2 Kô-rin-tô 12:9

1Nữn la kaya hlãq iỡuq yeh drơi, bôh làiq ôh va trôh kaya kuơ màc hagĩq, nữn hlãq ròq đơp patui wỡq mưng dơgrữq kaya pabôh sì dơgrữq kaya ràc tơviãq Yàc hũ. 2Hlãq thơu sa aràc mơnuĩh dơlãp Yàc Dõc Pơ-tlah, sa plôh pàq thũt hlơu — nhũ dòq dơlãp rùp phàp hẽla lơniãu rùp phàp hlãq ôh thơu, nữn Yàc Pô Lơngĩq thơu — sa aràc mơnuĩh yơu nữn song hũ va tơgùq tãl trôh tãl lơngĩq bãc tlơu. 3Hlãq thơu sa aràc mơnuĩh yơu nữn — bôh làiq dơlãp rùp phàp hẽla gah lơniãu rùp phàp, hlãq ôh thơu, nữn Yàc Pô Lơngĩq thơu — 4mơnuĩh nữn song hũ va tơgùq trôh pãq anĩh Ba-ra-đi sì song hmỡq dơgrữq pơnuaĩq ôh tũq halơi đơp jỡc, nữn kung ôh vrơi sa aràc halơi hũ gơnuar đơp tơviãq. 5Kơyua hũ mơnuĩh yơu nữn, hlãq hũ pa-prõc rùp. Nữn pơweh sì rùp phuỗt hlãq, hlãq ôh pa-prõc rùp, hlãq mĩn pa-prõc rùp mưng kaya lơduh lơmuỡn hlãq hũ. 6Kơyua mơyah làiq hlãq ưng pa-prõc rùp, nữn hlãq ròq ôh iỡuq la gơla pơtòq, kơyua hlãq ròq đơp kaya tơpãq viãq; nữn hlãq dòq iẽt amiẽt wỡq, huaĩq làiq sa aràc mơnuĩh halơi nữn pơlih sơnơng pơyòp hlãq tơpa rlao kaya mơnuĩh nữn iãq bôh dơlãp hlãq hẽla hmỡq mưng hlãq. 7Kơyua mưng kaya pabôh tơviãq dlòc dloòng prõng màc hũ, yơu nữn tồq ga hlãq ôh tơviãq jỡc pa-dlòc rùp yeh drơi, nữn sa bẽq druơi hluỡq sơrõc tơmã dơlãp rơlo hlãq — nữn la sa aràc kamlai ãt pơđar mưng Sa-tan — pioh ga nhũ pơlih pahanh pơđãoq hlãq, tồq ga hlãq ôh pa-dlòc rùp yeh drơi. 8Mưng vruãq nĩ, hlãq song iơu lakơu sì Yàc tlơu bãc tồq ga Pitrai suãq tơviãq nhũ tlah mưng hlãq. 9Nữn Pitrai hẽ sì hlãq: “Kaya anĩt Kơu song tãl ga anàq vloh, kơyua gơnuar chơnuãq Kơu song hũ wil tãl dơlãp kaya lơduh lơmuỡn.” Yơu nữn, hlãq ròq viãq sơh sơr hũ pa-prõc rùp rlao wỡq mưng kaya lơduh lơmuỡn hlãq, tồq ga gơnuar chơnuãq Yàc Dõc Pơ-tlah miẽt dòq pãq dlòc hlãq. 10Kơyua nữn, hlãq siàp hatai dơlãp dơgrữq kaya lơduh lơmuỡn, kaya siẽq siẽl, kaya rũc rài, kaya mãq pakỡuq, savỡc rỡc kơyua mưng Yàc Dõc Pơ-tlah; kơyua tũq halơi hlãq lơduh lơmuỡn, nữn tũq nữn hlãq hũ prãn khãc.

11Hlãq song tơviãq jỡc mơnuĩh gơla pơtòq; rùp phuỗt pơnõq adơi sơai song pagùq pơ-èp hlãq yơu nữn. Kơyua hlãq iỡuq viãq tũq hũ pơnõq adơi sơai sơ-uỗt mơyòp, kơyua hlãq song ôh siẽuq sa kaya hagĩq mưng “mơnuĩh gơnuar pơđar prõng” dih hũ, bôh làiq vloh hlãq ôh la hagĩq ôh. 12Viãq, dơgrữq kaya chưng tang mơnuĩh gơnuar pơđar hũ song akhàt tơviãq di khrãh pơnõq adơi sơai gãm sì avih dơgrữq kaya ãt ỡl — gãm kaya nỡm krơi sì kaya krơi tơmo, gãm sì dơgrữq vruãq gơnuar chơnuãq. 13Kơyua halơi la kaya nữn pơnõq adơi sơai kađòc siẽuq rlao sì dơgrữq sàc pơjũm sơđah tơmo, lơniãu sì vruãq rùp phuỗt hlãq song ôh ngãq dleh dlàr ga pơnõq adơi sơai? Iỡuq tleh dlàiq ga hlãq mưng kaya sỗq suẽl nĩ!

