1 Kô-rin-tô 14

1Iỡuq pagui tui kaya khiãng duman, nữn iỡuq tluỡiq gơhuar mưng dơgrữq kaya anĩt gah suàt vơngãq, nữn hlơu avih la pioh ga pơnõq adơi sơai pơlih hũ đơp hwơr. 2Kơyua mơnuĩh đơp pơnuaĩq chrih krơi nữn ôh đơp sì anàq mơnuĩh, nữn la đơp sì Yàc Pô Lơngĩq; kơyua ôh mơnuĩh halơi thơu pãc, bôh làiq yơu nữn, nhũ đơp dơgrữq kaya dơlãp dơđỡuq dơlãp vơngãq hatai. 3Nữn mơnuĩh đơp hwơr nữn đơp tơviãq kaya pioh vỡq padỡc, pơto pa-sơdor sigỡuq sì kaya paluơ padờp ga mơnuĩh tơmo. 4Mơnuĩh đơp pơnuaĩq chrih krơi nữn padỡc pa-tơgùq rùp phuỗt drơi, dòq mơnuĩh đơp hwơr nữn ròq vỡq padỡc Sàc Pơjũm Sơđah. 5Vơnah tơmo, hlãq chơkhãq khiãng avih dơgrữq pơnõq adơi sơai rgơi đơp pơnuaĩq chrih krơi, nữn dòq rlao nữn wỡq, nữn la pơnõq adơi sơai pơlih đơp hwơr. Nữn mơnuĩh đơp hwơr prong màc rlao mơnuĩh đơp sãp chrih krơi, mĩn mơnuĩh halơi nữn pơlih ràc pa-tơviãq gơtha, tồq ga sàc pơjũm sơđah tồq mãq hũ kaya vỡq padỡc. 6Nữn, ơ pơnõq adơi sơai, mơyah làiq ngãq yơu tũq nĩ hlãq trôh đơp dơgrữq pơnuaĩq chrih krơi sì pơnõq adơi sơai, nữn hlãq ròq dõc iãq kaya hagĩq ga pơnõq adơi sơai mơyah làiq hlãq ôh đơp sì pơnõq adơi sơai dơlãp kaya ràc tơviãq pơnuaĩq dơlãp dơđỡuq, hẽla pơnuaĩq thơu jãc rgơi, hẽla mưng pơnuaĩq hwơr hẽla pơnuaĩq pơto pơđar? 7Tơviãq jỡc avih dơgrữq kaya ôh hũ yua pơh tơviãq sãp — bôh làiq yơu tõq tơliãq hẽla tơpĩng kathũr pẽq — mơyah làiq dơgrữq kaya ôh ngãq tơviãq dơgrữq sãp mơnhĩ krơi gỡuq, nữn sãp mơnhĩ mưng tõq tơliãq hẽla sãp mơnhĩ mưng tơpĩng kathũr pẽq nữn ròq kơnãl thơu yơu halơi? 8Kơyua mơyah làiq gơdèt ayùq tơviãq sãp mơnhĩ ôh nĩq nũn nữn asơi ròq rơchãc pơkhrà pioh tơviãq nao mơsôh? 9Pơnõq adơi sơai kung drưh yơu nữn, mơyah làiq angui mưng mơvah dơlãh drơi, pơnõq adơi sơai ôh ràc pa-tơviãq pơnuaĩq đơp nĩq nũn thơu pãc buôt, nữn ngãq yơu hayơu pơnuaĩq drơi đơp tơviãq ròq pơlih thơu pãc jỡc? Kơyua pơnõq adơi sơai mĩn la ãn đơp dlài sì yuà lơwah soh. 10Hũ dơgrữq pơnuaĩq gơtha krơi di gỡuq dơlãp dun kơyua nĩ, viãq la hũ lũ pơnuaĩq đơp ôh thơu hadùp, sì ôh pơnuaĩq đơp halơi la ôh hũ gơtha. 11Yơu nữn, mơyah làiq hlãq ôh thơu pãc gơtha sa pơnuaĩq đơp halơi nữn, nữn hlãq ròq la mơnuĩh lơgar lơniãu pơweh sì mơnuĩh ãn đơp nữn, sì mơnuĩh ãn đơp nữn kung la mơnuĩh lơgar lơniãu pơweh sì hlãq. 12Pơnõq adơi sơai kung drưh yơu nữn, kơyua pơnõq adơi sơai la dơgrữq mơnuĩh tluỡiq gơhuar dơlãp dơgrữq kaya anĩt gah suàt vơngãq pơweh trôh pa vruãq vỡq padỡc sàc pơjũm sơđah, yơu nữn iỡuq duah iãq tồq ga pơnõq adơi sơai hũ dơlah dơlai. 13Kơyua yơu nữn, mơnuĩh đơp pơnuaĩq chrih krơi iỡuq iơu lakơu vẽq tồq ga mơnuĩh halơi nữn pơlih rgơi ràc pa-tơviãq gơtha ga dơgrữq mơnuĩh thơu pãc jỡc. 14Kơyua mơyah làiq hlãq iơu lakơu mưng sãp chrih krơi, nữn dơlãp suàt vơngãq hlãq iơu lakơu, sì dơlãp dlò sơnơng hlãq nữn ôh hũ tơviãq voh chơtai hagĩq. 15Yơu nữn hlãq iỡuq ngãq yơu halơi nĩ? Hlãq ròq iơu lakơu mưng suàt vơngãq, nữn kung ròq iơu lakơu mưng dlò sơnơng. Hlãq ròq adoh mưng suàt vơngãq, nữn kung ròq adoh mưng dlò sơnơng wỡq. 16Ôh yơu nữn, mơyah làiq adơi sơai sơ-uỗt mơyòp mưng suàt vơngãq, nữn ngãq yơu hayơu sa aràc mơnuĩh ôh thơu pãc jỡc dòq guh hmỡq pơlih đơp “A-men” pơweh sì pơnuaĩq ỡn ngai pơnõq adơi sơai hũ, kơyua pơnõq nhũ ôh thơu pãc pơnõq adơi sơai ãn đơp hagĩq? 17Kơyua bôh làiq pơnõq adơi sơai padỡc pơnuaĩq ỡn ngai la siàp iỡuq, nữn mơnuĩh tơmo ôh hũ kaya vỡq padỡc. 18Hlãq ỡn ngai Yàc Pô Lơngĩq làiq hlãq đơp pơnuaĩq chrih krơi lũ rlao avih dơgrữq pơnõq adơi sơai, 19nữn dơlãp sàc pơjũm sơđah, siàp rlao hlãq đơp lơmã ơkhar mưng dlò sơnơng drơi pioh hlãq kung pơlih pơto pơđar dơgrữq mơnuĩh tơmo, rlao sì đơp rơvơu rơvơu ơkhar mưng pơnuaĩq chrih krơi.

