जकरयाह 10

सूटकारा को करार,

1बसंत को आखीर मा परमेस्वर लक पानी बरसायो, माँगो, परमेस्वर लक जोन बिजली चमकाव से, अना उ उनला बरसात देहेत, अना हर एक को खेत मा फसल उपजाहेत।1 2काहेका असो परकार बेकार बिचार गोस्टी कव्हत अना भावी कहनवाला खोटो दरसन चोईसेव अखीन खोटो सपना आयकाव, अना बेकार सान्ती देवा सेत। यो कारन लक लोग सेरी-मेंढी को हेड़ जसो भटक गयो; अना चरानवालो को मुखिया नही होवन को कारन दुरदसा मा पड़यो सेत। 3मोरो गुस्सा चरान वालो पर से, अना जोन मोरो परजा पर सासन करासेत वोला सजा देहुँ; काहेका सेनागिन को यहोवा आपरो करप यहूदा को घराना को सूधी लेवन ला आहेत, अना लड़ाई मा उनला आपरो अदभूत ताकतवर घोड़ा-सा बनाहेत। 4यहूदा मा लक लगत महत्तम को कोनटा को गोटा, वोच मा लक खूँटी वोच मा लक लड़ाई को तीर धनुस, वोच मा लक सब मुखिया परगट होहेत। 5वय असो वीरगीन को जसो सेत, जोन लड़ाई मा आपरो बयरी गीन ला सड़क को चिखल को जसो खुन्देत, जसो घोड़ा रौदत होय; वय लड़ेत, काहेका परमेस्वर उनको संग रहेत, यो कारन लक वय वीरता लक लड़ेंत अना घुड़ सवारगीन को आस टूटेत। 6मि यहूदा को खानदान को मजबूत करहु, अखिन यूसूफ को घराना को सूटकारा करहुँ। मोला उन पर दया आई से, यो कारन मी उनला वापस आनीन वोना देस मा बसाहुँ, अना वय असो होहेत, जसो मी ना उनला मन लक नही उतारो; मी उनको यहोवा परमेस्वर सेऊ, एकोलाय उनकी आयकु लेहूँ। 7एपरेमी लोक बीर को जसो सेत, अना उनको मन मा असो खुसी होयेत, जसो अंगूर को रस लक होवासे। यो चोयके उनको बच्‍चा खुसी करयेत अना उनको मन यहोवा को कारन लक खुस होयेत। 8“मि सीटी बजाय के उनला जमा करबीन। काहेका मी उनको बचावन वालो सेऊ। अना वय असो बढ़त जाहेत जोन ला गिन नही सकत। 9अदी मी उनला देस-देस को लोकगीन को बीच बिखेर देहू तबा भी वोय दूर-दूर देस मा मोरो हेत करयेत, अना आपरो लेकरा समेत जित्तो लवट आहीन। 10मि उनला मिसर देस लक लवटा आनू अना अस्सुर लक जमा करू, अना गिलाद अना लबानोन को देस मा आय के एतरो बढ़ाऊ, का वय समाय नही सकेत। 11उ दुखदाई सागर मा लक होयके वोको लहरगीन दड़पतो हुयो जाहेत अखीन नील नद्दी को सब गहिरा पानी सूक जाहेत। अस्सुर को गरब तोड़यो जाहे, अखिन मिसर को अधिकार हिसक लियो जाहेत। 12मी उनला परमेस्वर यहोवा कन लक महान करबीन। अना वय वोको नाव लक चलहेत।” यहोवा को यो सबद आय।