Roglai Bible Literal Text
1 Jãng 1
Kaya hũ gãm mưng chơmrờp, la kaya pơnõq hlãq song hmỡq, la kaya mơta pơnõq hlãq song bôh tom-anãq mơta drơi, la kaya pơnõq hlãq song iãq mưng, sì tơngãn pơnõq hlãq song rawỡq pãq đỡn, la pơweh mưng Pơnuaĩq kaya dadiuq — viãq yơu nữn, kaya hadiuq song ràc pa-tơviãq, sì pơnõq hlãq song iãq bôh, pơnõq hlãq ãn ngãq chưng sì akhàt vrơi pa-thơu ga pơnõq adơi sơai kaya hadiuq gãm gãm, la kaya mĩn gãm dòq sigỡuq sì Ama sì song hũ ràc pa-tơviãq ga pơnõq drơi — kaya pơnõq hlãq song bôh sì song hmỡq, nữn pơnõq hlãq akhàt vrơi pa-thơu ga pơnõq adơi sơai, pioh ga pơnõq adơi sơai kung hũ kaya salơnuãq sigỡuq sì pơnõq hlãq. Viãq, kaya salơnuãq pơnõq drơi hũ la salơnuãq sì Ama sigỡuq sì Anàq Pitrai, la Yàc Dõc Pơ-tlah Je-su. Pơnõq hlãq wãq dơgrữq pơnuaĩq nĩ pioh ga kaya uỗt sơh pơnõq drơi hũ wil tãl.
Nĩ la pơnuaĩq pơto akhàt nữn pơnõq hlãq song hmỡq mưng Pitrai sì ãn pơto akhàt pa-thơu wỡq ga pơnõq adơi sơai, làiq: Yàc Pô Lơngĩq la kaya sơdah sì dơlãp Pitrai ôh hũ dơgrữq kaya sồp kơnãm halơi. Mơyah làiq pơnõq drơi đơp làiq pơnõq drơi hũ kaya salơnuãq sigỡuq sì Pitrai, nữn vloh dòq yàp nao dơlãp kaya sồp kơnãm, nữn pơnõq drơi ãn đơp lor sì ôh ngãq tui pơnuaĩq tơpãq. Nữn mơyah làiq pơnõq drơi yàp nao dơlãp kaya sơdah yơu rùp phuỗt Pitrai dòq dơlãp kaya sơdah, nữn pơnõq drơi hũ kaya salơnuãq sì gỡuq, sì dơrãh Yàc Je-su, Anàq Pitrai, rao sơchih pơnõq drơi avih dơgrữq dlàiq dơnũh. Mơyah làiq pơnõq drơi đơp làiq drơi ôh hũ dlàiq, nữn la pơnõq drơi ãn đơp pa-gơla krơi rùp drơi sì pơnuaĩq tơpãq ôh dòq dơlãp pơnõq drơi. Mơyah làiq pơnõq drơi akhàt tơviãq dlàiq dơnũh drơi, nữn Pitrai la tui tơpãq sì tơpãq rĩng, pioh tơleh dlàiq ga pơnõq drơi sì rao sơchih pơnõq drơi avih dơgrữq kaya ôh tui tơpãq. Mơyah làiq pơnõq drơi đơp làiq drơi ôh-ka sỗq dlàiq, nữn pơnõq drơi iãq Pitrai la đơp lor, sì Pơnuaĩq Pitrai ôh dòq dơlãp pơnõq drơi.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.