1 Jãng 3

1Iỡuq iãq vẽq Ama song vrơi kaya khiãng duman ôh thơu hadùp ga pơnõq drơi, nữn jỡc pơnõq drơi hũ angãn la anàq tơcho Yàc Pô Lơngĩq, sì pơnõq drơi viãq yơu nữn. Kơyua kanõh nĩ, dun kơyua ôh thơu pơnõq drơi, kơyua dun kơyua ôh thơu Pitrai. 2Ơ dơgrữq adơi sơai khiãng duman, tũq nĩ pơnõq drơi la anàq tơcho Yàc Pô Lơngĩq, dòq pơnõq drơi ròq la yơu halơi nữn ka-ôh akhàt pa-tơviãq. Pơnõq drơi thơu làiq tũq Pitrai ròq pabôh tơviãq, pơnõq drơi ròq tơviãq jỡc drưh yơu Pitrai, kơyua pơnõq drơi ròq bôh Pitrai yơu Pitrai gãm hũ. 3Sì dơgrữq mơnuĩh halơi hũ kaya chơkhãq chàc nĩ dơlãp Pitrai, nữn ngãq krơi ga drơi sơdah sơchih, yơu Pitrai la sơdah sơchih. 4Avih dơgrữq aràc halơi sỗq dlàiq kung la ngãq kaya jơdrãq sì voh-va. Viãq yơu nữn, dlàiq dơnũh nữn la kaya jơdrãq sì voh-va. 5Pơnõq adơi sơai thơu làiq mĩn rùp phuỗt Pitrai song pabôh tơviãq pioh suãq tlàq dlàiq dơnũh, sì dlàiq dơnũh ôh dòq dơlãp Pitrai. 6Mơyah làiq mơnuĩh halơi miẽt dòq dơlãp Pitrai nữn ròq ôh dòq gãm dơlãp dlàiq dơnũh. Dòq mơyah làiq mơnuĩh halơi miẽt ngãq sỗq dlàiq nữn ôh-ka bôh Pitrai, kung ôh-ka thơu kơnãl Pitrai. 7Ơ pơnõq anàq, juơi luơi aràc halơi pa-gơla pơnõq anàq nao sỗq suẽl. Mơnuĩh halơi ngãq kaya tơpãq dãng, la tơpãq dãng, yơu rùp phuỗt Pitrai la tơpãq dãng. 8Mơnuĩh halơi miẽt sỗq dlàiq nữn la pơweh pa kamlai, kơyua kamlai song sỗq dlàiq mưng tũq chơmrờp. Kơyua yơu nữn, Anàq Yàc Pô Lơngĩq song trôh pioh yah pa-lơhiãq vruãq ngãq kamlai hũ. 9Mơyah làiq mơnuĩh halơi ròq hũ pajỡc tơviãq mưng Yàc Pô Lơngĩq nữn ôh dòq miẽt sỗq dlàiq kơyua gar pơjẽh hadiuq Pitrai hũ gãm dòq dơlãp mơnuĩh nữn. Sì mơnuĩh nữn ôh tũq halơi sỗq dlàiq kơyua song hũ pajỡc tơviãq mưng Yàc Pô Lơngĩq. 10Gơnang mưng kaya nĩ anàq tơcho Yàc Pô Lơngĩq sì anàq tơcho kamlai hũ kaya pa-chơlah krơi nĩq nũn: Mơyah làiq mơnuĩh halơi ôh ngãq kaya tơpãq dãng la ôh pơweh pa Yàc Pô Lơngĩq, sì mơnuĩh ôh khiãng duman adơi sơai drơi kung yơu nữn. 11Kơyua nĩ la pơnuaĩq pơto akhàt nữn pơnõq anàq song hmỡq mưng tũq chơmrờp, nữn la pơnõq drơi iỡuq khiãng duman di gỡuq, 12juơi yơu Ka-in, la mơnuĩh pơweh pa kamlai sì song pa-mơtai adơi drơi. Kơyua kanõh yơu halơi nữn ung song pa-mơtai adơi drơi? Nữn la kơyua dơgrữq vruãq ngãq ung hũ la iãh mơsãc, nữn dơgrữq vruãq ngãq adơi ung hũ la tơpãq dãng.

