जकरयाह 2

नापन वारो दोरी को दरसन

1मंग मी ना निघा उठायो ता काजक चोयो का हात मा नाप को दोरी लियो हुयो एक मानूस से।1 2तबा मी ना ओको लक पुसयो, “तु किता जावसेस?” वोना मोरो लक कह्यो, “येरूसलेम नगर ला नापन जावासू का चोऊ केतरो लम्बाई केतरी, केतरी चवड़ाई सेत।” 3तबा मी ना चोयो का जोन सरगदूत, मोरो लक गोस्टी करत होतो उ चली गयो, अना दुसरो दूत ओको लक मिलन को लाई आयके। 4दूत ना वोको लक कह्यो, धावके के वोना जुवान मानूस लक सांग, “येरूसलेम नगर को अबादी एतरो बढ जाहेत , वोना मा एतरो मानूस अना जनावर बस जाहेत का वा गाँव को जसो बिन परकोट को भीट को नगर बन जाहेत। 5यहोवा को यो सबद आय, का मी खुद वोको चारो कन स्तो को जसो नगर को परकोट बनहूँ, अना वोको बीच तेज होयके, चोहूँ।”

हेड़यो गयो बन्धुवा गीनला घर बुलावनो

6यहोवा को यो सबद आय, चोवो, आयको, उत्तर देस मा लक पराय जावो, काहेकि मी ना तुमी ला बादल को चारो वारागीन को जसो तितर-बितर करयो से। 7ओ सियोन तू जोन बेबीलोन को टूरी गीनको संग रव्हासेती, आपरो आप पराय जावो। 8काहेका सेनागिन को यहोवा असो कव्हसे, वोना तेज को परगट होवन को मघा तुम्हिला लूटन वालो उन लोख गीन को कठा धाड़यो से, जोन तुमला लूटत होतीन, काहेका जोन तुमी ला छूवासेत, उ मोरो डोरा को पुतली ला छूवासेत। 9चोवो, मी आपरो हात वोको पर उठाहुँ, तबा वय उनको लक लूटे जाहेत जोन उनको दास होतो। तबा तुमी जानने की सेनागिन को यहोवा ना मोला धाड़ीसेस। 10अवो सिय्योन उच्चो आवाज लक गा अना खुसी कर, काहेका चोव, मी तोरो बीच मा निवास करू, यहोवा को यो सबद आय। 11वोना बेरा लगत रास्ट यहोवा परमेस्वर लक मिल जाहेत, अना मोरो परजा भय जायेत, अना मी तोरो बीच मा रहूँ, अना तु जानेत का सेनागिन को यहोवा ना मोला तोरो जवर धाड़ दियो से। 12अना परमेस्वर यहूदा ला पवीतर देस मा अपरो हिस्सा कर लेहेत, अना येरूसलेम नगर ला मंग निवाड़ लेहेत। 13“ओ सब लोख, परमेस्वर को पुड़ा उगो-मुगो रहो, काहेका उ आपरो पवीतर जघा लक जाग के आय रह्यो सेत।”