जकरयाह 11

अत्याचारी गिनको पड़नो

1ओ लबानोन झाड़, आपरो बेसकुड़ उघाड़ का स्तो तोरो देवदार को झाड़ गीनला भस्म करे। 2ओ सनौवर, हाय, हाय करो! काहेका को देवदार पड़ गयो से अना मोठा-मोठा झाड़ नास भय गयो सेत! ओ बासान को बांज झाड़गीन, हाय-हाय करो! काहेका घन्नो जंगल काट दियो गयो से। 3चरानवारो को हाहाकार को सबद भय रहयो से, काहेकि उनको सान नास भय गयो से। जुवान सेर को गरजनो आयकावा सेत, काहेका यरदन नदी को किनार मा को घनो जंगल नास कियो से।

दुई चरान वालो

4मोरो परमेस्वर यहोवा परमेस्वर ना यो हुकूम देइस, “मारन वालो मेढागिन को हेड़ चरान वालो भयी जाय। 5उनको मोल लेवन वालो उनला मारन पर भी पापी नही ठयरतत। अना उनला बिकनवालो कव्हासेत, यहोवा धन्य से, आमी धनी भय गयो सेजन” अना उनको चरान वालो उन पर काही दया नही करासेत। 6यहोवा को यो सबद आय, मी यो देस को रव्हन वारा पर मंग दया नही करू। चोवो, मी मानूस ला एकमेक को हात मा, अना उनको राजा को हात मा सोप देहुँ; अना वय यो देस को नास करयेत, अना मी ओको रव्हन वारा ला उनको हात लक नही सोड़ाहु। 7एकोलाय मि घात होवनवाली मेंढीगिन को हेड़ ला अना खास उनमा लक जोन दीन होतिन उनला चरान लग्यो। अना मी ना दुई लठीया लियो; एक को नाव मी ना सान रख्यो, अना दूसरी को नाव एहसान। ऐकोलाय मी उन मेन्ढीगिन ला चरान लग्यो। 8मी ना उनको तीन चरवाह गीन ला एक महीना मा नास कर दियो। पर मी उनको कारन धीर होतो, अना वय मोरो लक घिरना करत होतीन। 9तबा मी ना उन लक कह्यो, “मि तुमी ला नही चराहुँ, तुमी मा लक जोन मरयो उ मरे, अना जोन नास होये, तो वय नास होये, अना जोन बची रव्हो, वय एकमेक को मांस खाय।” 10अना मी ना अपरी उ लठीया ला तोड़ डाकयो, जोनको नाव एहसान होतो, का जोन करार मी ना सबच लोक गीनको संग बान्धयो होतो वोला तोड़ूँ। 11उ वोच दिवस कापके अलग कर दियो गयो, अना यो लक गरीब मेंढीगिन को हेड़ जोन मोला ताकत होतीन, उनना चीन्हिन का यो परमेस्वर को गोस्टी आय। 12तबा मी ना उन लक कह्यो “अदी तुमी ला साजरो लगे ता मोरी बनी देव, अना नही ता नोको देव।” तबा उनना बनी मा खुरो को तीस सिक्का नाप के दे दियो। 13तबा यहोवा परमेस्वर ना मोरो लक कह्यो, “इनला खजानो 1 को पुढा फेक दे,” यो कितरो मोठो दाम से, जोन उनना मोरो लाय ठयरायोसेस ? तबा मी ना उन खुरो को तीस सिक्का ला धरके यहोवा को घर को खजाना मा डाक देव। 14तबा मी ना अपरी दुसरी लठीया ला जोन को नाव एकता होतो, एकोलाय तोड़ डाकयो, का मी वोको भाऊ-बन्ध को नातो ला तोड़ डाखू जोन यहूदा अना इसरायल को बीच मा से। 15तबा यहोवा परमेस्वर ना मोरो लक कह्यो, “अब तू मूरख चरानवालो को औजार लेय ले। 16काहेका मी यो देस मा एक असो चरानवालो ठयराहुँ, जोन गुमयो हुयो ला नही ढूंडेत, नही तितर-बितर ला जमा करेत, नही घायल गीन को सूधी लेहेत, ना जोन साजरी-साजरी से उनको पालन करेत, अना मोटो गीन को मांस खायेत अना उनको खुरगीन ला फाड़ डाकेत। 17हाय वोना निकम्मबो चरान वालो पर जोन मेंढीगिन को हेड़ ला सोड़ गयो सेत। वोको हात अना उज्जो डोरा दुही पर तरवार लगेत, तबा ओको बाही सूक जाहेत अना ओको उज्जो डोरा फूट जाहेत।”