2 Kô-rin-tô 3

1Iỡuq mĩn pơnõq hlãq vloh pơdòq wỡq mơyòp krơi rùp phuỗt drơi? Hẽla yơu sa katih mơnuĩh, nữn vloh pơnõq hlãq ôh chàc sơrãq vrơi thơu pơyua trôh pa adơi sơai hẽla sơrãq pơyua mưng pơnõq adơi sơai? 2Rùp phuỗt adơi sơai la sơrãq pơyua vrơi thơu pơnõq hlãq, song hũ wãq dơlãp hatai pơnõq hlãq, aràc asơi kung thơu sì pơpoh jỡc, 3kơyua hũ ràc pa-tơviãq nĩq nũn làiq adơi sơai la sơrãq pơyua Yàc Dõc Pơ-tlah hũ, song hũ pơjao vrơi ga pơnõq hlãq iãq mưng, ôh iỡuq wãq mưng ia nhõm, nữn wãq mưng Vơngãq Sơđah Yàc Pô Lơngĩq gãm hadiuq hũ, ôh iỡuq wãq pãq dlòc pãng patơu, nữn la wãq dơlãp tũc hatai anàq mơnuĩh. 4Vơnah tơmo, gơnang mưng Yàc Dõc Pơ-tlah, pơnõq hlãq hũ hatai gơjãp gơnĩt yơu nữn pơweh sì Yàc Pô Lơngĩq. 5Ôh iỡuq kơyua pơnõq hlãq hũ tãl prãn mưng dơlãp rùp phuỗt drơi tồq sơnơng làiq ngãq yơu sa vruãq halơi nữn la voh chơtai mưng rùp phuỗt drơi. Pa-vlữq wỡq, kaya thơu rgơi pơnõq hlãq hũ pơdòq mưng Yàc Pô Lơngĩq, 6la Pitao song vrơi ga pơnõq hlãq kaya thơu rgơi ngãq mơnuĩh duh vruãq ga pơnuaĩq hẽ grưh vơhrơu, ôh iỡuq mưng ơkhar wãq, nữn la mưng Vơngãq Sơđah; kơyua ơkhar wãq ngãq pa-mơtai aràc, dòq Vơngãq Sơđah nữn vrơi kaya hadiuq. 7Vơnah tơmo, mơyah làiq gơnuar vruãq mưng kaya mơtai — hũ tliẽh mưng ơkhar pãq dlòc patơu — song ràc tơviãq dơlãp kaya gơhluh tơviãq jỡc anàq tơcho Is-ra-el ôh rgơi iãq tơpãq bòq mơta Môi-se kơyua mưng kaya gơhluh la padơh, pãq dlòc bòq mơta ung hũ, 8nữn ôh iỡuq gơnuar vruãq Vơngãq Sơđah vloh ròq hũ gơhluh brõq rlao ôh yơh? 9Kơyua mơyah làiq kaya gơhluh dòq pioh ga gơnuar vruãq kaya ngãq dlàiq, nữn gơnuar vruãq kaya tơpãq dãng vloh brõq vãq sơrè kaya gơhluh lũ rlao ôh thơu hadùp! 10Viãq, kơyua kaya song gãm hũ tũq hũ kaya gơhluh nữn ôh hũ kaya gơhluh mưng gah vơnah nĩ tơra, kơyua song hũ kaya gơhluh tơmo tơpa rlao wỡq. 11Kơyua mơyah làiq kaya sơmar tơpa gãt nữn dòq hũ kaya gơhluh, nữn kaya gãm hũ ôh luôĩq ròq trôh dơlãp kaya gơhluh brõq rlao ôh thơu hadùp!

12Kơyua nữn, tũq pơnõq hlãq song hũ kaya chơkhãq chàc yơu nữn, nữn yơh pơnõq hlãq viãq chãc khĩn, 13sì ôh drưh yơu Môi-se, ung song mãq sa vlah dơrning tlỗp di bòq mơta drơi tồq pioh ga vual vơla Is-ra-el ôh tũq halơi iãq tơpãq di bòq mơta nữn luôĩq hadơi kaya gơhluh ròq gãt tơpa. 14Bôh làiq yơu nữn, dlò sơnơng pơnõq nhũ mĩn dòq khãc gơvãl, kơyua tãl trôh harơi nĩ, hũ sigỡuq sa vlah dơrning nữn gãm dòq dơlãp vruãq pơpoh pơnuaĩq hẽ grữh tlãq, kơyua ôh-ka pơh tơviãq, nữn la kơyua mưng dơlãp Yàc Dõc Pơ-tlah, nữn nhũ kađòc suãq tlàq. 15Yơu nữn, tãl trôh harơi nĩ, mơyah làiq tũq halơi voh-va Môi-se hũ pơpoh tơviãq, nữn hũ vlah dơrning tlỗp vơvãc hatai pơnõq nhũ, 16dòq mơyah làiq mơnuĩh halơi nữn gơlàiq mai pơweh pa Yàc, nữn vlah dơrning nữn ròq suãq tlàq. 17Vơnah tơmo, Yàc la Vơngãq Sơđah, sì anĩh halơi hũ Vơngãq Sơđah Yàc dòq, nữn pãq đỡn hũ kaya lơnang lơnai. 18Dòq avih tãl aràc pơnõq drơi, mưng bòq mơta ôh tlỗp vơvãc, pơsàc sơdah kaya gơhluh Yàc hũ, nữn ãn hũ pa-sơdua tơviãq jỡc sa sẽq vơlai sigỡuq mưng kaya gơhluh trôh kaya gơhluh, drưh yơu mưng Yàc, la Vơngãq Sơđah.