1 Kô-rin-tô 16

1Mưng vruãq rìq jĩn dõc ga dơgrữq mơnuĩh gơnuar pơđar prõng, tui yơu hlãq song pơto va ga dơgrữq sàc pơjũm sơđah pãq phũm Ga-la-ti ngãq, pơnõq adơi sơai kung iỡuq ngãq yơu nữn. 2Dơgrữq harơi chơmrờp dơlãp sa tơjuh harơi, avih tãl aràc dơlãp pơnõq adơi sơai iỡuq pioh luơi krơi, tũq akhiãm pơtõm kaya mơnã halơi nữn mơyah làiq mơnuĩh nữn hũ vrơi vơnãh hajũc hlàq drơi, pioh tũq hlãq trôh, tũq nữn ròq ôh chàc rìq pơgòp kaya hagĩq tơra. 3Vơnãh tơmo, tũq hlãq trôh, mơyah làiq pơnõq adơi sơai siàp hatai ưng ruãh dơgrữq mơnuĩh halơi, nữn hlãq ròq pơđar pơnõq nhũ va kaya alĩn pơnõq adơi sơai hũ sigỡuq sì srãq pơyua trôh pãq Je-ru-sa-lem. 4Dòq mơyah làiq vruãq nữn kung la kaya đang mang iỡuq pioh hlãq nao, nữn pơnõq nhũ ròq nao sigỡuq sì hlãq. 5Nữn hlãq ròq trôh sì pơnõq adơi sơai hadơi sì tũq rùp phuỗt hlãq nao gãt Ma-se-đoan, kơyua hlãq ãn nao gãt Ma-se-đoan. 6Vloh pơlih làiq hlãq ròq dòq wỡq sì pơnõq adơi sơai, hẽla vloh dòq tãl avih vlàt mơrìt, tồq ga pơnõq adơi sơai pơlih va hlãq nao jơlàt mơyah làiq hlãq ưng nao pãq anĩh halơi hlãq nao nữn. 7Kơyua hlãq ôh ưng pãp pơnõq adơi sơai tũq nĩ ãn nao gãt jơlàt, kơyua hlãq chơkhãq chàc ưng dòq wỡq sì pơnõq adơi sơai sa tũq lơwah, mơyah làiq Yàc vrơi gơnuar. 8Nữn hlãq ròq dòq wỡq pãq E-phe-sô tãl trôh Harơi Adãt Lơmã Plôh, 9kơyua hũ sa gah mơvah bãc lơnang sì hũ ãn song pơh tơviãq ga hlãq, nữn lũ kaya tơmo nữn ãn mãq pakỡuq hlãq.

10Vơnah tơmo, mơyah làiq Ti-mô-the trôh, iỡuq iãq gơrhia nhũ tồq ga nhũ dòq sigỡuq sì pơnõq adơi sơai ôh huaĩq kơđa hagĩq, kơyua nhũ nữn ãn ngãq vruãq Yàc, drưh yơu hlãq mĩn. 11Kơyua yơu nữn, juơi sa aràc halơi iãq ôh srãp di nhũ. Nữn iỡuq dõc iãq nhũ nao jơlàt savĩq dadu lơngai, tồq ga nhũ pơlih sơmar trôh sì hlãq, kơyua hlãq ãn chơkhãq chàc nhũ sigỡuq sì dơgrữq adơi sơai tơmo. 12Dòq pơweh sì adơi sơai la A-bô-lô, hlãq song avih hatai rãn paluơ padờp nhũ tồq ga nhũ trôh sì pơnõq adơi sơai sigỡuq sì dơgrữq adơi sơai tơmo, sì nữn ôh iỡuq la hatai ưng nhũ ôh hayơu ga nhũ nao dơlãp tũq nĩ. Bôh làiq yơu nữn nhũ ròq nao dơlãp tũq hũ tũq lơwah.

13Iỡuq iãq gơrhia; iỡuq dòq dỡc gơjãp dơlãp voh-tui; iỡuq chãc khĩn yơu mơnuĩh prõng; iỡuq prãn khãc. 14Iỡuq luơi ga dơgrữq vruãq pơnõq adơi sơai hũ ngãq tơviãq dơlãp kaya khiãng duman.

15Vơnah tơmo, ơ pơnõq adơi sơai, hlãq paluơ padờp pơnõq adơi sơai (pơnõq adơi sơai thơu sàc anĩh Se-pha-na, làiq pơnõq nhũ la voh akõq thũt pãq A-chai, sì pơnõq nhũ song pioh hatai krơi dơlãp kaya duh vruãq dơgrữq mơnuĩh gơnuar pơđar prõng), 16pioh ga pơnõq adơi sơai kung duh huaĩq vẽq dơgrữq mơnuĩh yơu nữn gãm sì avih dơgrữq mơnuĩh halơi ãn ngãq vruãq sigỡuq sì ãt dleh dlàr sigỡuq dơlãp vruãq ngãq. 17Hlãq uỗt sơh mưng vruãq Se-pha-na, Phôt-tu-na sì A-chai-kơ trôh, kơyua pơnõq nhũ song vuh tơma ngãq pơtãl wỡq kaya hagĩq dòq siẽuq dơlãp pơnõq adơi sơai; 18kơyua pơnõq nhũ song ngãq vơhrơu wỡq vơngãq hatai hlãq hũ sì pơnõq adơi sơai hũ. Yơu nữn, iỡuq angãn thơu dơgrữq mơnuĩh yơu nữn.

19Dơgrữq Sàc Pơjũm Sơđah pãq char palơi A-si pơyua pơnuaĩq tơnĩa rơwãc trôh sì pơnõq adơi sơai. A-qui-la sì Be-rit-sin, sigỡuq sì Sàc Pơjũm Sơđah pơjũm pơtõm pãq sàc anĩh pơnõq nhũ hũ, avih hatai tơnĩa rơwãc pơnõq adơi sơai dơlãp Yàc. 20Avih tãl aràc adơi sơai tơnĩa rơwãc pơnõq adơi sơai. Iỡuq tơnĩa rơwãc gỡuq mưng kaya chũm sơđah sơchih.

21Pơnuaĩq tơnĩa rơwãc nĩ la mưng tơngãn hlãq song wãq — Pol. 22Mơyah làiq mơnuĩh halơi ôh khiãng duman Yàc, nữn mơnuĩh nữn iỡuq ãt kaya sơtãp ơluah! Talơvãt Yàc pơnõq anàq, lakơu Pitrai trôh vẽq! 23Lakơu kaya anĩt Yàc Je-su hũ dòq sigỡuq sì pơnõq adơi sơai. 24Kaya khiãng duman hlãq hũ dòq sigỡuq sì avih dơgrữq pơnõq adơi sơai dơlãp Yàc Dõc Pơ-tlah Je-su. A-men.