Vruãq 12

1Dơlãp sa lơwah tũq nữn, pitao He-rôt mãq tơngãn ngãq dơgrữq mơnuĩh dơlãp Sàc Pơjũm Sơđah sì ngãq iãh pơnõq nhũ. 2Ung nữn angui đao pa-mơtai Ja-kơ, la sơai Jãng. 3Tũq bôh vruãq nữn ngãq siàp hatai mơnuĩh Ju-đa, ung nữn mãq wỡq Pier. Vruãq tơviãq trôh dơlãp tũq lơwah adãt bõc bẽn ôh hũ voh tapơi. 4Hadơi sì tũq mãq Pier, ung nữn krỡq ung tơmã sàc jam, pơjao ga pàq tơpuôl lĩng pioh khiãq iãq. Ung nữn sơga ngãq gơnĩt ròq va Pier pabôh mơta tơviãq ga vual vơla hadơi harơi adãt Pơjũm Bõc Nao Gãt. 5Yơu nữn, Pier kađòc krỡq dơlãp sàc jam, dòq Sàc Pơjũm Sơđah miẽt iơu lakơu sì Yàc Pô Lơngĩq ga ung. 6Dơlãp mơlãp hlơu sì harơi Pitao He-rôt sơga ngãq gơnĩt va ung tơviãq chahrơna, Pier dòq pìq pãq khrãh dua aràc lĩng, kađòc gơriãq mưng dua talơi sơrẽng, kung dơlãp tũq nữn pãq anãq mơvah bãc kung hũ lĩng iãq jàc sàc jam. 7Dih, sa aràc mơnuĩh gơnrơh Yàc hũ dơvruh dơvrah pabôh tơviãq pãq gah ung, kaya sơđah pơsàc sơdah dơlãp adũq sàc jam. Mơnuĩh gơnrơh poh rơlẽq gah wẽq Pier, pa-mơdưh ung, làiq: “Iỡuq tơgùq vẽq sơmar,” sì talơi sơrẽng tơsuãq tơviãq tlah mưng tơngãn ung. 8Vloh Mơnuĩh Gơnrơh đơp sì ung: “Iỡuq chồq ao sì juãq chơkhõq tơma.” Pier ngãq tui. Mơnuĩh Gơnrơh đơp wỡq: “Iỡuq chồq ao lơniãu tơmã, vloh tui kơu.” 9Yơu nữn, Pier tui mơnuĩh gơnrơh nao tơviãq blàc. Ung ôh thơu vruãq mơnuĩh gơnrơh ngãq la viãq. Ung miẽt sơnơng drơi bôh kaya pabôh. 10Hadơi sì tũq nao gãt anĩh pàq tơpuôl lĩng iãq jàc bãc sa, anĩh iãq jàc bãc dua, pơnõq nhũ trôh mơvah sơvòq bãc pasơi va tơmã dơlãp palơi; sơvòq bãc pơh krơi tơviãq ga pơnõq nhũ. Vloh pơnõq nhũ tơviãq nao pãq jơlàt prõng, sì mơnuĩh gơnrơh tlàq luơi ung. 11Tũq sơdor wỡq, Pier đơp: “Viãq tũq nĩ drơi vơhrơu thơu Yàc song pơđar mơnuĩh gơnrơh Pitrai dõc tlah drơi mưng tơngãn He-rôt sì tlah mưng dơgrữq kaya mơnuĩh Ju-đa chơkhãq chàc.” 12Tũq thơu pãc jỡc yơu nữn, ung nao trôh pãq sàc Ma-ri, ami Jãng hũ, kung iơu la Mak, anĩh hũ lũ mơnuĩh pãc-tui yàc pơjũm pơtõm sì ãn iơu lakơu. 13Tũq ung tơtoh bãc, sa aràc mơnuĩh halỗt mơnãq kamơi angãn la Rô-đơ tơviãq drơ pơnuaĩq. 14Tũq kơnãl thơu sãp Pier hũ, nai nữn sơh sơr uãn nữn wơr vĩq ôh pơh bãc; pa-vlữq wỡq, nữn nai đuaĩq tơmã adũq akhàt wỡq làiq Pier ãn dòq dỡc pãq lơniãu bãc. 15Pơnõq nhũ đơp sì nai: “Hã kruãq viãq.” Nữn nai miẽt miẽt yơu nữn. Nữn vloh pơnõq nhũ đơp: “Nữn la Mơnuĩh Gơnrơh ung nữn hũ.” 16Nữn Pier miẽt tơtoh bãc, sì dơlãp tũq pơh bãc tơviãq, pơnõq nhũ iãq bôh ung yơu nữn kung mãq ngãq krơi viãq. 17Pier angui tơngãn ngãq nỡm tơviãq ga pơnõq nhũ dòq suà, vloh ung akhàt tơviãq ga pơnõq nhũ thơu Yàc song va ung tơviãq tlah mưng sàc jam yơu halơi. Ung hakơi: “Iỡuq akhàt wỡq ga Ja-kơ sì pơnõq adơi sơai.” Hadơi nữn, ung nao trôh pãq anĩh tơmo. 18Tũq lơngĩq sơdah, hũ kaya srôh srãh prõng dơlãp tơpuôl lĩng mưng vruãq song tơviãq trôh ga Pier. 19Hadơi song tũq duah iãq sì ôh duah bôh ung, He-rôt tơnĩa khao dơgrữq tơpuôl lĩng iãq jàc sì vrơi gơnuar pa-mơtai pơnõq nhũ. Vloh ung nữn mưng Ju-đe nao pãq Se-sa-re sì dòq wỡq pãq đỡn.

20Tũq nữn, He-rôt nõng uãn vual vơla palơi Ti-rơ sì Si-đôn. Yơu nữn, pơnõq nhũ va gỡuq nao pãp ung. Pơnõq nhũ iỡuq hatai Ba-la-tut, la pô apãt akõq prõng dòq gah Pitao hũ, dõc pơnõq nhũ. Vloh pơnõq nhũ lakơu ngãq salơnuãq sigỡuq, kơyua lơgar pơnõq nhũ vlơi kaya bõc mưng lơgar pitao hũ. 21Trôh harơi song ngãq gơnĩt, He-rôt chồq ao pitao. Vloh dòq guh pãq dlòc sơvan, đơp dlài sì pơnõq nhũ. 22Nữn vual vơla driãu prõng: “Nữn la sãp vơngãq sơđah hũ, ôh iỡuq sãp anàq mơnuĩh ôh!” 23Tũq nữn mư, sa aràc mơnuĩh gơnrơh Yàc hũ poh pitao kơyua ung ôh luơi kaya gơhluh ga Yàc Pô Lơngĩq; ung nữn kađòc anàq adiãc ngãq pahanh pơđão trôh mơtai.

24Nữn pơnuaĩq Yàc Pô Lơngĩq hũ prãn tơgùq sì brõq pơtãl.

25Hadơi sì tũq Ba-na-ba sì Pol ngãq wil tãl gơnuar vruãq drơi hũ, pơnõq nhũ mai wỡq pãq Je-ru-sa-lem va tui Jãng, kung angãn la Mak.