1 Jãng 2

1Ơ dơgrữq anàq kơu hũ, kơu wãq dơgrữq pơnuaĩq nĩ ga pơnõq anàq pioh ga pơnõq anàq ôh sỗq dlàiq. Sì mơyah làiq mơnuĩh halơi sỗq dlàiq, nữn pơnõq drơi hũ sa Pitao dõc jơga sì Yàc Ama la Yàc Dõc Pơ-tlah Je-su, Pitao tơpãq dãng. 2Pitrai la kaya padỡc dơvuh sơlih kơyua dlàiq dơnũh pơnõq drơi hũ, nữn ôh iỡuq mĩn ga dlàiq dơnũh pơnõq drơi, nữn dòq gãm sì dlàiq vãq avih dun kơyua wỡq. 3Mơyah làiq pơnõq drơi rơmiãq pioh dơgrữq kaya pơđar-va Pitrai hũ, nữn gơnang mưng nữn pơnõq drơi thơu làiq drơi song kơnãl thơu Pitrai. 4Mơnuĩh halơi đơp làiq: “Hlãq thơu Pitrai” nữn ôh rơmiãq jàc dơgrữq kaya pơđar-va Pitrai hũ, nữn la mơnuĩh đơp lor, sì pơnuaĩq tơpãq ôh dòq dơlãp mơnuĩh nữn. 5Nữn mơnuĩh halơi rơmiãq pioh pơnuaĩq Pitrai, nữn hatai khiãng duman Yàc Pô Lơngĩq hũ viãq ròq hũ wil tãl dơlãp mơnuĩh nữn. Pơnõq drơi thơu làiq drơi dòq dơlãp Pitrai la kơyua mưng kaya nĩ: 6mơnuĩh halơi đơp drơi gãm dòq dơlãp Pitrai, nữn mĩn rùp phuỗt mơnuĩh nữn kung iỡuq hadiuq drưh yơu Pitrai song hadiuq.

7Ơ pơnõq adơi sơai anĩt anar, hlãq ôh wãq ga pơnõq adơi sơai sa kaya pơđar-va vơhrơu, nữn la kaya pơđar-va sơđãq yao nữn pơnõq adơi sơai song tồq hũ mưng tũq chơmrờp. Kaya pơđar-va sơđãq yao nữn la pơnuaĩq nữn pơnõq adơi sơai song hmỡq. 8Vơnãh tơmo, hlãq wãq ga pơnõq adơi sơai sa kaya pơđar-va vơhrơu, nữn kaya pơđar-va nữn la kaya tơpãq viãq dơlãp Pitrai sì dơlãp pơnõq adơi sơai, kơyua kaya sồp kơnãm song lơhiãq thĩt, sì kaya sơdah viãq ãn tuôĩq pơsàc vloh. 9Asơi đơp drơi dòq dơlãp kaya sơdah nữn vloh lơmùq mơvai adơi sơai drơi nữn tũq nĩ mĩn gãm dòq dơlãp kaya sồp kơnãm. 10Asơi anĩt duman adơi sơai drơi nữn miẽt dòq dơlãp kaya sơdah, sì pơnẽq kaya ngãq sơnẽq sỗq ôh hũ dơlãp mơnuĩh nữn. 11Nữn asơi lơmùq mơvai adơi sơai drơi la dòq dơlãp kaya sồp kơnãm sì yàp nao dơlãp anĩh sồp kơnãm, mơnuĩh nữn kung ôh thơu drơi ãn nao pãq halơi, kơyua kaya sồp kơnãm song ngãq vùp mơta nhũ.

12Ơ pơnõq anàq, kơu wãq ga pơnõq anàq kơyua dlàiq dơnũh pơnõq anàq song hũ tơleh gơnang mưng angãn Pitrai. 13Ơ dơgrữq mơnuĩh pô tơha, hlãq wãq ga pơnõq ung kơyua pơnõq ung song thơu Pitao hũ mưng tũq chơmrờp. Ơ dơgrữq mơnuĩh dãm dơra, hlãq wãq ga pơnõq hã kơyua pơnõq hã song pha rlao sì mơnuĩh mơsãc. 14Ơ dơgrữq anàq tìt, kơu song wãq ga pơnõq anàq kơyua pơnõq anàq song thơu Ama. Ơ dơgrữq mơnuĩh pồ tơha, hlãq song wãq ga dơgrữq pơnõq ung, kơyua pơnõq ung song thơu Pitao hũ mưng tũq chơmrờp. Ơ mơnuĩh dãm dơra, kơu song wãq ga pơnõq hã kơyua pơnõq hã la prãn khãc, Pơnuaĩq Yàc Pô Lơngĩq gãm dòq dơlãp pơnõq hã, sì pơnõq hã song pha rlao sì mơnuĩh mơsãc. 15Juơi khiãng duman dun kơyua kung yơu dơgrữq kaya dòq dơlãp dun kơyua. Mơyah làiq mơnuĩh halơi khiãng duman dun kơyua nữn kaya khiãng duman Yàc Ama ôh dòq dơlãp mơnuĩh nữn. 16Kơyua dơgrữq kaya dơlãp dun kơyua — yơu kaya ham khiãng rơlo rùp hũ, kaya ham khiãng mơta hũ, sì kaya pa-prõc rùp dơlãp rài nĩ hũ — ôh iỡuq la trôh mưng Ama nữn la trôh mưng dun kơyua. 17Sì dun kơyua kađòc lơhiãq thĩt sigỡuq sì kaya ham khiãng krơi nhũ hũ, nữn mơnuĩh halơi ngãq tui hatai ưng Yàc Pô Lơngĩq nữn miẽt dòq tãl trôh gãm gãm.

