàc.

Pol sì ban mơyơu trỗt mưng ahòq ia mưng Ba-phô nao trôh pãq Bet-je dơlãp phũm Bam-phi-ly. Nữn Jãng tlàq luơi pơnõq nhũ gơlàiq mai wỡq pãq Je-ru-sa-lem. Pol sì ban mơyơu mưng Bet-je nao trôh pãq An-ti-ôt pơweh sì Bi-si-đi. Pãq đỡn, dơlãp harơi Sa-bat, pơnõq nhũ, tơmã sàc pơtõm sì dòq guh hmỡq. Hadơi sì tũq pơpoh dơgrữq sơrãq voh-va sì sơrãq gơnuar hwơr, dơgrữq pô apãt akõq sàc pơtõm pơyua sãp ga pơnõq nhũ, làiq: “Nĩ, adơi sơai, mơyah làiq hũ pơnuaĩq paluơ padờp halơi ga vual vơla dòq pãq nĩ, nữn lakơu đơp vẽq.” Yơu nữn, Pol tơgùq dỡc, mãq tơngãn tơviãq ngãq nỡm; sì đơp:

“Ơ adơi sơai mơnuĩh Is-ra-el sì dơgrữq mơnuĩh duh huaĩq Yàc Pô Lơngĩq, lakơu hmỡq vẽq nĩ. Yàc Pô Lơngĩq vual vơla Is-ra-el nĩ hũ song duỡt ruãh ung kõq pơnõq drơi, ngãq ga pơnõq nhũ tơviãq jỡc lũ lã tũq pơnõq nhũ dòq hadiuq padơh pãq lơgar E-jip-tơ, sì angui mưng tơngãn yơr tơgùq, Pitrai va pơnõq nhũ tơviãq tlah mưng đỡn. Kơyua pơgãp dơlãp pàq plôh thũt Pitrai ãt ỡn pơnõq nhũ dơlãp blàc choah. Hadơi sì tũq song pa-lơhiãq tơjuh vual vơla dơlãp lơgar Ka-na-an, Pitrai vrơi lơgar nữn ga vual vơla pơnõq drơi ngãq apôh hamã. Dơgrữq vruãq nữn ròq tơviãq dơlãp pàq rơtôh lơmã plôh thũt. Hadơi nữn, Yàc Pô Lơngĩq vrơi ga pơnõq nhũ dơgrữq pô chahrơna tãl trôh rài mơnuĩh gơnuar hwơr Sa-mu-en hũ. Vloh vual vơla lakơu sa hũ pitao, nữn Yàc Pô Lơngĩq vrơi ga pơnõq nhũ Sau-lơ, anàq lakơi Kĩt, sa aràc mơnuĩh pơweh mưng apõc pơtiàt Ben-ja-min, dơlãp pàq plôh thũt. Hadơi sì tũq Yàc Pô Lơngĩq tlàq luơi ung, Pitrai pồ padỡc Đa-vit tơgùq ngãq pitao pơnõq nhũ. Kung mưng Đa-vit nữn Yàc Pô Lơngĩq đơp: ‘Kơu song bôh Đa-vit, anàq lakơi Je-se, la mơnuĩh ngãq tui hatai Kơu, ròq ngãq dơgrữq kaya Kơu ưng.’ Mưng anàq tơcho mơnuĩh nĩ hũ, Yàc Pô Lơngĩq song va trôh ga Is-ra-el sa Pitao Dõc Pơ-tlah, la Yàc Je-su, yơu Pitrai song hẽ grưh. Hlơu sì tũq Yàc Je-su trôh, Jãng la mơnuĩh song pơto akhàt adãt bãp-tem mưng kaya mơvai tlàq dlàiq ga avih vual vơla Is-ra-el. Tũq Jãng ngãq wil tãl vruãq ngãq drơi, ung đơp: ‘Pơnõq adơi sơai sơnơng hlãq la asơi? Hlãq ôh iỡuq la Pitao nữn ôh. Nữn iỡuq hmỡq vẽq, hũ Pitao trôh hadơi hlãq, hlãq ôh đang mang tơleh talơi chơkhõq Pitrai.’ Pa-thơu pơnõq adơi sơai, la anàq tơcho pơweh sì apõc pơtiàt A-bra-ham, sì dơgrữq mơnuĩh duh huaĩq di Yàc Pô Lơngĩq dơlãp pơnõq adơi sơai, pơnuaĩq akhàt mưng kaya dõc pơ-tlah nĩ song hũ vrơi ga pơnõq drơi. Kơyua dơgrữq mơnuĩh hadiuq pãq Je-ru-sa-lem sì pồ apãt akõq pơnõq nhũ hũ ôh iãq thơu Pitrai, yơu nữn pơnõq nhũ duah pơnẽq ngãq dlàiq Pitrai, ngãq tơviãq iỡuq yơu pơnuaĩq dơgrữq sơrãq mơnuĩh gơnuar hwơr miẽt hũ pơpoh gãm dơgrữq harơi Sa-bat. Bôh làiq pơnõq nhũ ôh duah bôh kanõh gơtha hagĩq halơi pioh pa-mơtai Pitrai, nữn pơnõq nhũ miẽt lakơu Phi-lat pa-mơtai Pitrai vẽq. Tũq song ngãq tãl dơgrữq kaya song wãq mưng Pitrai, pơnõq nhũ va Pitrai pa-trỗt mưng kayơu pỡc sì dor Pitrai dơlãp vơnẽq. Vloh Yàc Pô Lơngĩq song ngãq ga Pitrai hadiuq wỡq mưng kaya mơtai. Dơlãp lũ harơi, dơgrữq mơnuĩh song mưng Ga-li-le tơgùq pãq Je-ru-sa-lem sigỡuq sì Pitrai song iãq bôh Pitrai. Dơgrữq mơnuĩh nữn tũq nĩ kung la mơnuĩh ngãq chưng mưng Pitrai ga vual vơla. Yơu nữn, pơnõq hlãq akhàt pa-thơu ga adơi sơai Pơnuaĩq Siàp nữn Yàc Pô Lơngĩq song hẽ grưh sì ung kõq pơnõq drơi hũ, Kơyua Yàc Pô Lơngĩq song ngãq jỡc pơnuaĩq hẽ grưh nữn sì pơnõq drơi, dơgrữq anàq tơcho pơnõq nhũ, tũq ngãq ga Yàc Je-su hadiuq wỡq mưng kaya mơtai. Yơu kung hũ wãq dơlãp Sơrãq Đơp Chrih katih dua:

