1 Jãng 5

1Mơyah làiq mơnuĩh halơi, pãc-tui làiq Yàc Je-su la Yàc Dõc Pơ-tlah nữn hũ pajỡc tơviãq mưng Yàc Pô Lơngĩq, sì mơyah làiq mơnuĩh halơi anĩt duman Pitao song pajỡc tơviãq drơi nữn kung anĩt duman mơnuĩh song pajỡc tơviãq kơyua mưng Pitrai. 2Gơnang mưng kaya nĩ, pơnõq drơi thơu làiq drơi anĩt duman anàq tơcho Yàc Pô Lơngĩq la tũq pơnõq drơi anĩt duman Yàc Pô Lơngĩq sì rơmiãq pioh dơgrữq kaya pơđar-va Pitrai hũ. 3Kơyua nĩ la kaya khiãng duman Yàc Pô Lơngĩq, nữn la pơnõq drơi rơmiãq pioh dơgrữq kaya pơđar-va Pitrai hũ. Dơgrữq kaya pơđar-va Pitrai hũ ôh iỡuq la anong tơrãq ôh. 4Kơyua mơyah làiq mơnuĩh hũ halơi pajỡc tơviãq mưng Yàc Pô Lơngĩq nữn pha rlao sì dun kơyua. Sì nĩ la kaya chãc gơnĩt pha rlao dun kơyua, viãq nữn la voh-tui pơnõq drơi hũ, la kaya pha rlao sì dun kơyua. 5Sì asơi la mơnuĩh pha rlao dun kơyua, mơyah làiq ôh iỡuq mơnuĩh pãc-tui làiq Yàc Je-su la Anàq Yàc Pô Lơngĩq mĩn yơh? 6Nữn la Pitao song trôh mưng ia sì dơrãh: Yàc Dõc Pơ-tlah Je-su — ôh iỡuq mĩn mưng ia, nữn la kơyua mưng ia sì mưng dơrãh. Sì Vơngãq Sơđah la Pitao ngãq chưng, kơyua Vơngãq Sơđah la pơnuaĩq tơpãq. 7Kơyua yơu nữn, hũ tlơu vơnah kaya ngãq chưng: 8Vơngãq Sơđah sigỡuq sì ia sì dơrãh, nữn avih tlơu vơnah nĩ kung la mĩn salơnuãq sigỡuq. 9Mơyah làiq pơnõq drơi tồq pơnuaĩq kaya ngãq chưng anàq mơnuĩh hũ, nữn pơnuaĩq ngãq chưng Yàc Pô lơngĩq hũ la prõng rlao avih. Kơyua nĩ la pơnuaĩq ngãq chưng Yàc Pô Lơngĩq hũ, nữn la Pitrai song ngãq chưng mưng Anàq Pitrai. 10Mơnuĩh halơi pãc-tui di Anàq Yàc Pô lơngĩq nữn hũ pơnuaĩq ngãq chưng nữn dòq dơlãp mơnuĩh nữn. Mơnuĩh halơi ôh pãc-tui Yàc Pô Lơngĩq nữn iãq Pitrai mơnuĩh la đơp lor, kơyua mơnuĩh nữn ôh pãc-tui dơlãp pơnuaĩq ngãq chưng nữn Yàc Pô Lơngĩq song va pa-tơviãq mưng Anàq Pitrai hũ. 11Sì nĩ la pơnuaĩq ngãq chưng, nữn la Yàc Pô Lơngĩq song vrơi ga pơnõq drơi kaya hadiuq gãm gãm, sì kaya hadiuq nữn dòq dơlãp Anàq Pitrai. 12Mơnuĩh halơi hũ Yàc Anàq nữn hũ kaya hadiuq. Mơnuĩh halơi ôh hũ Anàq Yàc Pô Lơngĩq nữn ôh hũ kaya hadiuq.

13Kơu song wãq dơgrữq pơnuaĩq nĩ ga pơnõq adơi sơai, la vrơi ga dơgrữq mơnuĩh pãc-tui dơlãp angãn Anàq Yàc Pô Lơngĩq, pioh ga pơnõq adơi sơai thơu làiq drơi hũ kaya hadiuq gãm gãm. 14Dòq nĩ la kaya pãc-tui gơnĩt nữn pơnõq drơi hũ dòq dơlãp Pitrai, nữn la mơyah làiq pơnõq drơi rãn lakơu sa kaya hagĩq nữn tui hatai ưng Pitrai, nữn Pitrai hmỡq pơnõq drơi. 15Sì mơyah làiq pơnõq drơi thơu làiq Pitrai hmỡq pơnõq drơi bôh làiq pơnõq drơi rãn lakơu kaya hagĩq, nữn pơnõq drơi thơu làiq drơi tồq mãq hũ dơgrữq kaya drơi rãn lakơu nữn drơi song rãn lakơu mưng Pitrai. 16Mơyah làiq asơi bôh pơnõq adơi sơai drơi sỗq sa dlàiq nữn ôh trôh tãl kaya mơtai, sì mơnuĩh nữn ròq iơu lakơu, nữn Yàc Pô Lơngĩq ròq vrơi kaya hadiuq ga mơnuĩh adơi sơai dih, la mơnuĩh sỗq dlàiq ôh trôh tãl kaya mơtai. Hũ sa kaya sỗq dlàiq trôh kaya mơtai; hlãq ôh đơp làiq mơnuĩh nữn iỡuq chàc iơu lakơu mưng dlàiq dơnũh nữn. 17Dơgrữq kaya ôh tui tơpãq la dlàiq dơnũh, nữn hũ dlàiq ôh trôh tãl kaya mơtai.

18Pơnõq drơi thơu làiq mơyah làiq mơnuĩh halơi hũ pajỡc tơviãq mưng Yàc Pô Lơngĩq nữn ôh miẽt sỗq dlàiq gãm, Nữn Pitao pajỡc tơviãq mưng Yàc Pô Lơngĩq rơmiãq jàc ga mơnuĩh nữn, sì kamlai ôh tũq halơi ngãq iãh pơnõq nhũ jỡc. 19Pơnõq drơi thơu làiq drơi pơweh pa Yàc Pô Lơngĩq, dòq avih dun kơyua dòq pãq ala gơnuar kamlai hũ. 20Nữn pơnõq drơi thơu làiq Anàq Yàc Pô Lơngĩq song trôh sì song vrơi ga pơnõq drơi kaya hũ dlò thơu pãc, pioh pơnõq drơi pơlih kơnãl thơu Pitao Tơpãq Viãq. Sì pơnõq drơi dòq dơlãp Pitao Tơpãq Viãq, nữn la dòq dơlãp Anàq Pitrai, la Yàc Dõc Pơ-tlah Je-su. Anàq nữn la Yàc Pô Lơngĩq tơpãq viãq, sì la kaya hadiuq dòq gãm gãm. 21Ơ pơnõq anàq, iỡuq rơmiãq jàc rùp phuỗt drơi tlah mưng rùp rãp.