Roglai Bible Literal Text
1 Kô-rin-tô 15
Ơ pơnõq adơi sơai, hlãq akhàt pa-tơviãq ga pơnõq adơi sơai thơu mưng Pơnuaĩq Siàp nữn hlãq song akhàt vrơi pa-thơu ga pơnõq adơi sơai, la kaya nữn pơnõq adơi sơai kung song tồq mãq, sì dòq dữc gơjãp dơlãp Pơnuaĩq Siàp nữn, kung kơyua mưng Pơnuaĩq Siàp nữn sì pơnõq adơi sơai hũ dõc pơ-tlah, mơyah làiq pơnõq adơi sơai apãt gơjãp chròq rơmiãq pơnuaĩq siàp nữn hlãq song pơto akhàt ga pơnõq adơi sơai, mơyah làiq ôh iỡuq yơu nữn, nữn pơnõq adơi sơai song pãc-tui savĩq ôh kuơ. Kơyua dơlãp katih dơgrữq kaya halơu avih hlãq song pơto pơđar ga pơnõq adơi sơai, la kaya nữn hlãq kung song tồq mãq — nữn la Yàc Dõc Pơ-tlah song mơtai kơyua mưng dlàiq dơnũh pơnõq drơi hũ tui yơu pơnuaĩq Sơrãq Sơđah, Pitrai kađòc va dor, sì song ngãq ga hadiuq wỡq dơlãp harơi bãc tlơu tui yơu pơnuaĩq Sơrãq Sơđah, sì Pitrai song pabôh rùp ga Se-pha, vloh ga sa plôh dua aràc mơnuĩh gơnuar pơđar. Patui nữn wỡq, Pitrai pabôh rùp ga rlao lơmã rơtôh adơi sơai iãq bôh dơlãp sa tũq nữn, hũ lũ mơnuĩh dơlãp pơnõq nhũ tũq nĩ gãm dòq hadiuq, nữn hũ tơkìq mơnuĩh song pìq. Hadơi nữn, Pitrai song pabôh tơviãq ga Ja-kơ, vloh pabôh tơviãq ga avih dơgrữq mơnuĩh gơnuar pơđar. Nữn vloh, tãl trôh luôĩq hadơi avih dơgrữq aràc, Pitrai kung song pabôh tơviãq ga hlãq iãq bôh, yơu vrơi ga sa aràc anàq tìt đeh tơviãq ka ôh tãl vlàt. Kơyua hlãq la mơnuĩh tìt rlao avih dơlãp dơgrữq mơnuĩh gơnuar pơđar, la mơnuĩh ôh hũ đang mang hagĩq pioh hũ angãn la mơnuĩh gơnuar pơđar, kơyua hlãq song mãq pakỡuq sàc pơjũm sơđah Yàc Pô Lơngĩq hũ. Nữn kơyua mưng kaya anĩt Yàc Pô Lơngĩq hũ nữn la yơu rùp phuỗt hlãq tũq nĩ, sì kaya anĩt Pitrai hũ dòq dơlãp hlãq ôh iỡuq la ôh kuơ. Pa-vlữq wỡq, hlãq song ãt dleh dlàr lũ rlao avih tãl aràc pơnõq nhũ nữn, ôh iỡuq hlãq, nữn la kaya anĩt Yàc Pô Lơngĩq dòq sigỡuq sì hlãq. Yơu nữn, bôh làiq la hlãq hẽla dơgrữq tơpuôl pơnõq nhũ, nữn pơnõq hlãq song pơto akhàt yơu nữn sì pơnõq adơi sơai song pãc-tui yơu nữn.
