जकरयाह 3

मोठो याजक को बारे मा भविस्यवक्ता को दरसन

1मंग वोना यहोसु ना मोठो याजक ला परमेस्वर को दूत को पूढा उभो भयो मोला चोयो, अना सैतान वोको उज्जो कन ओको विरोध करन ला उभो होतो।1 2तबा यहोवा ना सैतान ला कहीस, “हे सैतान यहोवा तोरो ला डांटे! परमेस्वर जोन येरूसलेम नगर ला आपरो लेवासे, वोच तोला दोसी ठयराये, का यो मानूस स्तो लक हेड़ी हुयी काड़ी नही?” 3वोना बेरा यहोसु ना ता खबरिया को सामोर गन्दो मयलो कपरा घालयो हुयो उभो होतो। 4तबा दूत ना यहोसु जो कठा उभा होतो वोना कहीस, “एको गन्दो मयलो कपरा उतारो।” तबा ओना ओला कहीस, “चोव, मी ना तोरो बुराई दुहुर करयो से, अना मी तोला सुन्दर कपरा घाल को देवासू।” 5तबा मी ना कह्यो, “एको डोका मा एक पवीतर पगड़ी दियो जाय।” एकोलाय उनना ओको डोस्का मा याजक को लायक सुध्द पगड़ी रख दियो, अना वोको कपरा पहिनायो; यहोवा को दूत जवर उभो होतो। 6तबा यहोवा को दूत ना यहोसु ला चेतायके कहीस, 7सेनागिन को यहोवा तोरो लक असो कव्हसे, “यदि तू मोरो मारग मा चलासे, अना जोन काही मी ना तोला सोप दियो से, वोको रक्सा करेत, ता तु मोरो घर को नियाव करन वालो अना मोरो आँगनगीन को रक्सक होहेत, अना मी तोरो ला उनको बीच मा आवन-जावन देहू जो जवर उभा सेत। 8ओ यहोसु, ओ मोठो याजक, ओ वोको संगी हुन जोन तोरो मोहरा बसयो से आयक, काहेका वय अदभूत चिन्ह मानूस से काहेका चोवो, मी आपरो सेवक को डगाली ला परगट करू। 9उ गोटा ला चोव जोनला मी ना यहोसु को पुढा करयो सेउ, ऊ एक गोटा को वरता सात डोरा बनी सेत, सेनागिन को यहोवा को यो सबद आय, चोव! मी उ गोटा पर एक अक्सर खोद देवासू, अना यो देस को बुराई ला एकच दिवस मा दूहुर कर देहूँ। 10वोच दिवस तुमी आपरो- आपरो भाऊ-बन्धुहुन ला अंगूर को बेला अखिन अँजीर को झाड़ को खाल्या आवन को लाय हाकलेत, सेनागिन को यहोवा को यो सबद आय।”2