2 Jãng 1

1Mơnuĩh pô tơha pơyua ga dơgrữq tơpuôl mòq hũ duỡt ruãh sigỡuq sì dơgrữq pơnõq anàq mòq hũ, la dơgrữq mơnuĩh nữn hlãq anĩt duman dơlãp pơnuaĩq tơpãq — sì ôh mĩn sa aràc hlãq, nữn avih dơgrữq mơnuĩh halơi song iãq thơu pơnuaĩq tơpãq kung yơu nữn — 2kơyua pơnuaĩq tơpãq mĩn dòq gãm dơlãp pơnõq drơi sì ròq dòq sigỡuq sì pơnõq drơi tãl trôh gãm gãm. 3Kaya anĩt, hatai anĩt duman, sì kaya dadu lơngai mưng Yàc Pô Lơngĩq, la Ama sì mưng Yàc Dõc Pơ-tlah Je-su, Anàq Yàc Pô Lơngĩq hũ, ròq dòq sigỡuq sì pơnõq drơi dơlãp pơnuaĩq tơpãq sì kaya khiãng duman.

4Hlãq hũ hatai uỗt sơh viãq kơyua hlãq iãq bôh kung hũ tơkìq mơnuĩh dơlãp anàq tơcho mòq hũ yàp nao dơlãp pơnuaĩq tơpãq, tui yơu pơnõq drơi song tồq mãq kaya pơđar-va mưng Ama. 5Ơ mòq, tũq nĩ hlãq rãn lakơu mòq — ôh iỡuq yơu kaya hlãq ãn wãq vrơi ga mòq sa pơnuaĩq pơđar-va vơhrơu, nữn la kaya pơnõq drơi song hũ mưng tũq chơmrờp — làiq pơnõq drơi iỡuq khiãng duman di gỡuq. 6Sì kaya khiãng duman la yơu nĩ, nữn la pơnõq drơi iỡuq yàp nao tui dơgrữq kaya pơđar-va Pitrai hũ. Nĩ la kaya pơđar-va, tui yơu pơnõq adơi sơai song hmỡq mưng tũq chơmrờp, nữn la pơnõq adơi sơai iỡuq yàp nao dơlãp kaya khiãng duman. 7Kơyua hũ lũ mơnuĩh đơp pa-gơla song pabôh tơviãq dơlãp dun kơyua, la dơgrữq mơnuĩh ôh ưng akhàt tơviãq angãn Yàc Dõc Pơ-tlah Je-su trôh dơlãp rơlo rùp. Nữn la mơnuĩh đơp pa-gơla sì mơnuĩh jơdrãq wỡq sì Yàc Dõc Pơ-tlah. 8Mĩn rùp phuỗt pơnõq adơi sơai iỡuq gơrhia iãq tồq pơnõq adơi sơai ôh ngãq lơhiãq dơgrữq kaya nữn pơnõq drơi song iỡuq ãt dleh dlàr, pa-vlữq wỡq nữn pơnõq adơi sơai tồq mãq hũ wil tãl kaya ban. 9Mơnuĩh halơi miẽt pleh ơtah nữn ôh ưng dòq dơlãp kaya pơto pơđar Yàc Dõc Pơ-tlah nữn ôh hũ Yàc Pô Lơngĩq. Mơnuĩh halơi miẽt dòq gãm dơlãp kaya pơto pơđar, mơnuĩh nữn hũ gãm Ama sì Anàq. 10Mơyah làiq mơnuĩh halơi trôh sì pơnõq adơi sơai nữn ôh va tui pơnuaĩq pơto pơđar nữn, nữn juơi tồq ròq mơnuĩh nữn tơma sàc sì juơi đơp sì nhũ: “Siàp drơi mĩn.” 11Kơyua mơnuĩh halơi đơp sì mơnuĩh nữn: “Siàp drơi mĩn”, la hũ vơnah sigỡuq sì dơgrữq vruãq iãh mơsãc nhũ hũ.

12Kơyua hũ lũ kaya hlãq ôh ưng wãq ga pơnõq adơi sơai mưng vơ-ar sì ia nhõm gai wãq. Nữn hlãq chơkhãq khiãng trôh sì pãp pơnõq adơi sơai sì đơp dlài mơta pa-sơmũ mơta, pioh kaya sơh sơr pơnõq adơi sơai hũ vãq sơrè. 13Dơgrữq anàq tơcho mơnuĩh adơi sơai hũ duỡt ruãh mòq hũ pơyua pơnuaĩq chuãq rơwãc trôh mòq.