20Ơ pơnõq adơi sơai, juơi ngãq yơu lơđeh tìt dơlãp kaya sơnơng drơi hũ. Pa-vlữq wỡq, iỡuq ngãq yơu lơđeh tìt pơweh sì kaya mơsãc, nữn iỡuq ngãq yơu mơnuĩh prõng dơlãp kaya sơnơng. 21Dơlãp voh-va hũ pơnuaĩq wãq làiq:

“Yàc đơp:

‘Kơu ròq đơp sì vual vơla nĩ

kơyua mưng dơgrữq mơnuĩh đơp dơgrữq pơnuaĩq đơp tơmo sì mưng mơvah chơbuai dơgrữq mơnuĩh thuãi chrih;

nữn vloh mưng pơnẽq yơu nữn, pơnõq nhũ kung ròq ôh hmỡq Kơu.’”

22Kơyua yơu nữn, dơgrữq pơnuaĩq chrih krơi pioh ngãq sa nỡm, ôh iỡuq vrơi ga mơnuĩh pãc-tui, nữn la vrơi ga mơnuĩh ka-ôh pãc-tui; dòq đơp hwơr nữn ôh iỡuq vrơi ga mơnuĩh ka-ôh pãc-tui, nữn la vrơi ga mơnuĩh pãc-tui. 23Yơu nữn, mơyah làiq yơu avih dơgrữq sàc pơjũm sơđah pơtõm gỡuq pơjũm sigỡuq sa anĩh sì avih dơgrữq tãl aràc đơp pơnuaĩq chrih krơi, nữn mơyah làiq hũ mơnuĩh ôh thơu hẽla mơnuĩh ka-ôh pãc-tui trôh pơjũm sigỡuq, nữn ôh iỡuq lơĩh pơnõq nhũ ròq đơp làiq pơnõq adơi sơai kruãq hanruơi yơh? 24Nữn mơyah làiq avih tãl aràc adơi sơai kung đơp hwơr, nữn hũ tơkìq mơnuĩh ka-ôh pãc-tui hẽla hũ mơnuĩh ôh thơu tơma pơjũm sigỡuq, nữn mơnuĩh nữn ròq kađòc dơgrữq aràc gơrloh pơkhè sì kađòc dơgrữq mơnuĩh chahrơna, 25dơgrữq kaya padỡuq dơđỡuq dơlãp hatai mơnuĩh nữn ròq ràc tơviãq nĩq nũn, sì kơyua yơu nữn, tũq song vơviar rùp trỗt pãq ala hlùq, nữn mơnuĩh nữn ròq duh talơvãt Yàc Pô Lơngĩq, sì vrơi thơu làiq “Yàc Pô Lơngĩq viãq dòq di khrãh pơnõq adơi sơai.”

