जकरयाह 12

भबिस्य मा येरूसलेम नगर को सूटकारा,

1इसरायल को बारे मा परमेस्वर को कव्हयो गयो सबद, यहोवा जोन बादल को ताननवालो, धरती को पाया डाकनवालो अना मानूस को आतमा ला बनानवालो से, वोको यो सबद आय; 2“चोवो, मी येरूसलेम नगर ला चारो कन को सबच राज को लोक गीनको लाई लडखड़ा देवन को दारू को बटकी ठयराय देहुँ। अना जबा येरूसलेम घेर लियो जाहेत तबा यहूदा को दसा। 3वोना बेरा धरती को पूरो रास्ट येरूसलेम नगर को बिरोध मा जमा भई जाहेत, तबा मी वोला इतरो मोठो गोटा बना देहुँ, का जोन वोला उठाएत वय लगत च घायल होहेत। 4यहोवा को यो सबद आय, वोय बेरा मी हरेक घोड़ा ला घबराय देऊ, अना ओको सवार ला पागल कर देहुँ। पर मी यहूदा को खानदान पर किरपा को निघा करीन, जबा मी दूसरो देस को सब घोड़ा गीन ला अन्धरा कर डाखू। 5तबा यहूदा को मुखिया सोचेत, येरूसलेम नगर को निवासी मा आपरो परमेस्वर, सेनागिन को यहोवा को मदद लक मोरो सहायक बनहेत।” 6वोना बेरा मी यहूदा को अधिपती गिनला असो कर देहू, जसो लकड़ी को ढेर मा स्तो भरके अंगेठा या बोझा मा जरतो हुयो टेमा होवासे, मजे वय उज्जो-डावो चारो कन को सब लोक गीन ला भस्म कर डाकेत। अना येरूसलेम नगर, जिता अबा बसी से, वहान बसी रहेत, येरूसलेम नगर मा च। 7यहोवा पयले, यहूदा को सैनिक तम्बू को सूटकारा करेत, कही असो नोको होय का दाऊद को खानदान अना येरूसलेम नगर को निवासी आपरो-आपरो महिमा को कारन यहूदा को बिरोध मा डिंग हाकेत। 8वोना बेरा यहोवा येरूसलेम नगर को रव्हासी गीनला मानो ढाल लक बचाय लेहेत, अना वोना बेरा उनमा लक जोन ठोकर खावनवाला होय उ दाऊद को जसो होहेत, मजे दाऊद को खानदान परमेस्वर को जसो होहेत, मजे परमेस्वर को दूत को जसो जोन उनको पूढा-पूढा चलत होतो। 9वोना बेरा मी उन सब देस ला नास करन को कोसीस करू, जोन येरूसलेम पर हमला करहेत। 10मि दाऊद को घराना अना येरूसलेम नगर को रव्हासी पर आपरो दया करन वाली अना पिराथना सिकावनवाली आतमा उबडाहूँ, तबा वय मोला चोहेत मजे जेनला उनना छेदयो से, अना वोको लाय असो रड़ेत जसो एकच टूरा को लाय रोवत-पीटत सेत, अना असो मोठो सोक करयेत, जसो मोठो टुरा को लाई करासेत।1 11ओना बेरा येरूसलेम नगर मा एतरो रोना-पीटना होहे जसो मगिद्दोन को घाट मा हददिरम्मोन को घाट मा भयो होतो। 12सप्पा देस मा विलाप, हर एक परिवार मा बेगरो; मजे दाऊद को खानदान को परिवार बेगरो, अना उनको बायका बेगरो; नातान को घराना को परिवार बेगरो, अना उनको बायका बेगरो; 13लेवी को खानदान को परिवार बेगरो अना उनको बायका बेगरो, सिमी गीन को परिवार बेगरो, अना उनको बायका बेगरो। 14अना जेतरा परिवार रह्य गयो सेत, हर एक परिवार बेगरो-बेगरो, अना वोकी बायको भी दुहुर बेगरो।