2 Kô-rin-tô 11

1Hlãq chơkhãq khiãng adơi sơai gui ãt sa asĩt kaya gơla pơtòq hlãq hũ sì viãq la adơi sơai ãn gui ãt hlãq nữn! 2Kơyua hlãq mãq ngãq sàq hatai mưng adơi sơai, sigỡuq sì hatai lơmùq mơvai Yàc Pô Lơngĩq hũ, kơyua mưng hlãq song hẽ pa-khiãng adơi sơai ga sa aràc vơsàc, pioh vrơi pa-thơu pơnõq adơi sơai yơu sa aràc mơnuĩh kamơi dơra sơđah sơchih ga Yàc Dõc Pơ-tlah. 3Nữn hlãq huaĩq, làiq tui yơu pơnẽq halơi nữn, yơu anàq ala song pa-gơla E-va mưng kaya vlữq lor nhũ hũ, nữn dlò sơnơng pơnõq adơi sơai pơlih kađòc pa-gơla tui ngãq lơhiãq hatai tơpãq viãq sì sơđah sơchih pioh ga Yàc Dõc Pơ-tlah. 4Kơyua mơyah làiq hũ mơnuĩh halơi nữn trôh akhàt vrơi pa-thơu sa aràc Je-su tơmo nữn pơnõq hlãq song ôh pơto akhàt, hẽla pơnõq adơi sơai tồq mãq sa vơngãq tơmo, ôh iỡuq Pitao pơnõq adơi sơai song tồq mãq, hẽla sa Pơnuaĩq Siàp tơmo nữn pơnõq adơi sơai song ôh tồq mãq, nữn pơnõq adơi sơai viãq kung gui ãt gãm!

5Dòq hlãq iãq bôh drơi ôh hũ kaya hagĩq tìt rlao sì dơgrữq “mơnuĩh gơnuar pơđar prõng” dih. 6Nữn vloh bôh làiq la hlãq rgơi dơlãp vruãq pơto akhàt, yơu nữn ôh iỡuq hlãq rgơi mưng vruãq jãc rgơi, nữn dơlãp dơgrữq vruãq song ràc tơviãq gơnĩt ga pơnõq adơi sơai vloh. 7Hẽla iỡuq mĩn hlãq sỗq dlàiq, dơlãp tũq pơviar rùp pioh ga pơnõq adơi sơai hũ pồq pa-tơgùq, kơyua hlãq song ràc akhàt Pơnuaĩq Siàp Yàc Pô Lơngĩq hũ savĩq vrơi soh ga pơnõq adơi sơai? 8Hlãq song mãq mưng dơgrữq Sàc Pơjũm Sơđah tơmo, tũq tồq mãq kaya dõc mưng pơnõq nhũ hũ, pioh duh vruãq pơnõq adơi sơai. 9Dơlãp tũq lơwah hlãq dòq sì pơnõq adơi sơai — tũq pãp kaya siỡuq rơbah — hlãq ôh ngãq tơviãq kaya dleh dlàr ga sa aràc mơnuĩh halơi. Kơyua hadơi sì tũq trôh pãq đì, pơnõq adơi sơai mưng Ma-se-đoan song dõc vrơi avih dơgrữq kaya ga hlãq, sì dơlãp dơgrữq vruãq, hlãq song rơmiãq jàc sì ròq rơmiãq jàc rùp phuỗt hlãq ôh ngãq dleh dlàr ga pơnõq adơi sơai. 10Pơnuaĩq tơpãq viãq Yàc Dõc Pơ-tlah hũ dòq dơlãp hlãq, kơyua yơu nữn pa-prõc rùp nĩ mưng rùp phuỗt hlãq ròq ôh kađòc asơi mãq pakỡuq jỡc dơlãp dơgrữq phũm vơsai pãq char A-chai. 11Kơyua kaya hagĩq lơĩq? Kơyua hlãq ôh khiãng duman pơnõq adơi sơai yơh? Hũ Yàc Pô Lơngĩq thơu hlãq.

12Dòq kaya hlãq ãn ngãq, nữn hlãq kung ròq ngãq wỡq, tồq ga hlãq pơlih pa-trơh tơviãq tũq lơwah dơgrữq mơnuĩh chơkhãq khiãng ka-nơ tũq lơwah nữn pơnõq nhũ ãn yeh rùp, pơnõq nhũ kung pơlih hũ iãq bôh drưh yơu pơnõq hlãq. 13Kơyua dơgrữq mơnuĩh yơu nữn la mơnuĩh gơnuar pơđar vlữq lor, la mơnuĩh ngãq vruãq pa-gơla aràc, tũq ngãq yơu mơnuĩh gơnuar pơđar Yàc Dõc Pơ-tlah hũ. 14Vruãq nĩ ôh chrih krơi hagĩq, kơyua rùp phuỗt kamlai Sa-tan kung ngãq yơu mơnuĩh gơnrơh sơđah gơchràq. 15Kơyua yơu nữn ôh kaya hagĩq mãq ngãq krơi hagĩq mơyah làiq halỗt mơnãq nhũ hũ kung mãq angãn ngãq yơu mơnuĩh duh vruãq kaya tơpãq pãq dãng, nữn luôĩq hadơi pơnõq nhũ nữn ròq tồq mãq iỡuq yơu sì dơgrữq vruãq pơnõq nhũ ngãq.

