होसे 9

होसे न इसराइल ला सजा को घोसना

1अवो इसरायल, तु देस-देस को लोकगीन को जसो खुसी मा मगन नोको होवस, काहेका तू अपरो परमेस्वर ला सोड़के बेसिया बनी। तु ना अनाज को हरेक खरीयान मा आपरो यार लक छिनाला की कमाई खुसी लक लेयी से 2वय ना ता खरीयान को अनाज लक अघाहेत, अखीन ना अंगूर को रस को कुन्ड लक, अना नवतो अंगूर को रस घटन लक वय धोका खायेत। 3वय परमेस्वर को देस मा रव्हन नही पाहेत, पर एपरेम मिसर देस मा लवट जाहेत, अना वय अस्सुर मा असुध्द चीज जेहेत।

4वय परमेस्वर को लाई अंगूर को रस ला नही चघाहेत, अखीन ना उनको बली वोला भाहेत। उनको भाकर दुख करन वालो को जसो जेवन ठयरेत, जेतरा वोला जेहेत वय सबरी असुध्द भयी जाहेत, काहेका उनको जेवन को चीज उनको भुख बुझान को च लाय होहेत। वोय परमेस्वर को घर मा नही आय सकेत। 5ठयरायो गयो बेरा को तिहार अना परमेस्वर को खुसी को दिवस तुमी काजक करने? 6चोवो, वय नास होवन को भेव लक चलयो गईन, पर उता वोय मर जाहेत, अना मिसरी अधिकारी उनको लास ला जमा करयेत। अना मोप को रव्हन वालो उनला माती देहेत। उनको मन भावनी खूरो को कीमती चीज काटो को झाड़ को बीच मा रहेत, अना उनको तम्बू मा ईरोनी को झाड़ उगहेत।

7सजा को दिवस आयो से, बदला लेवन को दिवस जवर आयो सेत। अना इसरायल यो जान लेहेत, उनको लगत सा खोटो अना मोठो जलन को कारन भविस्यवक्ता तो मुरख, अना जोन मानूस पर आतमा उतरा से, उ बावला ठयरेत। 8एपरेम पर मोरो परमेस्वर ना एक चवकीदार भविस्यवक्ता राखयो से जेको सबरी रस्ता मा सीकारी को फन्दा से, अना उ अपरो परमेस्वर को घर मा बयरी भयीसे। 9वय गिबा को दिवसहुन को जसो लगत च बिगड़ गइन। एकोलाय उ उनको बदी को हेत लेयके उनको पाप को सजा देहेत।

इसराइल को पाप अना ओको फर

10मी ना इसराइल ला असो पायो जसो कोनी जंगल मा अंगूर पाहेत, अना तुमरो पुरखागीन पर असो निघा करयो जसी अँजीर को पयलो फर पर नीघा कियो जावा सेत। पर उनना पोर पाहाड़ को बाल देवता को जवर जायके आपरो ला लाज को कारन होवन को लाई याजक अरपन कर दियो, अना जोन यार पर मोहित होय गयो होतीन, वय वोच को जसो घिनाहा भई गईन। 11एपरेम को महीमा पक्सी को जसो उड़ जाहेत, ना तो कोनी को जलम होयेत, न कोनी पोट लक होहेत, अना कोनी बायको पोट लक नही होयेती। 12चाहे वय आपरो लेकरा-बारा ला पाल पोसके मोठो भी करहेत, तबा भी मि उन मानूस ला बिन सन्तान को करूह, का कोनी भी नही बच सकेत। जबा मि उन लक दुहुर भई जाहू, तबा उन पर हाय।

13जसो मी ना सूर ला चोवयो, वसोच एपरेम ला भी मनभावनो जघा मा बसो चोयो, तबा भी वोला आपरो लेकरा गिनला घात करन वालो को पुड़ा ले जावनो पड़हेत। 14ओ परमेस्वर उनला सजा दे! तू काजक देवजोस? यो, का उनको बायको को गरभ पड़ जाहेत, अना उनको दूद सुक्को रहेत।

इसराइल पर पिरभु को नियाव

15उनको सप्पा बूराई गिलगाल मा से, वहान च मी ना उन लक घीरना कियो। उनको खोटो काम को कारन मी आपरो घर लक हेड़ देहू, उनलक मंग माया नही करहूँ, काहेका, उनको सब सासक बिदरोह करन वारा सेत। 16एपरेम को लोख उन झाड़ को जसो से जेको जड़ सूक गयो, उनमा फर नही लगहेत। चाहे उनको बायका लेकरा जनहेती, तबा भी मी उनको जलमो हुयो दुलारों ला मार डाखू।

भविस्यवक्ता इसराइल को बारे बोलयो से

17जोन परमेस्वर की मी सेवा कर सेव ऊ आपरो लोखहुन ला तियाग देहे , काहेका उनना वोको नही आयकयो। वय रास्ट-रास्ट को बीच मारे-मारे भटकेत।