‘Anàq la Anàq Kơu, harơi nĩ Kơu song pajỡc Anàq.’

Mưng vruãq Yàc Pô Lơngĩq ngãq ga Pitrai hadiuq wỡq mưng kaya mơtai, pioh rùp phàp Pitrai ôh hũ tũq halơi vrũq lơmuĩq, nữn Pitrai đơp yơu nĩ:

‘Kơu ròq vrơi ga Anàq dơgrữq kaya lơngai sơđah sơchih sì gơnĩt viãq song hẽ grưh sì Đa-vit.’

Nữn la kanõh gơtha Pitrai kung đơp dơlãp sơrãq Đơp Chrih tơmo, làiq:

‘Pitrai ôh luơi ga Pitao Sơđah Pitrai bôh kaya vrũq lơmuĩq.’

Kơyua, viãq, hadơi sì tũq Đa-vit song duh vruãq dơgrữq kaya Yàc Pô Lơngĩq ưng dơlãp rài drơi hũ, nữn mơnuĩh pìq, hũ va dor sigỡuq sì ung kõq drơi, sì rùp phàp mơnuĩh kađòc vrũq lơmuĩq. Pitao nữn Yàc Pô Lơngĩq song ngãq ga hadiuq wỡq nữn ôh bôh kaya wãc rơsì vrũq lơmuĩq nữn.

Yơu nữn, ơ adơi sơai, adơi sơai iỡuq thơu làiq kơyua mưng Pitao nĩ nữn kaya anĩt tơleh dlàiq hũ akhàt vrơi pa-thơu ga adơi sơai, sigỡuq sì kaya dõc suãq tlah mưng dơgrữq kaya ôh tũq halơi hũ angãn tơpãq dãng tui yơu voh-va Môi-se. Gơnang mưng Pitrai nữn dơgrữq mơnuĩh pãc-tui kung hũ angãn tơpãq dãng. Yơu nữn, iỡuq iãq gơrhia, huaĩq dơgrữq pơnuaĩq song đơp dơlãp sơrãq gơnuar hwơr ôh tơviãq trôh ga pơnõq adơi sơai:

‘Dơgrữq mơnuĩh iãq ôh srãp dih, iỡuq iãq sì mãq ngãq krơi vloh lơhiãq thĩt vẽq!

