Skip to content
BibleKenya

Roglai Bible Literal Text

2 Kô-rin-tô 2

Kơyua pơnõq hlãq song iãq pơwih bôh kaya nĩ la siàp ga rùp phuỗt hlãq tồq ôh nao trôh sì pơnõq adơi sơai sa bãc tơra dơlãp sẽq lơwa ka-ồq ka-iãp. Kơyua mơyah làiq rùp phuỗt hlãq ngãq ga pơnõq adơi sơai ka-ồq ka-iãp, nữn asơi la mơnuĩh pơlih ngãq ga hlãq sơh sơr, lơniãu mĩn dơgrữq mơnuĩh kađòc hlãq song ngãq ka-ồq ka-iãp nữn? Kơyua hlãq song wãq sa pơnuaĩq yơu nĩ, pioh hadơi sì tũq nao trôh, hlãq ôh kađòc kaya ka-ồq ka-iãp mưng dơgrữq mơnuĩh nữn iỡuq viãq la hlãq uỗt sơh, kơyua hlãq song chàc gơnang dơlãp avih pơnõq adơi sơai làiq kaya uỗt sơh hlãq hũ la kaya uỗt sơh avih tãl aràc pơnõq adơi sơai. Kơyua mưng dơlãp kaya dleh dlàr prong sì hatai akãq gơriãq kaya pađìq pơđua nữn hlãq wãq vrơi ga pơnõq adơi sơai, sigỡuq sì hũ lũ ia mơta, ôh iỡuq pioh ga adơi sơai ka-ồq ka-iãp, nữn la pioh ga adơi sơai pãc jỡc kaya khiãng duman dơlãp viãq hlãq hũ pơweh sì pơnõq adơi sơai.

Nữn mơyah làiq mơnuĩh halơi song ngãq tơviãq kaya ka-ồq ka-iãp, nữn mơnuĩh nữn ôh mĩn ngãq tơviãq kaya ka-ồq ka-iãp ga hlãq, nữn sa vơnah halơi nữn kung ngãq ga avih tãl aràc pơnõq adơi sơai ka-ồq ka-iãp — hlãq ôh chàc đơp lũ uãn ôh. Kaya ngãq dlàiq nữn pioh luơi ga mơnuĩh yơu nữn kơyua kađòc lũ viãq pơnõq adơi sơai gơrloh pơkhè la tãl vloh, yơu nữn, vloh pơnõq adơi sơai iỡuq tơleh dlàiq sì paluơ padờp mơnuĩh nữn, huaĩq làiq mơnuĩh nữn ôh dơvlữq hatai kơyua mưng kaya ka-ồq ka-iãp rlao uãn. Yơu nữn, hlãq paluơ padờp adơi sơai iỡuq akhàt vrơi pa-thơu ngãq gơnĩt kaya anĩt duman pơweh sì mơnuĩh nữn. Viãq, hlãq kung song wãq kơyua kanõh gơtha nĩ: pioh hlãq pơlih thơu kaya lòc iãq dơlãp pơnõq adơi sơai, huaĩq pơnõq adơi sơai pãc sãp dơlãp dơgrữq vruãq lơĩh hẽla ôh pãc sãp. Vơnah tơmo, pơweh sì mơnuĩh halơi nữn pơnõq adơi sơai tơleh dlàiq sa kaya hagĩq nữn, nữn hlãq kung tơleh dlàiq adơi sơai yơu nữn — kơyua rùp phuỗt hlãq, pơweh sì mơnuĩh nữn hlãq song tơleh dlàiq (mơyah làiq hlãq tơleh dlàiq sa kaya sỗq suẽl halơi nữn), nữn la tơleh dlàiq kơyua mưng adơi sơai di anãq Yàc Dõc Pơ-tlah, pioh ga pơnõq drơi tlah mưng kamlai Satan ka-nơ drơi, kơyua ôh iỡuq pơnõq drơi vloh ôh thơu dơgrữq pơnẽq vơnrẽq nhũ hũ.

Nữn, hadơi sì tũq nao trôh pãq Trô-ãt pioh pơto akhàt Pơnuaĩq Siàp mưng Yàc Dõc Pơ-tlah, sì bôh làiq mơvah bãc song pơh tơviãq ga hlãq dơlãp Yàc, nữn hlãq dòq ôh sũp hatai, kơyua hlãq ôh pãp mơnuĩh adơi sơai hlãq la Tit dòq pãq đỡn. Bôh làiq yơu nữn, hadơi sì tũq pa-lơnguãq pơnõq nhũ, hlãq tơgùq nao pãq Ma-se-đoan.

Nữn vloh, ỡn ngai Yàc Pô Lơngĩq, la Pitao gãm gãm dui va pơnõq hlãq sa vruãq pha rlao dơlãp Yàc Dõc Pơ-tlah, sì kơyua mưng pơnõq hlãq, ràc tơviãq kaya bơu vơlhũ mưng kaya kơnãl thơu Pitrai vãq dơgrữq anĩh. Kơyua pơweh sì Yàc Pô Lơngĩq, pơnõq hlãq la kaya bơu vơlhũ mưng Yàc Dõc Pơ-tlah, dòq di khrãh mơnuĩh hũ dõc pơ-tlah sì di khrãh mơnuĩh mơtai lơhiãq — yơu nữn pơweh sì dơgrữq mơnuĩh nĩ, la bơu yuà vrũq tơviãq mưng kaya mơtai va trôh kaya mơtai, nữn pơweh sì dơgrữq mơnuĩh tơmo, la kaya bơu vơlhũ tơviãq mưng kaya hadiuq va trôh kaya hadiuq. Mơnuĩh halơi hũ tãl prãn ga dơgrữq kaya nĩ? Kơyua pơnõq hlãq ôh drưh yơu lũ mơnuĩh nao ràc pa-vlơi pơnuaĩq Yàc Pô Lơngĩq hũ kơyua mưng kaya hajũc hlàq drơi, nữn yơu mưng hatai tơpãq viãq sì sơđah sơchih, ngãq yơu trôh mưng Yàc Pô Lơngĩq, pơnõq hlãq pơto akhàt di anãq Yàc Pô Lơngĩq dơlãp Yàc Dõc Pơ-tlah.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.