जकरयाह 8

येरूसलेम नगर को दुबारा निरमान की परन

1मंग सेनागिन को यहोवा को यो बचन मोरो कठा पहुचयो। 2“सेनागिन को यहोवा असो कव्हसे, सिय्योन को लाय मोरो मा जरन पयदा भयी पर लगत जलन मोरो मा पैदा भयो से। 3यहोवा असो कव्हसे, मी सिय्योन मा लवट आयो सेऊ, अना येरूसलेम नगर को बीच मा निवास करहुन , अना येरूसलेम सच्चाई को नगर को नाव, अना सेनागिन को यहोवा को परबत, पवीतर पहाड़ कहलाहे। 4सेनागिन को यहोवा असो कव्हसे, येरूसलेम नगर को चौकों मा मंग बुड़गा अना बूड़गीहुन लगत उमर को होवन को कारन लक, आपरो-आपरो1 हात मा लाठी लियो हुयो बसयो करहेत। 5नगर को चौक खेलनवालो टूरा अना टूरी लक भरयो रहेत। 6सेनागिन को यहोवा असो कव्हसे, अदी ओनो दिवस मा यो गोस्टी इन परजा को बचयो हुयो को नजर मा अदभूत से ता मोरो नजर मा भी अदभूत होहेत सेनागीन को यहोवा को यो बचन आय।2 7सेनागिन को यहोवा असो कव्हसे, चोवो, मी आपरो पिरजा को सूटकारा करके ओला दिन उगती अना दिनबुड़ती छेतर लक ले आहूँ 8अना मी उनला आन के येरूसलेम नगर को बीच मा बसाहुँ अना वय मोरो परजा होहेत अना मी उनको परमेस्वर जाहीन, यो तो सच्चाई अना नियाव को संग होहेत।” 9सेनागिन को यहोवा असो कव्हसे, “तुमी एना बेरा मा यो गोस्टी उन भविस्यवक्ता हुन को टोन्ड लक आयकासेव जोन सेनागिन को यहोवा को भुवन को पाया डाकन को बेरा तुम्हरो हात मजबूत हो जेनको लक मंदिर बनेत। 10वोना बेरा को पयले, न ता मानूस को बनी अना नही जनावर को भाड़ा मिलत होती, अना सतावन वालो को कारन लक, नही ता आवन वालो ला सांती भेटत होतो। अना नही कटन वारा को; काहेका मी सबा मानूस लक एकमेक पर चघाई करवात होतो। 11पर अबा मी यो पिरजा को बाचयो गिन लक असो बरताव नही करू, जसो का पयले को दिवस मा करत होतो, सेनागिन को यहोवा को यो सबद आय। 12वय पूरो सांती को संग खेती करहेत अना धनवान बन जाहेत। अंगूर को बगीचा मा फर लगहेत, धरती मा लगत फसल होहेत। अना बदल लक ओस को बरसात होहेत। मी आपरो यो परजा को बचयो हुयो ला इन आसीसहुन, को अधिकारी कर देहूँ। 13ओ यहूदा को खानदान, अना इसरायल को घरानो, जेना तरीका लक तुमी देस-देस को बीच सराप को कारन होतो वोच रिती लक मि तुमरो सूटकारा करू, अना तुमी आसीस को कारन होवन का। एकोलाय तुमी नोको डराव, अना तुमरो हात ढिल्लो तुमरी पाहेत।”3 14काहेका सेनागिन को यहोवा असो कव्हसे, “जोन परकार जबा तुमरो आजा पुरखा मोला गुस्सा दिलात होतीन, तबा मी ना उनको हानि करन की असो गई होती अना मंग नही, गजब पस्तायो, 15वोच रिती लक मि ना काही दिवस मा येरूसलेम नगर को यहूदा को घराना को भलाई करन को असो लियो से; येकोलय तुम्ही भेव नोको करो। 16जोन-जोन काम तुमला करनो पाहिजे। वय यो सेत, एकमेक को संग सच्चाई कव्हनो, आपरो कोट-कचहरी मा सच्‍चाई को अना मेल मिलाप को नीति को नियाव करो। 17अना आपरो मन मा एकमेक को हानी को कलपना नोको करने, अना झुठी किरिया लक माया नोको राखो। काहेका यो सप्पा काम लक घिरना करा सेव; यहोवा को यो सबद आय।” 18मंग सेनागिन को यहोवा को यो बचन मोरो कठा पहुचयो। 19सेनागिन को यहोवा असो कव्हसे, चवथो, पाँचवा, सातवो अखिन दसवो महीना मा जोन-जोन उपास को दिवस होवासेत, वय यहूदा को घराना को लाय कुसल अना खुसी अना खुसी लक जेवन को तिहार को दिवस भय जाहेत; येकोलय अबा तुमी सच्चाई अना मेलमिलाप लक माया राखो।4 20“सेनागिन को यहोवा असो कव्हसे, असो बेरा आवन वालो से का देस-देस को लोक अना लगत नगर को रव्हन वालो आहेत। 21अना एक नगर को रव्हन वालो दुसरो नगर को रव्हन वालो को जवर जायके कहेत, परमेस्वर लक बिनती करन अना सेनागिन को यहोवा परमेस्वर ला ढुंढन को लाय चलो; मी ता जाय रहयो सेऊ! 22लगत सो देस को पर ताकतवर राज को लोख येरूसलेम नगर मा सेनागिन को यहोवा परमेस्वर ला ढुढन लगीन, अना परमेस्वर लक बिनती करन को लाय आहेत। 23सेनागिन को यहोवा असो कव्हसे, ओनो दिवस मा लक किसम-किसम बोली बोलनवाली सबच रास्टगीन मा लक दहा मानूस, एक यहुदी मानूस को कपरा को छोर ला यो कहके राख लेहेत, हमी तुमरो संग चलयेती। काहेका आमी ना आयकीसेजन का परमेस्वर तुमरो संग से।”