Bôh làiq yơu nữn, mơyah làiq Yàc Dõc Pơ-tlah hũ pơto akhàt làiq Pitrai song ngãq ga jỡc hadiuq wỡq mưng kaya mơtai, nữn ngãq hayơu hũ tơkìq mơnuĩh dơlãp pơnõq adơi sơai vloh đơp làiq ôh hũ kaya hadiuq wỡq mơnuĩh mơtai hũ? Nữn mơyah làiq ôh hũ kaya hadiuq wỡq mơnuĩh mơtai hũ, nữn vloh Yàc Dõc Pơ-tlah kung song ôh hadiuq wỡq; nữn mơyah làiq Yàc Dõc Pơ-tlah song ôh ngãq ga jỡc hadiuq wỡq, nữn kaya pơto akhàt pơnõq hlãq hũ la ôh kuơ, sì voh-tui pơnõq adơi sơai hũ kung ôh kuơ màc hagĩq. Dòq pơnõq hlãq vloh kung kađòc iãq jỡc dơgrữq mơnuĩh ngãq chưng vlữq lor mưng Yàc Pô Lơngĩq hũ, kơyua pơnõq hlãq ròq ngãq chưng mưng Yàc Pô Lơngĩq làiq Pitrai ròq ngãq ga Yàc Dõc Pơ-tlah jỡc hadiuq wỡq, yơu nữn mơyah làiq yơu mơnuĩh mơtai ôh hũ ngãq ga jỡc hadiuq wỡq, nữn Pitrai ôh ngãq ga Pitao nữn hadiuq wỡq. Kơyua mơyah làiq mơnuĩh mơtai ôh ngãq ga hadiuq wỡq, nữn rùp phuỗt Yàc Dõc Pơ-tlah ròq kung ôh hũ ngãq hadiuq wỡq, nữn mơyah làiq Yàc Dõc Pơ-tlah song ôh hũ ngãq ga hadiuq wỡq, nữn voh-tui pơnõq adơi sơai la ôh kuơ; pơnõq adơi sơai miẽt dòq dơlãp dlàiq dơnũh drơi. Yơu nữn dơgrữq mơnuĩh song pìq dơlãp Yàc Dõc Pơ-tlah kung kađòc lơhiãq thĩt. Mơyah làiq pơnõq drơi hũ kaya chàc gơnang dơlãp Yàc Dõc Pơ-tlah mĩn dơlãp rài hadiuq nĩ, nữn pơnõq drơi la dơgrữq mơnuĩh iỡuq đang mang anĩt duman rlao dơlãp avih dơgrữq mơnuĩh.
Nữn tũq nĩ, Yàc Dõc Pơ-tlah song hũ ngãq hadiuq wỡq mưng kaya mơtai, la voh akõq thũt ga dơgrữq mơnuĩh song pìq. Kơyua mĩn sa aràc mơnuĩh nữn hũ kaya mơtai, nữn kung mĩn sa aràc mơnuĩh nữn hũ kaya hadiuq wỡq ga dơgrữq mơnuĩh mơtai hũ. Kơyua yơu halơi dơlãp A-đam, dơgrữq mơnuĩh kung mơtai, nữn kung yơu nữn mĩn, dơlãp Yàc Dõc Pơ-tlah, dơgrữq tãl aràc ròq hũ ngãq ga hadiuq wỡq. Nữn dơgrữq tãl aràc tui lơnãq krơi drơi hũ: Yàc Dõc Pơ-tlah la voh akõq thũt; patui wỡq la dơgrữq mơnuĩh pơweh sì Yàc Dõc Pơ-tlah dơlãp harơi mai wỡq Pitrai hũ. Hadơi nữn ròq la kaya luôĩq hadơi, dơlãp tũq Pitrai pơjao palơi lơgar wỡq ga Yàc Pô Lơngĩq la Ama, tũq Pitrai pa-lơhiãq avih dơgrữq gơnuar apãt akõq, sigỡuq sì dơgrữq gơnuar chơnuãq sì gơnuar prãn. Kơyua Pitao nữn iỡuq apãt akõq tãl trôh tũq Pitrai song chẽq avih dơgrữq mơnuĩh sòq jơdrãq pãq ala tơkai drơi. Mơnuĩh sòq jơdrãq luôĩq hadơi kađòc pa-lơhiãq la kaya mơtai. Kơyua “Pitrai song chẽq avih dơgrữq kaya pãq ala tơkai drơi.” Nữn tũq đơp làiq “Pitrai song chẽq dơgrữq kaya vloh,” nữn nĩq nũn làiq la ôh tũq halơi gãm Pitao ngãq ga dơgrữq kaya duh huaĩq Pitrai. Tũq nữn, dơlãp tũq dơgrữq kaya song kađòc duh huaĩq di Pitrai, nữn tũq nữn, rùp phuỗt Anàq Pitrai kung ròq duh huaĩq Pitao song mãq dơgrữq kaya duh huaĩq drơi, pioh ga Yàc Pô Lơngĩq pơlih la avih dơgrữq kaya dơlãp dơgrữq kaya.
