1 Jãng 4:7

1Ơ pơnõq adơi sơai anĩt duman, juơi pãc-tui gơnang dơgrữq vơngãq, nữn iỡuq lòc dơgrữq vơngãq pioh iãq tơpuôl nhũ iỡuq lơĩh la trôh mưng Yàc Pô Lơngĩq, kơyua hũ lũ gơnuar hwơr vlữq lor song nao tơma vãq avih dơlãp dun kơyua. 2Gơnang mưng kaya nĩ, pơnõq adơi sơai ròq kơnãl thơu Vơngãq Sơđah Yàc Pô Lơngĩq hũ: Yàc Vơngãq halơi nữn akhàt tơviãq làiq Yàc Dõc Pơ-tlah Je-su song trôh dơlãp rơlo rùp, nữn la vơngãq trôh mưng Yàc Pô Lơngĩq, 3dòq vơngãq halơi nữn ôh akhàt tơviãq angãn Yàc Je-su nữn ôh iỡuq mưng Yàc Pô Lơngĩq. Nữn la vơngãq mơnuĩh jơdrãq sì Yàc Dõc Pơ-tlah nữn pơnõq adơi sơai song hmỡq làiq ãn trôh, sì tũq nĩ dòq dơlãp dun kơyua vloh. 4Ơ dơgrữq pơnõq anàq, pơnõq anàq la pơweh pa Yàc Pô Lơngĩq, sì song pha rlao tơpuôl nhũ, kơyua Pitao dòq dơlãp pơnõq anàq prõng rlao mơnuĩh dòq dơlãp dun kơyua. 5Tơpuôl nhũ pơweh pa dun kơyua. Kơyua mưng nữn, pơnõq nhũ đơp tui dun kơyua, sì mơnuĩh dun kơyua hmỡq tơpuôl nhũ. 6Pơnõq drơi pơweh pa Yàc Pô Lơngĩq. Mơnuĩh halơi thơu Yàc Pô Lơngĩq nữn hmỡq pơnõq drơi. Dòq mơnuĩh halơi ôh pơweh pa Yàc Pô Lơngĩq nữn ôh hmỡq pơnõq drơi. Gơnang di kaya nữn, pơnõq drơi kơnãl thơu vơngãq pơnuaĩq tơpãq sì vơngãq kaya sỗq suẽl hũ.

7Ơ pơnõq adơi sơai anĩt duman, pơnõq drơi iỡuq khiãng duman di gỡuq, kơyua kaya khiãng duman la trôh mưng Yàc Pô Lơngĩq, sì mơyah làiq mơnuĩh halơi anĩt duman nữn hũ pajỡc tơviãq mưng Yàc Pô Lơngĩq sì kơnãl thơu Yàc Pô Lơngĩq. 8Mơnuĩh halơi ôh khiãng duman nữn ôh thơu Yàc Pô Lơngĩq, kơyua Yàc Pô Lơngĩq la kaya khiãng duman. 9Kaya khiãng duman Yàc Pô Lơngĩq hũ song ràc pa-tơviãq di khrãh pơnõq drơi dơlãp kaya nĩ, nữn la Yàc Pô Lơngĩq song pơđar Anàq Sa Pitrai hũ trôh dơlãp dun kơyua pioh pơnõq drơi hũ hadiuq gơnang mưng Anàq nữn. 10Kaya khiãng duman dòq dơlãp kaya nĩ, nữn ôh iỡuq pơnõq drơi song anĩt duman Yàc Pô Lơngĩq, sì nữn la Pitrai song khiãng duman pơnõq drơi, sì pơđar Anàq Pitrai ngãq jỡc kaya padỡc pioh dơvuh dlàiq kơyua dlàiq dơnũh pơnõq drơi hũ. 11Ơ dơgrữq pơnõq adơi sơai anĩt duman, mơyah làiq Yàc Pô Lơngĩq song khiãng duman pơnõq drơi yơu halơi, nữn pơnõq drơi kung iỡuq khiãng duman di gỡuq yơu nữn. 12Ôh hũ mơnuĩh halơi iãq bôh Yàc Pô Lơngĩq. Mơyah làiq pơnõq drơi khiãng duman di gỡuq, nữn Yàc Pô Lơngĩq miẽt dòq gãm dơlãp pơnõq drơi sì kaya khiãng duman Pitrai hũ wil tãl dơlãp pơnõq drơi. 13Gơnang mưng kaya nĩ pơnõq drơi thơu làiq drơi miẽt dòq gãm dơlãp Pitrai sì Pitrai dòq dơlãp pơnõq drơi, nữn la Pitrai song vrơi ga pơnõq drơi Vơngãq Sơđah Pitrai. 14Pơnõq hlãq kung song bôh sì ãn ngãq chưng làiq Ama song pơđar Anàq ngãq Yàc Dõc ga dun kơyua hũ. 15Avih dơgrữq mơnuĩh halơi akhàt tơviãq làiq Yàc Je-su la Anàq Yàc Pô Lơngĩq, nữn Yàc Pô Lơngĩq miẽt dòq gãm dơlãp mơnuĩh nữn, sì mơnuĩh nữn dòq dơlãp Yàc Pô Lơngĩq. 16Pơnõq drơi song thơu sì pãc-tui kaya khiãng duman nữn Yàc Pô Lơngĩq hũ dòq dơlãp pơnõq drơi. Yàc Pô Lơngĩq la kaya khiãng duman, sì mơnuĩh halơi miẽt dòq dơlãp kaya khiãng duman nữn la dòq gãm dơlãp Yàc Pô Lơngĩq, sì Yàc Pô Lơngĩq dòq dơlãp mơnuĩh nữn. 17Gơnang mưng nữn, kaya khiãng duman song ngãq jỡc wil tãl sigỡuq sì pơnõq drơi pioh ga pơnõq drơi hũ kaya gơjãp hatai dơlãp harơi chahrơna, kơyua Pitrai la yơu halơi nữn pơnõq drơi kung yơu nữn dơlãp dun kơyua nĩ. 18Kaya huaĩq tatơh ôh tũq halơi dòq gơjãp dơlãp kaya khiãng duman, pa-vlữq wỡq, kaya khiãng duman wil tãl prah tlàq kaya tatơh huaĩq tơviãq gah lơniãu, kơyua kaya huaĩq tatơh pơkãp sigỡuq sì kaya ngãq dlàiq. Dòq mơnuĩh halơi huaĩq tatơh nữn ôh-ka wil tãl dơlãp kaya khiãng duman. 19Pơnõq drơi anĩt duman kơyua Yàc Pô Lơngĩq song khiãng duman pơnõq drơi hlơu. 20Mơyah làiq mơnuĩh halơi đơp làiq: “Hlãq khiãng duman Yàc Pô Lơngĩq,” nữn vloh lơmùq mơvai adơi sơai drơi, nữn la mơnuĩh đơp lor. Kơyua mơnuĩh halơi ôh anĩt duman adơi sơai drơi la mơnuĩh drơi bôh nữn mơnuĩh nữn ôh tũq halơi khiãng duman Yàc Pô Lơngĩq la Pitao drơi ôh bôh jỡc. 21Viãq, pơnõq drơi tồq mãq kaya pơđar-va nĩ mưng anĩh Pitrai, nữn la mơnuĩh halơi khiãng duman Yàc Pô Lơngĩq nữn kung iỡuq khiãng duman adơi sơai drơi.