जकरयाह 5

उड़तो हुयो गुन्डयो पतर को बारे मा दरसन

1जबा मी लवटयो अना डोरा उठायो ता काजक चोयो का एक लिखयो पतर वारा मा उड़ रह्यो से। 2दूत ना मोरो लक पुसयो, “तोला काजक चोवासे?” मी ना कह्यो, “मोला एक लिखयो पतर उड़तो हुयो होतो, जोन को लम्बो बीस हात अना चौड़ो दहा हात को से।” 3मंग वोना मोरो लक कह्यो, “एको पर उ सराप लिख्यो से जोन सप्पा देस मा पड़न वालो से। पतर को एक कन लिख्यो से, का हर कोन्ही चोरी करन वालो देस लक हेड़ दियो जाए अना दूसरो कन लिख्यो से का हर कोन्ही जोन कसम खायके खोटो कव्हासेत, वोला भी ले लियो जाहे।” 4सेनागिन को यहोवा को यो सबद आय, “मी वोला असो चलाहुँ की उ चोट्टा को घर मा अना मोरो नाव को झुठी किरिया खान वालो को घर मा घुसके रहेत, अना वोला लकड़ी अना गोटा समेत नास कर देहेत।”

डल्ला मा बसी बायको को बारे मा दरसन

5तबा जोन सरगदूत, मोरो लक गोस्टी करत होतो, उ ना सामुर आयके मोरो लक कह्यो, “डोरा वरता उठाय के चोव, का उ काजक चीज हिटी से?” 6मी ना पुसयो, “उ काजक से?” ओना कह्यो, “उ चीज जोन हिटत जाय रह्यो से, उ एक डल्ला से जो सप्पा देस को पापगिन ला दिसाव से।” 7मंग मी ना चोयो का डलिया को झक्कन सीसो1 को होतो, मि ना चोयो का झक्कन उचलयो जाय रहयो से। अना एक बायको से, जोन डल्ला को बीच मा बसी से। 8दूत न कह्यो, “एको अरथ दुस्टता से।” अना वोना उ बायको ला जोन डल्ला को बीच मा दबाय दियो, अना सीसे को वोना झक्‍कन लक डल्ला को तोन्ड बंद कर दियो। 9तबा मी ना डोरा उठायो, ता काजक चोयो का दुई बायका चली जावसे, जोनको पंखा वारा मा फैलयो हुयो से, अना उनको पंखा सारस को जसो से, अना वय डलिया ला बादल अना धरती को बीच मा उड़ाय लियो जाय रही सेत। 10तबा मी ना वोना दूत लक जोन मोरो लक गोस्टी करत होतो, पुसयो, “वय डलिया ला किता ले जावसे?” 11ओना कह्यो, “सीनार2 देस मा जासे का वहान वोको लाय एक घर बनाये; अना जबा उ तैय्यार कियो जाहेत, तबा उ डलिया ला वहान स्थापित करयो जाहेत।”