Powari Standard Project
भजनसंहिता 31:24
Verse 24 is marked below, with the whole chapter around it. Read from the start
परमेस्वर मा भरोसे को पिराथना
(परधान बजानवारो को लाय दाऊद को भजन)
हे यहोवा, मोरो भरोसा तोरो सरन पर से
मोला कभ्भु लज्जित होवन नोको पड़े;
तू आपरो न्यायी होवन को कारन मोला छुड़ाय ले।
आपरो कान मोरो कन लगाव
पिरभू रक्सक मोरो आसरा मोला सोड़ान लाय लहाकी कर।
तू च मोरो सरन को जघा अना चट्टान रक्सक आस,
मोला रास्ता चोवाव, अना आपरो वादा को अनुसार
मोरो मोहरा चल।
मोला उन जाल लक बाहेर हेड़
जोन मोरो लाय बिछायो गयो से;
तू च मोरो पिक्को किला आस।
मी आपरी आत्मा ला तोरो च सुपरत कर देवासु,
ओ यहोवा सत परमेस्वर
तूना मोरो उध्दार करयो से।1
जोन बेकार को झुठो अना घंमडी चीज मा मन लगाव से,
उन लक मी घिरना करुसु,
पर मोरो भरोसा यहोवा पर च से।
मी तोरी करूना लक मगन अखिन खुस सेव,
काहेकि तू मोरो दुख पर नजर राखयो से,
मोरो दुख को बेरा मा मोरी सुधी लियो से।
अखिन तू न मोला दुसमन को हात मा पड़न नहीं दियोस ;
तूना मोरो पाय ला मोठो जाघा मा उभो करयो से।
ओ यहोवा, मोरो पर दया कर, मी संकट मा सेव
मोरो डोरा अना मोरो पिरान अखिन
तन सब सोक को मारे सूख जावसे।
मोरो जीवन सोक को मारे
अखिन मोरी उमर कराहवत-कराहवत कम भय चली से।
मोरो ताकत मोरो अधरम को कारन जातो रव्हो,
अखिन मोरी हड्डिहीन घुर गयी।
आपरो सब बिरोधिहीन को कारन
मोरो सेजारीहीन मा मोरी नावधराई भइ से।
आपरो ओरखन वालो को लाय भेव को कारन सेऊ,
जोन मोला गल्ली मा चोवासेत,
वोय मोरो लक दूहूर पराय जावासेत।
मी मरयो को जसो लोखहीन को मन लक बिसर गयो।
मी टूटयो हुयो भान्डोहीन को जसो भय गयो सेव।
मी लगत सो दुस्मन गिनको खुसुर-पूसुर आयक लियो
मोरो चारी कन आँतक सेत,
वोय मोरो खीलाप मा जुकती बना रह्यो सेत,
मोला मारन को साजीस करासेत।
अना हे यहोवा, मी न तो तोरो पर भरोसा राखासू ,
मी न कव्हयो, “तू मोरो परमेस्वर आस।”
मोरो जिन्दगानी तोरो हात मा से;
तू मोला मोरो दुसमन अखिन सतावन वारो हीनको हात लक छुड़ाव।
आपरो दास पर आपरो टोंड को उजयारो चमकाव;
आपरी करूना लक मोरो उध्दार कर।
हे यहोवा, मोला नोको लजान देय!
काहेका मीना तोला हाकलि सेऊ।
दुस्ट लजा जाय अखीन वोय मऊत को दुनिया मा उघोमूघो रव्हे।
जोन घमन्ड अखिन बेइज्जत करके नेक मानूस को निन्दा करासे
उनको खोटो बोलन वारो को टोंड बंद करयो जाय।
हे यहोवा, तोरी भलाई केतरी अपार से;
जेको लक तून उन लोख हीन कोलाय रख छोड़यो से
जोन तोरो लक डरा से; अखिन मानूस सन्तान को मोहरा
परगट भी कियो सेत, जोन तोरी सरन मा आवा से।
तू उनला आपरी मवजुदगी को सुरक्सा मा
दूसरो को साजीस लक लुकावासेत।
तू उनला आपरो रव्हन को जाघा मा दोस लगान वालो
जुबान लक सुरक्सित राखासेत।
यहोवा धन्य से, काहेकि उन लक मोला
किला वारो नगर मा राखयो से।
मोरो पर अद्भुत किरपा करयो से।
मी न तो घबराय के कह्यो का
मी यहोवा की नजर लक दूहुर होय गयो।
तबा जबा मी ना तोरी दुहाई दियो,
तब तू न मोरी बिनती ला आयक लियो।
हे यहोवा को सब सेवक हुन ओको लक पिरेम राखो।
यहोवा सच्चो लोखहुन को रक्सा करासे।
पर जोन घमन्ड करासेत वोको लक जादा बदला लेवासेत।
ओ यहोवा पर आसा रखन वारो मजबूत अना हिम्मत वालो बनो।
अखिन तुमरो हिरदा हिम्मत लक भरयो रव्हे।
Source notes (1)
- Cross-reference लूका 23:46; पेरीत 7:59
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.