जकरयाह 1

पिरभू को कन लवटन को बुलावा

1राजा दारा को राज को दूसरो बरस को आठवो महीना मा, जकरयाह भविस्यवक्ता को जवर जोन बेरेक्याह को टूरा अना इद्दो को पोता होतो, परमेस्वर को बचन भेटयो।1 2जकरयाह ना कह्यो “यहोवा तुमरो पुरखागीन लक लगत गुस्सा भयो होतो। 3येकोलय तु इन लोकगीन ला कव्हो आयकत रव्हो सेनागिन को यहोवा असो कव्हसे, तुमी मोरो कन मुरक जाव, सेनागिन को परमेस्वर यहोवा को यो सबद आय, तबा मी तुमरो कन वापिस लवटहुँ, सेनागिन को यहोवा को यो गोस्टी से। 4आपरो पुरखाहुन को जसो नोको बनो। जुनो जुग को भविस्यवक्ता यो चिल्लाय के कव्हत होतीन, सेनागिन को यहोवा असो कव्हसे, आपरो खोटो रास्ता लक, अना आपरो खोटो काम लक मुरको” पर उनना नही आयकिन, अना ना च मोरो कन धियान देइन, यहोवा को यो सबद आय। 5तुमरो आजा पुरखा कहान रहिन? भविस्यवक्ता का हरामेसा जित्तो नही रव्हासेत? 6मीना आपरो दासगीन, भविस्यवक्ता हुन लक तुमरो पुरखाहुन ला बिधि अना चेतावनी दियो, पर उनना उनला नही चोयो, अखिन उनको फर भुगतिन। तब उनना पस्तावा करिन अना सुवीकार करिन, का मी सबलक ताकतवर यहोवा ना उनला वसोच सजा दियो से जसो का वय पान को काबील होतिन अखिन जसो मीना ठानयो होतो।2

घोड़ा गीन को बारेमा भविस्यवक्ता को दरसन

7राजा दारा को दूसरो बरस को सबात3 नाव को अकरा महीनो को चौबीसवा दिवस मा, जकरयाह एक भविस्यवक्ता को जवर जोन बेरेक्याह को टूरा अना इद्दो को नाती होतो, परमेस्वर को बचन असो गयो। 8“मी ना रात ला सपना मा चोयो का एक मानूस लाल चितकबरा घोड़ा मा बसयो हुयो, उ मेंहदिहुन को बीच मा उभो से, जोन उतार को जघा मा सेत, अना ओको मंघा लाल अना भूरा चितकबरा घोड़ा भी उभो सेत। 4 9तबा मी ना कह्यो, हे मोरो, पिरभू यो कोन सेत?” तबा जोन देवदूत, मोरो लक गोस्टी करत होतो, वोना मोरो लक कहीस, मी तोला सांगू, का यो कवन सेत। 10मंग जोन मानूस मेंहदिहुन को बीच मा उभो होतो, ओना कहीस, यो वय सेत जोनला परमेस्वर ना धरती मा पता करन अना हिन्डन को लाय धाड़यो से। 11तबा उनना यहोवा को देवदूत लक जोन मेंहदिगीन को बीच मा उभो होतो, कह्यो, आमी ना धरती मा हिन्डयो सेजन, अना चोयो का सप्पा धरती मा सान्ती अना चैन से। 12तबा यहोवा को दूत ना कहीस, हे सेनागिन को यहोवा, तू जोन येरूसलेम नगर अखीन यहूदा को नगरगिन मा सत्तर साल लक से, एकोलाय तु उन पर कबा तकन रहम नही करेत? 13अना यहोवा परमेस्वर ना जवाब मा वोना दूत लक जोन मोरो लक गोस्टी करत होतो, साजरी अना सान्ती को सब गोस्टी आयकवायो। 14तबा जोन देव दूत, मोरो लक गोस्टी करत होतो, वोना मोरो लक कहीस, तु हाकल के सांग सेनागिन को यहोवा असो कव्हसे, मोला येरूसलेम नगर अखीन सिय्योन को लाई मोठी जरन पैदा भयी से। 15जोन राज गिन सुख लक रव्हसे, उनलक मी गुस्सा सेव; काहेका मी ना ता जरासो हिजड़ गयो होतो, पर उनना आफद ला बढ़ाव दियो। 16यो कारन लक यहोवा असो कव्हसे, अबा मी दया करके, येरूसलेम नगर लवट आयो सेव; इता मोरो भुवन दुबारा लक बनहेत, येरूसलेम नगर मा नाप को दोरी डाकयो जाहे, सेनागिन को यहोवा को यो सबद आय। 17मंग यो भी चिल्लाय के सांग सेनागिन को यहोवा असो कव्हसे, मोरो नगरगिन मंग साजरो चीज लक भर जाहेत, अना परमेस्वर मंग सिय्योन ला सान्ती देहेत; अना येरूसलेम नगर ला मंग निवाड़ लेहेत।

सींग को दरसन

18मंग मी ना निघा वोरता उठायो, ता काजक चोयो का चार सींग होतिन। 19तबा जोन सरगदूत, मोरो लक गोस्टी करत होतो, वोको लक मी ना पुसयो, “यो काजक सेत?” वोना मोरो लक कह्यो, “यो वय सींग सेत, जोन यहूदा अना इसरायल अना येरूसलेम नगर को परमेस्वर ला तितर-बितर करयो से।” 20तबा यहोवा ना मोला चार खातीहुन चोवायो। 21तबा मी ना पुसयो, “यो काजक करन ला आयो सेत ?” ओना कह्यो, “यो सींगहुन ना यहूदा ला असो तितर-बितर कियो होतो, का कोनी डोस्का नही उचल सका; यो खातीहुन उनला डरान को लाय आयो सेत, जोन रास्टगीन ना यहूदा ला तितर-बितर करन को लाय आपरो-आपरो सींग उचलो होतो। ये लोहार उनको सिंग ला तोड़ेत।”