जकरयाह 6

चार रथहुन को दरसन

1मी ना डोरा वरता उठायो, अना चोयो का दुई पहाड़ को बीच लक चार रथ चलयो आवासेत, अना वय पहाड़ पीतर को सेत। 2पयले रथ मा लाल घोड़ा अना दुसरो रथ मा कारो,1 3तीसरो रथ मा पांढरो अना चवथो रथ मा धब्बा अना चितकबरो मजबूत घोड़ा से। 4तबा मी ना वोना दूत लक जोन मोरो लक गोस्टी करत होतो पुसिन, “ओ मोरो मालीक यो सबा काजक सेत?” 5दूत ना मोरो लक कह्यो, “यो बादल को चारो वारा आतमा सेत जोन सप्पा धरती को पिरभू को कठा हाजिर रव्ह सेत। पर अबा हिट आयो सेत।2 6जोन रथ मा कारो घोड़ा से, उ उत्तर देस को कन जावासेत। अना पांढरो घोड़ा उनको दिन बुढ़ती लक चली जासे, अना चितबहाड़ी घोड़ा दक्सिन देस को कन जावासेत। 7चितकबरो मजबूत घोड़ा गीन ना हिटके, का जायके धरती पर मुरकायो।” एकोलाय दूत ना कह्यो, “जायके धरती पर हिन्डो।” तबा वय धरती पर हिन्डन लगीन। 8तबा वोना मोरो लक हाकलके कहीस, “चोव, वय जोन उत्तर देस को कन जावासेत, उनना उता मोरो जान ला थंडो करयो से।”

यहोसु को राजतिलक

9तबा यहोवा को यो बचन मोरो जवर आयो। 10“बँधुआई को लोकगीन मा लक, हेल्दै, तोबिय्याह अना यदायाह लक काही ला, अना वोच दिवस तु सपन्याह को टूरा योसियाह को घर मा जाय, जोन मा वय बेबीलोन लक आयके पहुचयो सेत। 11उनको हात लक सोन्नो- खूरो ले, अना मुकुट बनायके उनला यहोसादाक3 को टूरा यहोसु ना मोठो मुखिया याजक को डोस्का पर रख; 12अना ओको लक यो सांग, सेनागिन को यहोवा असो कव्हसे, उ मानूस ला चोव जोन को नाव डगाल से, उ आपरो जघा मा उगके यहोवा परमेस्वर को मंदिर ला बनावासेत। 13उ परमेस्वर को मंदिर ला बनाहेत अना बड़ाई पाहे, अना आपरो सिंघासन पर विराजमान होयके सासन करहेत। वोको पास सिंघासन को वरता याजक बसयो हुयो होहे, अना दूई को बीच मा सांती-सला होयेत।” 14अना वय मुकुट हेलेम, तोबिय्याह, यदायाह, अना सपन्याह को टूरा हेन ला मिले। अना वय परमेस्वर को मंदिर मा यादगार को लाय बनयो रहेत। 15“मंग दुहुर को लोक गीन आयके यहोवा परमेस्वर को मंदिर ला बनावन मा मदद करबीन। अना तुमी जानने की सेनागिन को यहोवा ना मोला तुमरो कठा धाड़िसेउ। अदी तुमी मन लगायके तुम्हरो परमेस्वर यहोवा को हुकूम पालन करोह ता या गोस्टी पूरी होहेत।”