जकरयाह 4

दियोदानी अना फुल को दरसन

1मंग जोन सरगदूत, मोरो लक गोस्टी करत होतो, उ ना आयके मोला असो जगायो जसो कोनी मानूस ला जप लक जगायो जाय। 2वोना मोरो लक पुसयो, “तोला काजक दिसासे?” मी ना कह्यो, “एक दियोदानी सेत, जोन पूरो सोन्नो को से, अना ओको बटका ओको वरता मा से, अना ओको पर वोको सात टेमा से; जोन को वरता बत्ती को लाय सात-सात पोंगरी सेत। 3दियोदानी को जवर जयतून को दुय झाड़ सेत, ऊ दियोदानी को उज्जो कन अना एक डाखियो कन।” 4तबा मी ना वोना दूत लक जोन मोरो लक गोस्टी करत होतो पुसयो, “ओ मोरो मालीक यो काजक सेत?” 5जोन सरगदूत, मोरो लक गोस्टी करत होतो, वोना मोला जवाब दियो, “का तु नही जानस, का यो काजक सेत?” मी ना कह्यो, “ओ मोरो मालीक, मि नही जानु।”

जरुब्बाबिल लक परमेस्वर को वादा

6तबा ओना मोला कहीस, “जरुब्बाबिल को लाय परमेस्वर को बचन से। नही ता ताकत लक, अना नही ताकत लक, पर मोरो आतमा को कन लक से, सेनागिन को यहोवा को यो गोस्टी से। 7यहोवा को भुवन को चोटी को पहाड़, तु काजक से? अना जरुब्बाबिल को पुढा तु सपाट होय जाहेत अना उ वरता को गोटा यो हाकलतो हुयो आहेत, वोको पर किरपा हो किरपा।” 8तबा यहोवा को यो बचन मोरो कठा पहुचयो। 9“जरुब्बाबिल ना आपरो हात लक यो घर को पाया डाकिस, अना उ आपरो हात लक वोला तैय्यार भी करेत। तबा तू जान पाहेत, की सेनागिन को यहोवा ना मोला तुमरो कठा धाड़यो से। 10काहेका कोन मानूस लहान गोस्टी को दिवस ला नहान समजासेत, परमेस्वर आपरो इन सात डोरा लक सप्पा धरती पर नजर करके साहुल ला जरुब्बाबिल को हात मा चोहेत, अना खुसी होयेत।”1 11तबा मी ना मंग ओला पुसयो, “यो दुई जयतून को झाड़ का सेत, जोन फूल दियोदानी को उज्जो-डायो कन सेत?”2 12मंग मी ना दूसरी बार ओला पुसिन, “जयतून को दुय डगाली का सेत, जोन सोन्नो को दूई पोगंरी को कन लक आपरो मा लक सुन्हेरो तेल उबड़ावा सेत?” 13वोना मोरो लक कह्यो, “का तु नही जानस, का यो काजक सेत?” मी ना कह्यो, “ओ मोरो मालीक, मि नही जानु।” 14तबा ओना कह्यो, “ऐको फर ताजो तेल लक भरयो वय दुई मानूस सेत जोन सप्पा धरती को परमेस्वर को जवर उभो रव्हासेत।”