2 Kô-rin-tô 1

1Pol, mơnuĩh gơnuar pơđar Yàc Dõc Pơ-tlah Je-su kơyua mưng hatai ưng Yàc Pô Lơngĩq hũ, sì Ti-mô-the, la adơi sơai pơnõq drơi hũ, pơyua ga sàc Pơjũm Sơđah Yàc Pô Lơngĩq hũ dòq pãq palơi Kô-rin-tô, sì pơyua vrơi ga avih dơgrữq mơnuĩh gơnuar pơđar prõng dòq dơlãp phũm pơsai A-chai. 2Lakơu pơnõq adơi sơai hũ kaya anĩt sì kaya dadu lơngai mưng Yàc Pô Lơngĩq, Ama pơnõq drơi, sì Yàc Dõc Pơ-tlah Je-su!

3Iỡuq sơ-uỗt mơyòp Yàc Pô Lơngĩq sì la Ama Yàc pơnõq drơi hũ — Yàc Dõc Pơ-tlah Je-su — nữn la Ama kaya khiãng duman, sì Yàc Pô Lơngĩq dơgrữq kaya paluơ padờp hũ, 4la Pitao paluơ padờp pơnõq hlãq dơlãp dơgrữq kaya rũc rài pơnõq hlãq hũ, vloh pioh ga pơnõq hlãq kung pơlih hũ paluơ padờp dơgrữq mơnuĩh pãp dơgrữq kaya rũc rài mưng kaya paluơ padờp nữn mưng rùp phuỗt pơnõq hlãq hũ paluơ padờp mưng Yàc Pô Lơngĩq. 5Kơyua yơu dơgrữq kaya dleh dlàr Yàc Dõc Pơ tlah vãq sơrè pãq dlòc pơnõq hlãq yơu halơi nữn kaya paluơ padờp pơnõq hlãq gơnang mưng Yàc Dõc Pơ-tlah nữn kung hũ vãq sơrè yơu nữn. 6Yơu nữn mơyah làiq pơnõq hlãq ãt kaya rũc rài, sì nữn la kaya paluơ padờp sì kaya dõc pơ-tlah pơnõq adơi sơai hũ; mơyah làiq pơnõq hlãq hũ paluơ padờp nữn kung la kaya paluơ padờp adơi sơai hũ, gơnang mưng kaya ãt-ỡl sigỡuq dơgrữq kaya dleh dlàr nữn rùp phuỗt pơnõq hlãq kung song ãt yơu nữn mĩn. 7Sì kaya chơkhãq chàc pơnõq hlãq hũ mưng pơnõq adơi sơai la gơnĩt viãq, tũq thơu làiq yơu pơnõq adơi sơai la dơgrữq mơnuĩh kung hũ vơnãh sigỡuq dơlãp kaya dleh dlàr yơu halơi, nữn kung hũ vơnãh dơlãp kaya paluơ padờp yơu nữn.

8Pa-thơu pơnõq adơi sơai, kơyua pơnõq hlãq ôh ưng luơi pơnõq adơi sơai ôh thơu hagĩq mưng kaya dleh dlàr song tơviãq trôh ga pơnõq hlãq pãq lơgar A-si. Pơnõq hlãq song kađòc ãt ỡl tơpa rlao sì prãn drơi, tơviãq jỡc pơnõq hlãq vloh ôh dòq chàc gơnang hadiuq tơra. 9Bôh làiq yơu nữn, rùp phuỗt pơnõq hlãq mĩn gãm song tồq mãq kaya ngãq dlàiq iỡuq mơtai dơlãp rùp drơi, pioh ga pơnõq hlãq ôh pơlih gơnang mưng rùp phàp drơi, nữn la chàc gơnang dơlãp Yàc Pô Lơngĩq, la Pitao ngãq ga mơnuĩh mơtai jỡc hadiuq wỡq, 10la Pitao song dõc suãq pơnõq hlãq tlah mưng kaya savữc rỡc, mơtai lơhiãq yơu nữn, nữn Pitrai kung ròq dõc suãq pơnõq hlãq — nữn la dòq dơlãp Pitrai, hlãq ròq pioh avih kaya chơkhãq chàc dơlãp Pitrai, làiq Pitrai ròq miẽt miẽt dõc suãq pơnõq hlãq, 11tũq pơnõq adơi sơai kung salơnuãq sigỡuq dơlãp kaya iơu lakơu ala ga pơnõq hlãq — tồq ga gơnang di lũ mơnuĩh, kaya dadu lơngai trôh pa pơnõq hlãq, Yàc Pô Lơngĩq tồq mãq dơgrữq pơnuaĩq ỡn ngai mưng pơnõq adơi sơai kơyua di pơnõq hlãq.

