Roglai Bible Literal Text
Vruãq 11
Tũq nữn, dơgrữq mơnuĩh gơnuar pơđar sì adơi sơai dòq pãq Ju-đe hmỡq pãc-tui vual vơla lơniãu kung song tồq mãq pơnuaĩq Yàc Pô Lơngĩq hũ. Tũq Pier mai trôh pãq Je-ru-sa-lem, dơgrữq mơnuĩh pơweh tơpuôl ãt adãt sìq kalìq gơrlah pơnuaĩq sì ung, pơnõq nhũ đơp: “Ung ngãq salơnuãq sì mơnuĩh ôh ãt adãt sìq kalìq sì bõc sigỡuq sì pơnõq nhũ!” Nữn Pier pơh sãp ràc tơviãq voh gơtha ga pơnõq nhũ savĩq patui lơnãq; ung đơp: “Pãq palơi Jôp-be, tũq hlãq ãn iơu lakơu, dơlãp dlò lơhiãq kaya sơnơng, hlãq iãq bôh kaya pabôh kơyua kaya hagĩq nữn drưh yơu vlah pơcha prõng akãq pàq gah akiãc mưng dlòc lơngĩq pơlẽq trỗt. Nhũ pa-trỗt tơpãq anĩh hlãq, nữn tũq pơweh mơta iãq tơmã dơlãp đỡn, hlãq iãq nĩq nũn sì bôh dơgrữq pơjẽh anàq asỡq pàq bẽq tơkai pãq dlòc hlùq, dơgrữq pơjẽh anàq asỡq kaĩh, anàq asỡq ruơi, sigỡuq sì dơgrữq chĩp pãq lơngĩq. Vloh hlãq kung hmỡq sa sãp đơp sì drơi: ‘Ơ Pier, iỡuq tơgùq dỡc, ngãq rơlo sì bõc vẽq!’ Nữn hlãq drơ: ‘Ôh jỡc ôh, talơvãt Yàc, kơyua ka-ôh hũ kaya hagĩq tasỡuq nrãc hẽla ôh sơchih tơmã dơlãp mơvah hlãq ôh.’ Nữn sãp mưng dlòc lơngĩq đơp bãc dua, làiq: ‘Kaya hagĩq Yàc Pô Lơngĩq song ngãq la sơchih nữn juơi iãq la ôh sơchih.’ Vruãq tơviãq trôh tlơu bãc yơu nữn, hadơi nữn, dơgrữq kaya hũ va pa-tơgùq wỡq pãq dlòc lơngĩq. Dih, mư tũq nữn, hũ tlơu aràc mơnuĩh dòq dỡc pãq anãq mơvah bãc sàc anĩh pơnõq hlãq ãn dòq; pơnõq nhũ mưng Se-sa-re hũ pơđar trôh pãp hlãq. Vơngãq Sơđah vrơi ga hlãq nao sigỡuq sì pơnõq nhũ, juơi hũ kaya pa-chơlah krơi hagĩq pơweh sì pơnõq nhũ. Hũ nãm aràc adơi sơai nĩ kung nao sigỡuq sì hlãq, sì pơnõq hlãq nao tơmã sàc mơnuĩh nữn. Vloh ung nữn akhàt ga pơnõq hlãq yơu hayơu ung song bôh mơnuĩh gơnrơh dòq dỡc dơlãp sàc drơi, pơto: ‘Iỡuq pơđar mơnuĩh trôh pãq Jôp-be sì iơu jàq Si-môn, angãn la Pier, ung nữn ròq đơp ga sơai dơgrữq pơnuaĩq pơto pơđar vloh gơnang mưng nữn, nữn sơai sì dơgrữq mơnuĩh dơlãp sàc — ròq hũ dõc pơ-tlah.’ Nữn tũq hlãq pơdòq đơp, nữn Yàc Vơngãq Sơđah pa-trỗt pãq dlòc pơnõq nhũ drưh yơu tũq chơmrờp Pitrai song pa-trỗt pãq dlòc pơnõq drơi yơu nữn. Vloh hlãq sơdor trôh pơnuaĩq Yàc, yơu halơi Pitrai gãm đơp: ‘Jãng viãq song ngãq Bãp-tem mưng ia; nữn pơnõq adơi sơai ròq hũ ngãq bãp-tem mưng Yàc Vơngãq Sơđah.’ Yơu nữn, mơyah làiq Yàc Pô Lơngĩq vrơi ga pơnõq nhũ kung sa kaya anĩt nữn Pitrai vrơi ga pơnõq drơi, tũq pơnõq drơi pãc-tui dơlãp Yàc Dõc Pơ-tlah Je-su, nữn hlãq la asơi nữn khĩn jơdrãq sì Yàc Pô Lơngĩq?” Tũq hmỡq dơgrữq pơnuaĩq nữn, pơnõq nhũ ôh đơp hagĩq nữn mĩn sơ-uỗt mơyòp Yàc Pô Lơngĩq, làiq: “Yơu nữn Yàc Pô Lơngĩq kung vrơi hatai mơvai tlàq dlàiq pioh hũ tồq mãq kaya hadiuq vrơi ga dơgrữq vual vơla lơniãu wỡq.”