13Ơ pơnõq adơi sơai, juơi mãq ngãq krơi mơyah làiq dun kơyua lơmùq mơvai pơnõq adơi sơai. 14Pơnõq drơi thơu làiq drơi song gãt tơpa tlah mưng kaya mơtai sì tơma dơlãp kaya hadiuq, kơyua pơnõq drơi khiãng duman adơi sơai drơi. Mơnuĩh halơi ôh anĩt duman nữn miẽt dòq dơlãp kaya mơtai. 15Mơyah làiq mơnuĩh halơi lơmùq mơvai adơi sơai drơi la mơnuĩh pa-mơtai mơnuĩh, sì pơnõq adơi sơai thơu làiq dơgrữq mơnuĩh pa-mơtai mơnuĩh kung ôh hũ kaya hadiuq gãm gãm dòq dơlãp nhũ. 16Kơyua mưng kaya nĩ pơnõq drơi kơnãl thơu kaya khiãng duman: nữn la rùp phuỗt Pitrai song ãt mơtai tlàq kaya hadiuq Pitrai hũ kơyua mưng pơnõq drơi. Pơnõq drơi kung iỡuq tlàq kaya hadiuq drơi kơyua mưng pơnõq adơi sơai. 17Nữn mơnuĩh halơi hũ kaya mơnã dơlãp dun kơyua sì bôh sa aràc pơnõq adơi sơai drơi ãn dòq siẽuq rơbah nữn vloh krỡq gơjãp hatai drơi pơweh sì pơnõq adơi sơai nữn, nữn ngãq hayơu kaya khiãng duman Yàc Pô Lơngĩq hũ miẽt dòq dơlãp mơnuĩh nữn jỡc? 18Ơ dơgrữq pơnõq anàq, juơi khiãng duman mưng pơnuaĩq đơp hẽla đơp mưng chơbuai dơlah soh, nữn mưng vruãq ngãq sì pơnuaĩq tơpãq. 19Gơnang mưng nữn, pơnõq drơi ròq thơu làiq pơnõq drơi la pơweh pa pơnuaĩq tơpãq sì pơnõq drơi ngãq gơjãp hatai drơi di anãq Pitrai, 20kơyua mơyah làiq hatai pơnõq drơi yãq rùp phuỗt drơi, nữn ơdah làiq Yàc Pô Lơngĩq la prõng rlao hatai pơnõq drơi sì Pitrai thơu gơnĩt avih dơgrữq kaya. 21Ơ adơi sơai anĩt duman, mơyah làiq hatai pơnõq drơi ôh chahrơna rùp phuỗt drơi, nữn pơnõq drơi hũ hatai chãc khĩn pơweh pa Yàc Pô Lơngĩq, 22sì avih dơgrữq kaya hagĩq pơnõq drơi rãn lakơu nữn pơnõq drơi hũ tồq mãq mưng Pitrai, kơyua pơnõq drơi pioh rơmiãq dơgrữq kaya pơđar-va Pitrai hũ sì ngãq tui dơgrữq kaya Pitrai siàp hatai di anãq Pitrai. 23Sì nĩ la kaya pơđar-va Pitrai hũ, nữn la: pơnõq drơi iỡuq pãc-tui angãn Anàq Pitrai, la Yàc Dõc Pơ-tlah Je-su, sì khiãng duman di gỡuq yơu Pitrai song pơto kaya pơđar-va ga pơnõq drơi. 24Mơnuĩh halơi pioh rơmiãq dơgrữq kaya pơđar-va Pitrai hũ nữn miẽt dòq dơlãp Pitrai, sì Pitrai miẽt dòq dơlãp mơnuĩh nữn. Sì gơnang mưng kaya nĩ, pơnõq drơi thơu làiq Pitrai miẽt dòq dơlãp pơnõq drơi la kơyua mưng Yàc Vơngãq Sơđah nữn Pitrai song vrơi ga pơnõq drơi.