2 Pier 3

1Ơ pơnõq adơi sơai anĩt duman, nĩ la sơrãq pơyua bãc dua hlãq wãq ga pơnõq adơi sơai trôh tũq nĩ; nữn dơlãp dua vlah sơrãq pơyua, kung la dơgrữq pơnuaĩq pa-sơdor pioh ngãq pa-mơdưh hatai sơnơng tơpãq viãq pơnõq adơi sơai hũ, 2tồq ga pơnõq adơi sơai sơdor wỡq dơgrữq pơnuaĩq song ràc akhàt hlơu thrơi kơyua mưng dơgrữq mơnuĩh gơnuar hwơr sơđah sơchih sigỡuq sì gơnuar pơđar Yàc hũ sì Yàc Dõc pơnõq drơi hũ akhàt mưng dơgrữq mơnuĩh gơnuar pơđar pơnõq adơi sơai hũ, 3kơyua thơu halơu kaya nĩ, nữn la dơgrữq mơnuĩh tlao vlơi ròq trôh dơlãp rài luôĩq hadơi gãm sì kaya đơp siẽl, mơ-ôh pagui tui kaya ham khiãng rùp phuỗt drơi hũ, 4đơp làiq: “Pơnuaĩq hẽ grưh mưng kaya Pitrai mai wỡq pãq halơi? Kơyua mưng tũq ung kõq pơnõq drơi dòq padơi vloh, nữn avih dơgrữq kaya mĩn dòq gãm yơu dơlãp tũq chơmrờp chrơng pajỡc lơngĩq tơnãh.” 5Kơyua tũq pơnõq nhũ dĩq dĩl yơu nữn, kaya nĩ tơviãq jỡc dơđỡuq mơta pơnõq nhũ, nữn la kơyua mưng pơnuaĩq Yàc Pô Lơngĩq hũ, lơngĩq song bôh tơviãq mưng hlơu sơđãq, sì voh tơnãh pajỡc tơviãq mưng ia sì gơnang mưng ia, 6kung kơyua mưng dơgrữq kaya nữn, nữn dun kơyua thrơi nữn song kađòc pa-lơhiãq, kơyua kađòc ia blũc kua. 7Nữn tũq nĩ, kơyua sigỡuq sì gơnuar pơđar nữn, lơngĩq sì tơnãh hũ pioh luơi ga apôi, pioh luơi ga harơi chahrơna sì ga kaya pa-lơhiãq dơgrữq anàq mơnuĩh ôh duh huaĩq Yàc Pô Lơngĩq.

8Bôh làiq yơu nữn, ơ pơnõq adơi sơai anĩt duman, juơi luơi sa kaya nĩ tơviãq jỡc ngãq dơđỡuq mơta pơnõq adơi sơai, làiq sa harơi pơweh sì Yàc drưh yơu sa rơvơu thũt, sì sa rơvơu thũt drưh yơu sa harơi. 9Yàc ôh ngãq suơi mưng dơgrữq pơnuaĩq hẽ grưh Pitrai hũ, yơu hũ tơkìq mơnuĩh sơnơng la ngãq suơi; pa-vlữq wỡq, Pitrai gơjãp gơnĩt ãt ỡl pơweh sì pơnõq adơi sơai, ôh ưng sa aràc mơnuĩh halơi dơlãp pơnõq adơi sơai kađòc pa-lơhiãq, nữn ưng avih tãl aràc kung hũ tũq lơwah nao trôh pa kaya mơvai tlàq dlàiq. 10Bôh làiq yơu nữn, harơi Yàc hũ ròq trôh yơu mơnuĩh tlẽq, dơlãp harơi nữn, tãl lơngĩq ròq lơhiãq thĩt dơlãp sãp dơnai sỡm wàc, sì dơgrữq kaya ròq kađòc pa-lơhiãq dơlãp tũq kađòc apôi chôh bõc avih, dòq voh tơnãh sì dơgrữq kaya ngãq pãq dlòc đỡn ròq kađòc chôh avih. 11Kơyua dơgrữq kaya nữn ròq kađòc pa-lơhiãq yơu nữn, nữn pơđar pơnõq adơi sơai iỡuq bõc dòq hadiuq dơlãp kaya ngãq nao sơđah sơchih sì duh huaĩq, 12iỡuq chơkhãq chàc sì mơ-uãh chơkhãq chàc harơi Yàc Pô Lơngĩq hũ sơmar trôh, kơyua tũq nữn dơgrữq tãl lơngĩq ròq kađòc apôi chôh pa-lơhiãq, dòq dơgrữq kaya ròq làt tơviãq kơyua tluỡiq gơhual viãq. 13Nữn tui yơu pơnuaĩq hẽ grưh Yàc hũ, pơnõq drơi ãn chơkhãq chàc lơngĩq vơhrơu sì tơnãh vơhrơu, nữn pãq anĩh nữn kaya tơpãq dãng dòq.

14Kơyua yơu nữn, ơ pơnõq adơi sơai anĩt duman, kơyua pơnõq adơi sơai chơkhãq chàc dơgrữq kaya nữn, yơu nữn iỡuq ngãq avih prãn pioh Pitrai iãq bôh la tơviãq jỡc ôh hũ nỡm sì ôh ngãq kaya halơi sỗq suẽl, dơlãp kaya dadu lơngai. 15Sì iỡuq thơu hatai ãt ỡl Yàc pơnõq drơi hũ la kaya anĩt dõc pơ-tlah, kung yơu Pol, la adơi sơai anĩt duman pơnõq drơi hũ, song wãq ga pơnõq adơi sơai, tui yơu kaya jãc rgơi song vrơi ga nhũ, 16sì kung yơu dơlãp dơgrữq sơrãq pơyua ung hũ, tũq đơp dơlãp sơrãq pơyua mưng dơgrữq kaya nĩ, pãq đỡn hũ vơnãh kãl pãc thơu nữn dơgrữq mơnuĩh ôh thơu pãc sì ôh gơjãp kađữc ràc tơviãq kaya sỗq suẽl voh gơtha, kung yơu sì dơgrữq vơnãh Sơrãq Sơđah tơmo, pơweh trôh pa kaya pa-lơhiãq rùp phuỗt drơi hũ. 17Kơyua yơu nữn, ơ pơnõq adơi sơai anĩt duman, kơyua pơnõq adơi sơai thơu halơu dơgrữq vruãq nữn, yơu nữn iỡuq rơmiãq jàc rùp drơi pioh pơnõq adơi sơai ôh kađòc dui-va nao sỗq suẽl kơyua mưng kaya vlữq lor dơgrữq mơnuĩh ôh hũ voh-va hũ sì ngãq lơhiãq hatai tui tơpãq drơi hũ. 18Nữn iỡuq prõng tơgùq dơlãp kaya anĩt sì kaya pãc thơu Yàc sì Dõc pơnõq drơi, Yàc Dõc Pơ-tlah Je-su. Lakơu kaya gơhluh pơweh sì Pitrai mưng tũq nĩ sì tãl trôh gãm gãm. A-men!