Mơyah làiq ôh iỡuq yơu nữn, nữn dơgrữq mơnuĩh ãt bãp-tem ala ga mơnuĩh mơtai ròq ngãq yơu hagĩq? Mơyah làiq mơnuĩh mơtai ôh hũ ngãq ga hadiuq wỡq viãq, nữn kơyua hayơu pơnõq nhũ nữn vloh ãt ngãq bãp-tem ala ga dơgrữq mơnuĩh dih? Vloh kơyua yơu pơnõq hlãq iỡuq ãt kaya savỡc rỡc dơgrữq tũq jơ? Ơ pơnõq adơi sơai, hlãq mơtai dơgrữq harơi, kơyua kaya mơ-àc mơyàc mưng pơnõq adơi sơai, la kaya hlãq hũ dơlãp Yàc Dõc Pơ-tlah Je-su, Yàc pơnõq drơi. Mơyah làiq tui yơu pơnẽq anàq mơnuĩh, hlãq song mơsôh atòc sì dơgrữq anàq asỡq brưh mơsãc pãq E-phe-sô, nữn hũ kuơ hagĩq pioh ga hlãq? Mơyah làiq mơnuĩh mơtai ôh ngãq ga jỡc hadiuq wỡq, nữn “Iỡuq bõc sì mơnhũm, kơyua harơi pơgi pơnõq drơi ròq mơtai.” Juơi luơi kađòc pa-gơla: “Dơgrữq mơnuĩh ban mơyơu iãh ngãq lơhiãq avih dơgrữq kaya sẽq ngãq siàp.” Iỡuq mơdưh thơu wỡq vẽq! Sì juơi patui ngãq kaya sỗq dlàiq tơra. Kơyua hũ tơkìq mơnuĩh dơlãp pơnõq adơi sơai ôh hũ kaya thơu pãc hagĩq mưng Yàc Pô Lơngĩq — Hlãq đơp kaya nĩ pơto mưng kaya mơlơu alah pơnõq adơi sơai hũ.
Bôh làiq yơu nữn, sa aràc mơnuĩh dih ròq đơp làiq: “Mơnuĩh mơtai ròq ngãq ga jỡc hadiuq wỡq mưng pơnẽq halơi, nữn pơnõq nhũ trôh mưng rùp phàp yơu hayơu?” Ơ mơnuĩh gơla pơtòq dih! Kaya nữn pơnõq adơi sơai dràq ôh hũ ngãq ga hadiuq mơyah làiq nhũ ôh mơtai halơu. Sì kaya pơnõq adơi sơai va nao dràq nữn ôh iỡuq phuỗt nhũ ròq tơviãq jỡc, pa-vlữq wỡq, pơnõq adơi sơai va nao dràq mĩn la asar pơjẽh — nhũ pơlih la ngãq yơu asar vơdai mi hẽla asar pơjẽh tơmo. Nữn Yàc Pô Lơngĩq ròq vrơi ga nhũ sa phuỗt tui yơu hatai Pitrai ưng, sì dơgrữq asar pơjẽh phuỗt nhũ krơi di gỡuq. Ôh iỡuq dơgrữq rơlo rùp la hũ sa rơlo rùp sigỡuq. Pa-vlữq wỡq la rơlo rùp pơjẽh anàq mơnuĩh krơi, rơlo rùp dơgrữq pơjẽh anàq asỡq krơi, rơlo rùp dơgrữq pơjẽh anàq chĩp krơi sì rơlo rùp dơgrữq pơjẽh anàq akàt krơi. Kung hũ dơgrữq sẽq rùp pãq dlòc lơngĩq sì dơgrữq sẽq rùp pãq ala hlùq. Bôh làiq yơu nữn, kaya gơhluh pơweh sì pãq dlòc lơngĩq la yơu nĩ, dòq kaya gơhluh pơweh sì pãq ala hlùq la yơu dih. Kaya gơhluh ia harơi la yơu nĩ, kaya gơhluh ia vlàt la yơu dih, sì kaya gơhluh dơgrữq ia pitỗq nữn krơi wỡq. Kơyua kaya gơhluh ia pitỗq nĩ krơi di kaya gơhluh ia pitỗq dih. Kaya hadiuq wỡq mơnuĩh mơtai hũ kung yơu nữn. Rùp phàp hũ dràq trỗt nữn nhũ vrũq lơmuĩq, rùp phàp jỡc hadiuq wỡq nữn nhũ ôh vrũq lơmuĩq tơra; hũ dràq trỗt dơlãp kaya siẽq sier; jỡc hadiuq wỡq dơlãp kaya gơhluh; hũ dràq trỗt dơlãp kaya lơduh lơmuỡn, jỡc