Kơyua dơlãp rài pơnõq hã, kơu ròq ngãq sa vruãq,

vruãq nữn pơnõq hã ròq ôh tũq halơi pãc-tui, bôh làiq la hũ mơnuĩh halơi nữn akhàt tơviãq ga dơgrữq pơnõq hã.’”

Dơlãp tũq Pol sì Ba-na-ba tơviãq nao, vual vơla lakơu dua aràc nhũ pơto akhàt wỡq ga pơnõq nhũ sigỡuq sì dơgrữq pơnuaĩq nữn dơlãp harơi Sa-bat patui wỡq. Dơlãp tũq sa tũq jơ pơjũm pơtõm pãq sàc pơtõm avih, lũ mơnuĩh Ju-đa sì dơgrữq mơnuĩh mơnuĩh gah lơniãu tluỡiq gơhuar nao tui jơlàt duh talơvãt mơnuĩh Ju-đa sì nao tui Pol sì Ba-na-ba; dua aràc nhũ đơp dlài sì pơnõq nhũ paluơ padờp pơnõq nhũ miẽt dòq dơlãp kaya anĩt Yàc Pô Lơngĩq hũ.

Vloh trôh harơi Sa-bat hadơi, iãq yơu gãm avih sa palơi pơtõm gỡuq wỡq pioh hmỡq pơnuaĩq Yàc. Nữn tũq mơnuĩh Ju-đa iãq bôh tơpuôl vual vơla lũ, hatai pơnõq nhũ vãq kaya lơmùq mơvai, jơdrãq sì dơgrữq pơnuaĩq Pol đơp sì đơp mưng pơnẽq ngãq siẽq siẽl ung. Nữn Pol sì Ba-na-ba chãc khĩn hẽ wỡq làiq: “Iỡuq ngãq akhàt tơviãq pơnuaĩq Yàc Pô Lơngĩq hũ ga pơnõq ung hlơu avih. Nữn kơyua bôh pơnõq ung kơmlah luơi pơnuaĩq nữn sì sơnơng drơi ôh đang mang tồq mãq kaya hadiuq gãm gãm, yơu nữn, nĩ, pơnõq hlãq ròq trôh pơweh sì dơgrữq vual vơla gah lơniãu. Kơyua Yàc song pơto akhàt pơnõq hlãq yơu nữn tũq Pitrai đơp:

‘Kơu song padỡc pơnõq anàq ngãq kaya sơđah ga dơgrữq vual vơla lơniãu,

pioh pơnõq anàq hadiuq va kaya dõc pơ-tlah trôh dơgrữq phũm atah rơlao avih pãq dlòc voh hlùq.’”

Tũq dơgrữq mơnuĩh lơniãu hmỡq yơu nữn, nữn pơnõq nhũ uỗt sơh sì miẽt gãm nữn sơ-uỗt mơyòp pơnuaĩq Yàc. Dơgrữq mơnuĩh halơi song hũ ngãq gơnĩt ga kaya hadiuq gãm gãm kung pãc-tui. Yơu nữn, pơnuaĩq Yàc hũ akhàt tơviãq vãq avih dơgrữq anĩh dơlãp phũm. Nữn mơnuĩh Ju-đa pachôh pasũl dơgrữq mơnuĩh kamơi tluỡiq gơhuar sì hũ gơnuar, mơda gơnãp kung yơu dơgrữq mơnuĩh apãt akõq dơlãp palơi. Dơgrữq mơnuĩh nĩ ngãq srôh srãh dơlãp sa kaya mãq pakỡuq pơweh sì Pol gãm sì Ba-na-ba, vloh pơtiãuq dua aràc nhũ tơviãq tlah mưng rơnuãi phũm palơi drơi hũ. Hẽ wỡq, Pol sì Ba-na-ba tapơh thũl pãq tơkai pioh jơdrãq sì pơnõq nhũ. Vloh dua aràc nhũ nao trôh pãq palơi Y-kô-ni. Dơgrữq mơnuĩh mơgrũ hũ vãq sơrè kaya uỗt sơh sì Yàc Vơngãq Sơđah.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.