16Hlãq lakơu đơp wỡq làiq: Juơi hũ mơnuĩh halơi đơp làiq hlãq gơla pơtòq. Nữn mơyah làiq, asơi miẽt sơnơng yơu nữn, nữn kung iỡuq tồq ròq hlãq yơu mơnuĩh gơla pơtòq, pioh hlãq kung pơlih yeh rùp sa asit mĩn. 17Pơnuaĩq hlãq jẽq đơp, ôh iỡuq la đơp tui hatai ưng Yàc, nữn la yơu sa aràc mơnuĩh gơla pơtòq dơlãp kaya ngãq gơnĩt viãq sì hũ pa-prõc rùp nĩ. 18Kơyua hũ lũ mơnuĩh yeh drơi tui rơlo rùp, yơu nữn hlãq kung ròq yeh drơi. 19Kơyua bôh làiq la dơgrữq mơnuĩh jãc rgơi, nữn pơnõq adơi sơai ãn dòq siàp hatai ãt ỡl mơnuĩh gơla pơtòq dih. 20Kơyua mơyah làiq mơnuĩh halơi mãq pơnõq adơi sơai ngãq halỗt, mơyah làiq mơnuĩh halơi bõc luỗt adơi sơai, mơyah làiq mơnuĩh halơi ka-nơ pơnõq adơi sơai, mơyah làiq mơnuĩh halơi pa-dlòc rùp yeh drơi, mơyah làiq mơnuĩh halơi pah di bòq mơta adơi sơai, nữn pơnõq adơi sơai mĩn ãt ỡl. 21Hlãq mãq ngãq mơlơu ơlah sì đơp pơnuaĩq nĩ làiq pơnõq hlãq lơduh lơmuỡn uãn nữn ôh ngãq yơu pơnõq nhũ jỡc! Bôh làiq yơu nữn, mơyah làiq hũ mơnuĩh halơi khĩn yeh drơi mưng dơgrữq kaya hagĩq nữn — hlãq ãn đơp yơu mơnuĩh gơla pơtòq — hlãq kung khĩn yeh drơi yơu nữn. 22Mĩn pơnõq nhũ la mơnuĩh He-bơ-rơ? Hlãq kung yơu nữn. Mĩn pơnõq nhũ la mơnuĩh Is-ra-el? Hlãq kung yơu nữn. Mĩn pơnõq nhũ la anàq tơcho A-bra-ham? Hlãq kung yơu nữn. 23Pơnõq nhũ la mơnuĩh halỗt mơnãq Yàc Dõc Pơ-tlah yơh? (Hlãq đơp yơu la drơi lơhiãq dlò sơnơng) Hlãq dòq rlao nữn wỡq: kơyua hlãq vloh song ãt ngãq dleh dlàr rlao, kađòc dòq jam lũ rlao, ãt atòc poh lũ viãq, lũ bãc jẽq mơtai. 24Lơmã bãc hlãq song kađòc mơnuĩh Ju-đa poh pờc, dòq siẽuq sa blẽq tơra la tãl pàq plôh. 25Tlơu bãc hlãq kađòc poh mưng gai hơwai. Sa bãc hlãq kađòc prah patơu. Tlơu bãc hlãq kađòc krãp ahòq. Hlãq kung ãt tơpa gãt sa harơi sa mơlãp dòq pãq tơsìq dơlãp; 26vloh lũ bãc hlãq nao jơlàt, tơpa gãt pãp lũ kaya savỡc rỡc pãq ia kròc, savỡc rỡc sì dơgrữq mơnuĩh tlẽq sơwah, savỡc rỡc sì vual vơla drơi, savỡc rỡc sì vual vơla lơniãu, savỡc rỡc dơlãp dơgrữq palơi prong, savỡc rỡc dơlãp blàc choah, savỡc rỡc pãq dơlãp khrãh ia tơsìq, savỡc rỡc sì pơnõq adơi sơai ngãq vlữq lor; 27hlãq song tơpa gãt kaya dleh dlàr sì kãn dơmãl, lũ tũq mơlãp ôh hũ pìq, ãt ờq lơ-pa sì mơhao ia, gãm dòq dơlãp kaya ãt bõc, ãt lơ-ãt mơrìt sì dòq kalôh; 28Lơniãu kaya nữn, dòq hũ dơgrữq kaya tơmo, dơgrữq harơi hlãq kung ãt sơnơng thơu ka-ồq ka-ãn ga avih dơgrữq Sàc Pơjũm Sơđah. 29Hũ asơi lơduh lơmuỡn nữn hlãq ôh lơduh lơmuỡn? Hũ asơi kađòc sơnẽq sỗq nữn hlãq vloh ôh yơu aràc chôh yơh?

30Mơyah làiq đơp pa-mơyeh, nữn hlãq ròq đơp pa-mơyeh tơviãq dơgrữq kaya lơduh lơmuỡn drơi hũ. 31Yàc Pô Lơngĩq, la Ama Yàc Je-su hũ, Pitao đang mang sì sơ-uỗt mơyòp tãl trôh gãm gãm, thơu làiq hlãq ôh đơp lor ôh! 32Pãq Đa-mach, mơnuĩh pô apãt akõq prõng dòq gah ala gơnuar pitao A-re-ta dòq iãq jàc palơi Đa-mach pioh mãq krỡq hlãq. 33Nữn hũ mơnuĩh song padũng hlãq trỗt mưng vai pãq sa voh bãc huơi pãq dlòc jơnãng palơi prõng, sì hlãq tơviãq tlah mưng tơngãn ung nữn.