2 Kô-rin-tô 13

1Nĩ la bãc tlơu hlãq nao trôh rơwãc pơnõq adơi sơai. “Avih dơgrữq vruãq ròq hũ ngãq pơsiàp wỡq gơnang di pơnuaĩq ngãq chưng dua aràc hẽla tlơu aràc.” 2Hlãq song đơp vrơi thơu halơu vloh tũq hlãq trôh bãc dua, sì tũq nĩ, bôh làiq dơđỡuq mơta, hlãq kung đơp sì — dơgrữq mơnuĩh halơu sì tũq song sỗq dlàiq, sigỡuq sì avih dơgrữq mơnuĩh tơmo wỡq — làiq mơyah làiq hlãq trôh rơwãc wỡq sa bãc tơra, nữn hlãq ròq ôh ãt ỡl avih tãl aràc mơnuĩh halơi, 3kơyua pơnõq adơi sơai ưng bôh kaya chưng tang Yàc Dõc Pơ-tlah ãn pơto pơđar mưng hlãq, la Pitao ôh lơduh lơmuỡn pơweh sì pơnõq adơi sơai ôh, nữn prãn khãc viãq dơlãp pơnõq adơi sơai. 4Kơyua bôh làiq Pitrai ãt pỡc đĩn pãq dlòc kayơu pỡc dơlãp wãc rơsì lơduh lơmuỡn, nữn Pitrai vloh ãn hadiuq kơyua mưng gơnuar chơnuãq Yàc Pô Lơngĩq hũ. Pơnõq hlãq kung lơduh lơmuỡn dơlãp Pitrai, nữn pơnõq hlãq ròq hadiuq sì Pitrai kơyua mưng gơnuar chơnuãq Yàc Pô Lơngĩq hũ pơweh sì pơnõq adơi sơai.

5Adơi sơai iỡuq iãq pơwih krơi rùp drơi pioh mững drơi hũ dòq dơlãp voh tui mĩn. Iỡuq lòc iãq drơi. Hẽla pơnõq adơi sơai ôh sơnơng bôh jỡc làiq Yàc Dõc Pơ-tlah Je-su ãn dòq dơlãp drơi yơh — lơniãu sì tũq pơnõq adơi sơai ôh tơpa gãt jỡc kaya lòc drơi hũ? 6Sì hlãq chơkhãq khiãng ga adơi sơai ròq thơu làiq pơnõq hlãq song tơpa gãt dơgrữq kaya lòc vloh. 7Tũq nĩ, pơnõq hlãq rãn lakơu Yàc Pô Lơngĩq ga adơi sơai juơi ngãq kaya hagĩq sỗq suẽl, ôh iỡuq pioh ga pơnõq hlãq hũ ngãq yơu song tơpa gãt dơgrữq kaya lòc drơi, nữn la pioh ga pơnõq adơi sơai pơlih ngãq kaya siàp, bôh làiq pơnõq hlãq ngãq yơu ôh tơpa gãt jỡc kaya lòc. 8Kơyua pơnõq hlãq ôh tũq halơi rgơi ngãq dơgrữq kaya hagĩq jơdrãq sì pơnuaĩq tơpãq, nữn mĩn dòq dỡc pãq gah pơnuaĩq tơpãq. 9Kơyua pơnõq hlãq uỗt sơh dơlãp tũq pơnõq hlãq lơduh lơmuỡn sì adơi sơai hũ prãn khãc. Pơnõq hlãq kung iơu lakơu tồq ga adơi sơai jỡc wil tãl. 10Kơyua yơu nữn, hlãq wãq dơgrữq pơnuaĩq nĩ tũq lakồq mơta, pioh dơlãp tũq hlãq bôh mơta nữn hlãq ôh chàc ngãq nao savĩq gơmrữq sì adơi sơai tui yơu gơnuar chơnuãq hlãq hũ, la gơnuar chơnuãq Yàc pơjao vrơi ga hlãq pioh vỡq padỡc ga adơi sơai mĩn ôh iỡuq la pioh pa-lơhiãq adơi sơai.

11Luôĩq hadơi, pa-thơu pơnõq adơi sơai, iỡuq uỗt sơh vẽq! Iỡuq pơweh trôh kaya pơdòq pơsiàp, paluơ padờp gỡuq, sa hatai sigỡuq, hadiuq salơnuãq sigỡuq. Vloh Yàc Pô Lơngĩq kaya anĩt duman hũ sì kaya dadu lơngai ròq dòq sì adơi sơai.

12Iỡuq chuãq rơwãc gỡuq mưng kaya chũm sơđah sơchih. Avih dơgrữq gơnuar pơđar sơđah chuãq rơwãc adơi sơai.

13Lakơu kaya anĩt Yàc Dõc Pơ-tlah Je-su sigỡuq sì kaya khiãng duman Yàc Pô Lơngĩq hũ sì kaya salơvãq Yàc Vơngãq Sơđah hũ dòq sigỡuq avih tãl aràc adơi sơai.