Viãq, dơgrữq mơnuĩh pãc-tui yàc ãt chơlah chơluỡn kơyua kaya mãq pakỡuq tơviãq trôh hadơi sì vruãq E-tien song pa-chơlah nao trôh pãq Phe-ni-si, Chip-rơ sì palơi An-ti-ôt, ôh đơp pơnuaĩq Yàc ga aràc halơi tơmo lơniãu mơnuĩh Ju-đa. Nữn hũ hadùp aràc dơlãp pơnõq nhũ hũ mơnuĩh mưng Chip-rơ sì Si-ren, trôh palơi An-ti-ôt sì kung đơp ga mơnuĩh Gơ-rec, akhàt vrơi pa-thơu Pơnuaĩq Siàp mưng Yàc Je-su ga pơnõq nhũ. Tơngãn Yàc hũ dòq sigỡuq sì pơnõq nhũ; lũ viãq mơnuĩh pãc-tui sì gơlàiq mai wỡq pãq Yàc. Pơnuaĩq tiẽng dơnãi mưng pơnõq nhũ va trôh pãq Sàc Pơjũm Sơđah pãq Je-ru-sa-lem, yơu nữn pơnõq nhũ pơđar Ba-na-ba nao trôh pãq palơi An-ti-ôt. Tũq trôh anĩh sì iãq bôh kaya anĩt Yàc Pô Lơngĩq hũ, ung uỗt sơh; sì ung pơto padờp dơgrữq tãl aràc pơnõq nhũ miẽt avih hatai tui Yàc. Kơyua ung la mơnuĩh lơmuỡn siàp, vãq sơrè Yàc Vơngãq Sơđah sì voh tui, yơu nữn hũ lũ mơnuĩh hũ pơtãl tơmã ga Yàc. Hadơi nữn, Ba-na-ba nao trôh Tat-sơ pioh duah Pol. Tũq duah bôh, ung va Pol trôh An-ti-ôt. Dơlãp sa thũt, pơnõq nhũ pơtõm wỡq sigỡuq sì Sàc Pơjũm Sơđah sì pơto pơđar lũ mơnuĩh. Dơgrữq mơnuĩh mơgrũ hũ angãn la mơnuĩh Pãc-tui Yàc pãq An-ti-ôt hlơu avih.
Dơlãp dơgrữq harơi nữn, hũ hadùp aràc mơnuĩh gơnuar hwơr mưng Je-ru-sa-lem trỗt pãq An-ti-ôt. Sa aràc mơnuĩh dơlãp pơnõq nhũ angãn A-ga-but song tơgùq dỡc sì kơyua mưng Yàc Vơngãq Sơđah, vrơi thơu làiq Jẽq hũ kaya ờq lơ-pa prõng dơlãp dun kơyua. Vruãq nĩ tơviãq trôh dơlãp rài Kơ-lôt hũ. Kơyua yơu nữn, dơgrữq mơnuĩh mơgrũ, tui yơu prãn drơi, ngãq gơnĩt dơgrữq tãl aràc ròq pơyua sa vơnah kaya dõc pa-mơpha ga pơnõq adơi sơai dòq hadiuq pãq Ju-đe. Sì pơnõq nhũ song ngãq yơu nữn; pơnõq nhũ gơnang mưng Ba-na-ba sì Pol pơyua jĩn vrơi ga dơgrữq mơnuĩh pô tơha.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.