14Nĩ yơh, hlãq song rơchãc lơĩh pioh nao trôh sì pơnõq adơi sơai bãc tlơu wỡq, sì hlãq ròq ôh ngãq dleh dlàr ga pơnõq adơi sơai hagĩq ôh. Kơyua hlãq ôh duah dơgrữq kaya pơnõq adơi sơai hũ, nữn mĩn la duah rùp phuỗt pơnõq adơi sơai. Kơyua ôh iỡuq anàq tơcho duah rơmiãq pioh ga ami ama, nữn la ami ama rơmiãq pioh ga anàq tơcho. 15Dòq hlãq ròq viãq sơh sơr ãt lơhiãq avih jĩn priãq, vloh ãt lơhiãq gãm prãn khãc hlãq hũ kơyua mưng suàt vơngãq pơnõq adơi sơai. Mơyah làiq hlãq pơtãl kaya khiãng duman di pơnõq adơi sơai, nữn pơnõq adơi sơai ròq khiãng duman di hlãq tơkìq yơh? 16Nữn iỡuq luơi dòq yơu nữn, rùp phuỗt hlãq song ôh ngãq dleh dlàr ga pơnõq adơi sơai, bôh làiq yơu nữn, kơyua la mơnuĩh khưh rgơi, nữn hlãq song mãq mưng kaya vlữq lor nữn hũ pa-gơla pơnõq adơi sơai. 17Yơu nữn sa aràc halơi nữn, nữn la mơnuĩh hlãq pơđar nao trôh sì pơnõq adơi sơai, nữn hlãq song mãq mưng mơnuĩh nữn pioh ka-nơ di pơnõq adơi sơai yơh? 18Hlãq song pơto pasũl Tit sì pơđar gãm sa aràc adơi sơai tơmo nao sigỡuq sì nhũ. Nữn iỡuq lơĩh Tit song ka-nơ di pơnõq adơi sơai? Pơnõq hlãq song ôh yàp nao sigỡuq sì sa vơngãq hatai yơh? Vloh ôh nao tui sigỡuq sa voh jơlàt ơthua yơh?

19Mưng tũq chơmrờp, iỡuq lơĩh pơnõq adơi sơai sơnơng làiq pơnõq hlãq ãn dõc jơga sì pơnõq adơi sơai? Pơnõq hlãq la ãn đơp di anãq Yàc Pô Lơngĩq dơlãp Yàc Dõc Pơ-tlah. Nữn, ơ pơnõq adơi sơai anĩt duman, avih dơgrữq kaya nĩ la kơyua hũ kuơ màc ga vruãq vỡq padỡc pơnõq adơi sơai. 20Kơyua hlãq ka-ồq, huaĩq làiq tui yơu pơnẽq halơi nữn, hadơi sì tũq trôh, hlãq ôh pơlih iãq bôh pơnõq adơi sơai yơu dơgrữq kaya nữn hlãq chơkhãq khiãng, pơnõq adơi sơai kung ôh iãq bôh hlãq yơu kaya nữn adơi sơai chơkhãq chàc; huaĩq halơi nữn hũ kaya gơrlah pơnuaĩq, lơmùq mơvai, kaya ơnõc mơvai, mơvlah kơchah, đơp iãh, đơp lakồq aràc, yeh drơi, ngãq salũng sơlãng, 21hlãq kung huaĩq làiq tũq hlãq gơlàiq mai wỡq sa bãc tơra, Yàc Pô Lơngĩq hlãq hũ pơlih ngãq ga hlãq iỡuq mơlơu bòq mơta di anãq pơnõq adơi sơai, sì hlãq pơlih ròq iỡuq ngãq pa ka-ồq ka-iãp mưng lũ mơnuĩh dơlãp dơgrữq mơnuĩh tũq hlơu thrơi song sỗq dlàiq nữn song ôh mơvai tlàq dlàiq mưng dơgrữq vruãq tasỡuq nrãc, kaya arĩh athãm, kaya ngãq ling lang nữn pơnõq nhũ song sỗq.