12Kơyua kaya mơ-àc mơyàc pơnõq hlãq hũ la yơu nĩ: pơnuaĩq ngãq chưng mưng tũc hatai pơnõq hlãq, làiq pơnõq hlãq song bõc dòq di khrãh dun kơyua dơlãp kaya sơđah sơchih sì hatai duh huaĩq tơpãq viãq Yàc Pô Lơngĩq hũ, ôh iỡuq gơnang mưng kaya jãc rgơi tui rơlo rùp, yơu nữn gơnang mưng kaya anĩt Yàc Pô Lơngĩq hũ, nữn hlơu viãq la pơweh sì pơnõq adơi sơai. 13Kơyua pơnõq hlãq ôh wãq ga adơi sơai dơgrữq kaya halơi krơi tơmo, lơniãu dơgrữq pơnuaĩq nữn pơnõq adơi sơai pơpoh jỡc sì thơu pãc jỡc, nữn tũq nĩ hlãq chơkhãq khiãng làiq pơnõq adơi sơai ròq thơu pãc avih pơnuaĩq nữn — 14kung yơu pơnõq adơi sơai song thơu pãc jỡc vơnah halơi mưng pơnõq hlãq — pioh pơnõq hlãq ròq tơviãq jỡc la kaya mơ-àc mơyàc pơnõq adơi sơai hũ, nữn pơnõq adơi sơai kung ngãq yơu nữn pơweh sì pơnõq hlãq, dơlãp harơi Yàc pơnõq drơi hũ, la Yàc Je-su.

15Kơyua pãc gơnĩt yơu nữn nữn halơu thrơi hlãq ưng nao chuãq rơwãc pơnõq adơi sơai, pioh dõc ga adơi sơai pơtãl sa bãc tơra, 16vloh mưng anĩh adơi sơai patui nao wỡq trôh lơgar Ma-se-đoan, sì hadơi nữn gơlàiq mai wỡq mưng anĩh Ma-se-đoan trôh pãq anĩh adơi sơai, pioh ga pơnõq adơi sơai va pơyuà hlãq nao trôh pãq lơgar Ju-đe. 17Yơu nữn, tũq ngãq gơnĩt samỡng nao, nữn ôh iỡuq hlãq song iãq ôh srãp, iỡuq lơĩh? Hẽla iỡuq mĩn hlãq ngãq gơnĩt tui yơu kaya aràc lơđãp ngãq, nữn vloh sigỡuq sì tũq nữn vloh hlãq đơp “Hũ, iỡuq” gãm sì hlãq đơp “Ôh”.

18Nữn Yàc Pô Lơngĩq la Pitao ngãq tui tơpãq, yơu nữn ôh hũ vruãq pơnõq hlãq đơp “Hũ” ãn đơp “Ôh” sì pơnõq adơi sơai ôh. 19Kơyua Anàq Yàc Pô Lơngĩq, nữn la Yàc Dõc Pơ-tlah Je-su, Pitao nữn pơnõq hlãq hũ pơto akhàt mưng di khrãh pơnõq adơi sơai kơyua mưng pơnõq hlãq — nữn la kơyua mưng hlãq sì Sin-vanh, sigỡuq sì Ti-mô-the — ràc tơviãq dơlãp pơnõq adơi sơai la ôh đơp “Hũ, iỡuq” gãm sì đơp “Ôh hũ, ôh iỡuq” nữn dơlãp Pitrai gãm gãm la “Hũ, iỡuq”. 20Kơyua dơgrữq pơnuaĩq hẽ grưh Yàc Pô Lơngĩq hũ mĩn la “Hũ, iỡuq” dơlãp Pitrai. Kơyua yơu nữn pơnõq hlãq kung gơnang mưng Pitrai nữn đơp pơnuaĩq “A-men” sì Yàc Pô Lơngĩq nữn padỡc kaya gơhluh ga Pitrai. 21Vơnah tơmo, mĩn Yàc Pô Lơngĩq la Pitao ngãq chưng gơnĩt pơnõq hlãq sì pơnõq adơi sơai dơlãp Yàc Dõc Pơ-tlah, sì Pitrai pavuh mơnhàq ga pơnõq hlãq, 22kung la Pitao song tap-ban-kiq ga pơnõq hlãq sì vrơi Vơngãq Sơđah tơma dơlãp hatai pơnõq hlãq pioh ngãq chưng.

23Tũq nĩ hlãq lakơu Yàc Pô Lơngĩq ngãq chưng ga vơngãq yuà hlãq làiq kơyua kaya ãt-ỡl tlàq luơi ga pơnõq adơi sơai, hlãq song ôh nao trôh pãq Kô-rin-tô tơra. 24Ôh iỡuq kơyua pơnõq hlãq ãn pagùq pơ-èp voh-tui pơnõq adơi sơai, nữn pơnõq hlãq mĩn la ban mơyơu ngãq vruãq sigỡuq pioh padỡc kaya uỗt sơh ga pơnõq adơi sơai, kơyua pơnõq adơi sơai song dòq dỡc gơjãp dơlãp voh-tui drơi vloh.