hadiuq wỡq dơlãp kaya prãn khãc; hũ dràq trỗt la rùp phàp rơlo rùp, jỡc hadiuq wỡq la rùp phàp gah suàt vơngãq. Mơyah làiq hũ rùp phàp rơlo rùp, nữn kung hũ rùp phàp gah suàt vơngãq. Yơu nữn kung hũ pơnuaĩq wãq làiq: “Mơnuĩh chơmrờp la A-đam song tơviãq jỡc vơngãq yuà hadiuq.” A-đam luôĩq hadơi la vơngãq vrơi kaya hadiuq. Nữn ôh iỡuq rùp phàp gah vơngãq hũ halơu, nữn la rùp phàp rơlo rùp, hadơi nữn trôh rùp phàp gah suàt vơngãq. Mơnuĩh bãc chơmrờp tơviãq mưng voh hlùq, la mơnuĩh pơweh pa havơu hlùq. Anàq mơnuĩh bãc dua trôh mưng dlòc lơngĩq. Mơnuĩh pơweh mưng havơu hlùq nữn yơu halơi, nữn dơgrữq mơnuĩh pơweh pa hlùq kung yơu nữn; sì Pitao pơweh mưng dlòc lơngĩq yơu halơi, nữn dơgrữq mơnuĩh pơweh pa dlòc lơngĩq kung yơu nữn mĩn. Yơu pơnõq drơi song gãm va sẽq vơlai mơnuĩh pơweh mưng hlùq, nữn pơnõq drơi kung ròq va sẽq vơlai Pitao pơweh pa lơngĩq hũ.
Vơnah tơmo, ơ pơnõq adơi sơai, hlãq lakơu đơp kaya nĩ, làiq rơlo sì dơrãh ôh tũq halơi tồq mãq jỡc palơi lơgar Yàc Pô Lơngĩq hũ. Kaya vrũq lơmuĩq kung ôh tồq mãq hũ kaya ôh vrũq lơmuĩq. Iãq nĩ, hlãq vrơi ga pơnõq adơi sơai thơu sa kaya dơlãp dơđỡuq: Ôh iỡuq avih tãl aràc pơnõq drơi ròq pìq, nữn avih tãl aràc pơnõq drơi ròq hũ pa-sơdua vơhrơu, dơlãp sa asĩt tũq, dơlãp sa klĩp mơta, tũq sãp gơdèt ayùq luôĩq hadơi. Kơyua gơdèt ròq ayùq tơgùq, sì dơgrữq mơnuĩh mơtai ròq hũ ngãq ga jỡc hadiuq wỡq gãm sì rùp phàp ôh vrũq lơmuĩq, nữn pơnõq drơi ròq hũ pa-sơdua vơhrơu. Kơyua rùp phàp vrũq lơmuĩq nĩ iỡuq chồq mãq kaya ôh vrũq lơmuĩq, sì rùp phàp iỡuq mơtai nĩ chồq mãq kaya ôh mơtai tơra. Nữn dơlãp tũq rùp phàp vrũq lơmuĩq nĩ song chồq mãq kaya ôh vrũq lơmuĩq, sì rùp phàp iỡuq mơtai nĩ song chồq mãq kaya ôh mơtai tơra, sì tũq nữn, pơnuaĩq song wãq ròq tơviãq jỡc yơu nữn, làiq:
“Kaya mơtai song kađòc luỗt thĩt dơlãp kaya pha rlao.”
“Ơ kaya mơtai, kaya pha rlao hã dòq pãq halơi?
Ơ kaya mơtai, kaya mỡq mãl hã dòq pãq halơi?”
Nữn mỡq mãl kaya mơtai hũ la dlàiq dơnũh, dòq gơnuar prãn dlàiq dơnũh hũ la voh-va. Nữn padỡc tơgùq ga Yàc Pô Lơngĩq pơnuaĩq ỡn ngai, la Pitao vrơi ga pơnõq drơi kaya pha rlao mưng Yàc pơnõq drơi hũ, la Yàc Dõc Pơ-tlah Je-su! Kơyua yơu nữn, ơ pơnõq ga adơi sơai anĩt duman hlãq hũ, iỡuq tơviãq jỡc gơjãp kađữc, ôh pa-sơdua, dơlãp tũq gãm gãm dơlah dơlai dơlãp vruãq ngãq Yàc, kơyua thơu làiq kaya dleh dlàr pơnõq adơi sơai hũ dơlãp Yàc ôh iỡuq la ôh kuơ.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.