18Ơ dơgrữq anàq tìt, tũq nĩ la tũq jơ luôĩq hadơi, sì yơu pơnõq anàq song hmỡq đơp làiq mơnuĩh jơdrãq wỡq sì Yàc Dõc Pơ-tlah ròq trôh, sì tũq nĩ lũ mơnuĩh jơdrãq wỡq sì Yàc Dõc Pơ-tlah song pabôh tơviãq, yơu nữn pơnõq drơi thơu làiq tũq nĩ la tũq jơ luôĩq hadơi. 19Pơnõq nhũ tơviãq mưng pơnõq drơi, nữn pơnõq nhũ ôh iỡuq pơweh pa pơnõq drơi. Kơyua mơyah làiq pơnõq nhũ pơweh pa pơnõq drơi, nữn pơnõq nhũ viãq la miẽt dòq sigỡuq sì pơnõq drơi, nữn ôh iỡuq yơu nữn, tồq ga pơnõq nhũ nữn kađòc ràc tơviãq làiq pơnõq nhũ ôh pơweh pa pơnõq drơi ôh. 20Dòq pơnõq anàq nữn song hũ kaya pa-vuh mơnhàq mưng Pitao Sơđah, sì avih tãl aràc pơnõq anàq kung song kơkãl thơu. 21Kơu song wãq ga pơnõq anàq ôh iỡuq kơyua pơnõq anàq ôh thơu pơnuaĩq tơpãq, nữn la kơyua pơnõq anàq song thơu pơnuaĩq tơpãq sì kơyua ôh hũ kaya vlữq lor halơi la tơviãq mưng pơnuaĩq tơpãq. 22Asơi la mơnuĩh đơp lor mơyah làiq ôh iỡuq nữn la mơnuĩh kơmlah tlàq, đơp làiq Yàc Je-su ôh iỡuq la Yàc Dõc Pơ-tlah yơh? Mơnuĩh nữn viãq la mơnuĩh jơdrãq sì Yàc Dõc Pơ-tlah, nữn la mơnuĩh kơmlah tlàq Ama sì Anàq. 23Mơnuĩh halơi kơmlah tlàq Anàq nữn kung ôh hũ Ama. Dòq asơi akhàt tơviãq angãn Anàq, nữn kung hũ Ama wỡq. 24Dòq pơnõq anàq, iỡuq luơi ga dơgrữq kaya pơnõq anàq song hmỡq mưng tũq chơmrờp miẽt patui dòq dơlãp drơi. Mơyah làiq dơgrữq kaya pơnõq anàq song hmỡq mưng tũq chơmrờp miẽt gãm dòq dơlãp pơnõq anàq, nữn pơnõq anàq kung ròq dòq gãm dơlãp Anàq sì dơlãp Ama. 25Sì nĩ la pơnuaĩq hẽ grữh nữn Pitrai song hẽ grưh sì pơnõq drơi — nữn la kaya hadiuq gãm gãm. 26Kơu song wãq dơgrữq pơnuaĩq nĩ ga pơnõq anàq mưng dơgrữq mơnuĩh paluơ dui-va pơnõq anàq nao sỗp suẽl. 27Dòq pơnõq anàq, kaya pavuh mơnhàq nữn pơnõq anàq song tồq mãq mưng Pitrai miẽt dòq gãm dơlãp pơnõq anàq, sì pơnõq anàq ôh hũ kaya halơi lakơu luơi ga sa aràc halơi nữn pơto pơđar drơi. Pa-vlữq wỡq, yơu kaya pavuh mơnhàq Pitrai hũ ãn pơto pơnõq anàq mưng dơgrữq kaya, sì nữn la pơnuaĩq tơpãq viãq ôh iỡuq la vlữq lor, kung yơu song pơto pơđar pơnõq anàq miẽt dòq dơlãp Pitrai.

28Tũq nĩ, ơ pơnõq anàq khiãng duman, iỡuq dòq miẽt dơlãp Pitrai, pioh dơlãp tũq Pitrai pabôh tơviãq, pơnõq drơi hũ hatai chãc khĩn sì ôh kađòc mơlơu ơlah di anãq Pitrai dơlãp tũq Pitrai trôh. 29Mơyah làiq pơnõq anàq thơu làiq Pitrai la tơpãq dãng, nữn pơnõq anàq kung thơu làiq dơgrữq aràc ngãq kaya tơpãq dãng kung hũ pajỡc tơviãq mưng Pitrai.