26Yơu nữn, ơ pơnõq adơi sơai, iỡuq ngãq yơu halơi nĩ? Dơlãp tũq pơnõq adơi sơai pơtõm gỡuq wỡq, dơgrữq tãl aràc hũ pơnuaĩq đơp adoh, hũ pơnuaĩq pơto pơđar, hũ kaya ràc tơviãq pơnuaĩq dơlãp dơđỡuq, hũ pơnuaĩq đơp chrih krơi, hẽla hũ kaya akhàt pa-tơviãq gơtha. Iỡuq luơi ga dơgrữq kaya ròq tơviãq trôh pơweh pa vruãq vỡq padỡc. 27Iỡuq mĩn hũ mơnuĩh halơi nữn đơp pơnuaĩq chrih krơi, nữn dơgrữq bãc hũ dua aràc hẽla lũ rlao wỡq la tlơu aràc, tui lơnãq, sì iỡuq hũ sa aràc pa-tơviãq gơtha. 28Dòq mơyah làiq ôh hũ asơi pa-tơviãq gơtha, nữn mơnuĩh nữn iỡuq dòq suà lìt dơlãp sàc Pơjũm Sơđah. Pa-vlữq wỡq, iỡuq đơp ga rùp phuỗt drơi gãm sì Yàc Pô Lơngĩq. 29Dòq dơgrữq mơnuĩh hũ kaya anĩt đơp hwơr, iỡuq luơi ga dua aràc hẽla tlơu aràc tơgùq đơp, dòq dơgrữq mơnuĩh tơmo iỡuq iãq pơwih. 30Nữn mơyah làiq hũ kaya hagĩq hũ ràc tơviãq ga sa aràc mơnuĩh halơi tơmo ãn dòq guh pơjũm, nữn mơnuĩh ãn đơp hlơu nữn iỡuq dòq suà lìt. 31Kơyua tui lơnãq, avih dơgrữq tãl aràc kung pơlih đơp hwơr, tồq ga dơgrữq mơnuĩh pơlih mơgrũ thơu sì dơgrữq aràc hũ kaya paluơ padờp. 32Suàt vơngãq dơgrữq mơnuĩh gơnuar hwơr hũ iỡuq ngãq tui dơgrữq mơnuĩh gơnuar hwơr. 33Kơyua Yàc Pô Lơngĩq ôh iỡuq la kaya gơvũl gơvãl hũ, nữn la kaya lơnang lơnai hũ.

Yơu dơlãp avih dơgrữq sàc pơjũm sơđah dơgrữq mơnuĩh gơnuar pơđar prõng hũ, 34mơnuĩh kamơi iỡuq suà lìt dơlãp sàc pơjũm sơđah. Kơyua pơnõq nhũ ôh hũ gơnuar đơp, nữn iỡuq ngãq tui, kung yơu voh-va song pơto pơđar. 35Nữn mơyah làiq pơnõq nhũ ưng mơgrũ thơu kaya hagĩq, nữn pơnõq nhũ iỡuq tơnĩa vơsàc drơi dòq pãq sàc, kơyua iỡuq viãq la đang mang mơlơu ơlah pơweh sì mơnuĩh kamơi pơh sãp di khrãh sàc pơjũm sơđah. 36Hẽla pơnuaĩq Yàc Pô Lơngĩq hũ akhàt tơviãq mưng pơnõq adơi sơai yơh? Hẽla pơnuaĩq Pitrai mĩn trôh sì pơnõq adơi sơai nữn soh?

37Mơyah làiq mơnuĩh halơi sơnơng làiq drơi la mơnuĩh gơnuar hwơr hẽla mơnuĩh gah suàt vơngãq, nữn mơnuĩh nữn iỡuq kơnãl thơu làiq dơgrữq pơnuaĩq hlãq wãq ga pơnõq adơi sơai la gơnuar pơđar Yàc hũ. 38Nữn mơyah làiq mơnuĩh halơi ôh ưng kơnãl thơu yơu nữn, nữn iỡuq luơi vẽq ga mơnuĩh nữn ôh kơnãl thơu jỡc.

39Kơyua yơu nữn, ơ pơnõq adơi sơai, iỡuq avih hatai đơp hwơr vẽq sì juơi pakỡuq đơp pơnuaĩq chrih krơi. 40Nữn iỡuq ngãq tơviãq vẽq dơgrữq vruãq savĩq iỡuq viãq sì dơlãp kaya ngãq tui lơnãq.